¿Imaynatan Testigokuna aparinku wañusqakuna velayta?
Noqaykuqa Bibliaq nisqanman jinan apariyku chaykunataqa, chayman jinan chaypiqa imatapas ruwayku. Chaymi kunan yachasun imaynatachus imatapas qhawariyku chayta.
May llakikunapaqmi pipas wañupusqanqa. Pi reqsisqanchispas wañupuqtinmi astawanqa sonqo nanan. Jesuspa discipulonkunapas waqarankun familiankuq wañupusqanmantaqa (Juan 11:33-35, 38; Hechos 8:2; 9:39). Chaymi noqaykuqa pipas wañupuqtinqa mana fiestatachu ni imatachu ruwayku (Eclesiastés 3:1, 4; 7:1-4). Aswanmi noqaykuqa noqaykupura llakipayanakuyku, waqapayanakuyku ima (Romanos 12:15). Chaytan pi wañupuqniyoqwanpas ruwayku.
Wañusqakunaqa wañusqan kashanku. Bibliaq yachachisqanman jinaqa, manan paykunaqa maypichu ñak’arishanku ni pitachu yanapashanku o sufrichishanku (Eclesiastés 9:5, 6, 10). Chaymi noqaykuqa maymantaña kayku chaypas mana wañupuqkunapaqqa imatapas ruwaykuchu. Manan ofrendakunatapas mast’aykuchu ni paykunawanchu rimayku; manan misatapas ni imatapas ruwachipuykuchu. Bibliapipunin nin: “Lloqsipuychis paykuna ukhumanta, [...] amaña llamiykuychisñachu imachus qhelli kaqtaqa”, nispa (2 Corintios 6:17).
Wañusqakunaqa kausarimpunqakun. Bibliaq willasqan jina, wañusqakunaqa kausarimpunqakun. Chaymantapas qhepamanqa manañan pipas wañunqañachu (Hechos 24:15; Apocalipsis 21:4). Chayta yachaspan noqaykuqa, sonqo nanayña wañupuy chaypas, mana nishutachu llakikuyku pipas wañupuqtinqa. Chayta yachaymi ñaupa cristianokunatapas yanaparan ama nishuta llakikunankupaq (1 Tesalonicenses 4:13).
Humilde sonqowanmi imatapas ruwana. (Proverbios 11:2) Piniykupas wañupuqtinqa, manan “qhapaqmi kani o allin familiamantan kani” niq jinachu imatapas ruwayku. Aswanmi humilde sonqowan ima ruwaytapas apariyku (1 Juan 2:16) Manan imapas kanman jinaraqchu jatun fiestata jina imatapas ruwayku, nitaq nishu valeq cajonkunatachu rantiyku, nitaqmi allin p’achakunawan churarusqachu chaypi kayku.
Noqaykuqa manan jujkunapas noqayku jina imapas ruwanankutachu munayku. Bibliapi nisqan jina: “Sapankanchismi kikinchismanta Diosman cuentata qosunchis” (Romanos 14:12). Ichaqa pipas imatapas chaykunamanta yachayta munan chayqa respetowanmi paykunaman chayta explicayku (1 Pedro 3:15).
¿Imaynatan Testigokuna chayta aparinku?
¿Maypin chayta ruwanku? Familiamantan chayqa kanqa, wakinqa wasillankupin chayta ruwanku, wakintaq wañuqta velana wasikunaman apanku, wakinñataq cementeriopi chayta ruwanku. Familia munan chayqa, juñunakunayku wasipipas chaytaqa ruwakunmanmi.
¿Imatan chaypi ruwanku? Familiata kallpachanapaqmi juj hermano Bibliawan explican imaynapis wañusqakuna kashanku, imaynas qhepamanqa kausarimpunqaku chayta (Juan 11:25; Romanos 5:12; 2 Pedro 3:13). Chaymantapas yaqapaschá chay rato yuyarikunman imaynas chay wañupuq runa karan chayta, imaynas noqanchispaqpas allin ejemplo chaytapas (2 Samuel 1:17-27).
Chaymantapas atispaqa takikunmanmi Bibliaman jina ruwasqa takikunata (Colosenses 3:16). Tukuspan ichaqa juj oracionwan tukukun (Filipenses 4:6, 7).
¿Cobrakunchu chaykuna ruwakusqanmanta? Manan noqaykuqa cobraykuchu chaykunamantaqa, juñunakuyniykupas gratisllan aparikun maypipas (Mateo 10:8).
¿Pikunan jaykunkuman? Juñunakunayku wasipi chaykuna aparikun chayqa libren kashan pipas chayman jaykumunanpaqqa. Testigopas mana Testigopas jaykumullanmanmi.
¿Testigokuna rinkuchu juj religionkunaq wañusqata velay aparisqankuman?
Sapanka Testigomantan chayqa, sapankan conciencianman jina rinanpas manapas (1 Timoteo 1:19). Ichaqa manan imatapas noqaykuqa ruwaykuchu Bibliaq contranpi kaqtaqa (2 Corintios 6:14-17).