6 T’AQA
Job Diospaq hunt’aq karqan
Satanasmi iskayachirqan Job Diospaq hunt’aq kasqanta, paymi ichaqa hunt’aqllapuni karqan
¿ATINKUMANCHU Dios serviqkuna hunt’aq sonqo kayta sinchi sasachakuykunapiña tarikuspapas? Ñawpa tiempopi Job sutiyoq runan chhaynapi tarikurqan. Chaymantan kunan yachasun.
Jobqa Abrahampa familianmantan karqan. Israel runakuna Egipto llaqtapi tiyashaqtinkun Jobqa Uz suyupi tiyarqan. Huk kutinmi Jehová Dios angelninkunawan huñukurqan, Satanaspas rirqanmi. Chaypin Dios Jobpi confiasqanta rikuchirqan paymanta allinta rimaspa. Satanasmi ichaqa Jobta tumparqan ‘imaymana chaskisqanraykullan Diosta servishan’, nispa. Nirqantaqmi: “Kaqninkunatachus kunan qechurqowaq, chayñayá yachawaq imaynataraqchus uyaykipi ñakasunkiman”, nispa.
Diosqa hinallatan qhawarqan Jobpa kaqninkunata Saqra qechunanta, wawankuna wañuchinanta, millay onqoy hap’inantapas. Manaña yacharqanchu imarayku chay sasachakuykunapi tarikusqanta chaypas, Jobqa manapunin Diosmanta karunchakurqanchu.
Chay qhepamanmi kinsa runakuna visitarqanku, amigonman tukuspataq imaymanata rimapayarqanku. Yaqa llapa Job libropin imaymana nisqanku qelqasqa kashan. Nirqankun pakallapi huchallikusqanrayku ñak’arisqanta, serviqninkunapi Dios mana interesakusqanta, paykunapi mana confiasqantapas. ¡Chay rimasqankuqa manan cheqaqchu karqan! Chaymi Jobqa mana chaykunata uyarirqanchu, nirqantaqmi wañunankamapas Diospaq hunt’aq sonqo kananta.
Chaywanpas Jobqa sinchitan payllapi yuyaykusharqan, Diospa sutinpi Kamachikuq kayninpiwan yuyaykunanmantaqa. Elihú waynan lliw rimasqankuta uyarisharqan, chaymi Jobta anyarqan, hinallataq mana allin amigonkunata.
Chaykuna qhepamanmi Jehová Dios kikinpuni Jobta anyarqan. Kamasqankunata qhawarichispan yachachirqan runaqa mana imapaschu Diospa ñawpaqenpi kasqanta. Jobqa huch’uyyaykukuspan uyarikurqan. Chaymi Jehová Dios ‘ancha khuyapayakuq llakipayakuq’ kayninpi Jobta qhaliyachirqan, yapamanta qhapaqyachirqan, chunka wawakunatapas qorqan (Santiago 5:11). Jobqa hunt’aq sonqo kasqanwanmi Satanaspa llulla kasqanta sut’iman horqorqan, rikuchirqantaqmi runakuna sinchi sasachakuykunapiña kaspapas Diospaq hunt’aq kay atisqankuta.
(Job.)