Diospa Siminwan kusikuy
KUSISAMIYOQMI Jehová Diospa ‘kamachikuy siminwan kusikuq’ runaqa, “tutapas p’unchaypas” Diospa Siminta leespan “yuyaymanan” (Sal. 1:1, 2). ¿Chhaynatachu qanpas kusikunki? ¿Imaynatan Diospa Siminwan astawan kusikuwaq?
Jehová Diospa rimasqanta uyariy
Bibliata leespaqa ama leeyllachu leey, aswanpas chaypi willakusqanta rikushawaqpas uyarishawaqpas hina leey. Bibliaq nisqan hina, kay pachata kamashaspaqa Diosmi willarqan sapanka “p’unchaypi” imakuna kananta, chaytaqa uyarishawaqpas hina leey. Kaqllatataq ruway Jehová Dios “runata ruwasunchis”, nispa Churinta nisqanmantapas. Rikushawaqpas hina leey Adanwan Evawan Diospa contranpi hatarisqankumanta, Diospa huchachasqan kaspanku paraisomanta qarqochikusqankumantapas (Gén., caps. 1-3). Chaymantapas “ras” niyraq kachamusqan Churinmanta Jehová Diospa: “Kaymi munakusqay churiy”, nisqanta leeshaspayki (Mat. 3:16, 17). Yuyaykuy imaynatan Apóstol Juan sientekunman karqan Jehová Dios: “Qhawariy, ñoqan lliw imaymanata mosoqta ruwani”, nispa niqtin (Apo. 21:5). Chhaynata Bibliata leeyqa ancha munaymi.
Bibliata leeshallankipuni chayqa allintan reqsinki Jehová Diosta qhapaq-atiyniyoq Tukuy-atiyniyoq, khuyapayakuq, munakuq kasqanta, paymi huch’uyaykukuqtinchis munayninta ruwananchispaq yanapawanchis, yachachiwanchistaqmi allinlla kawsananchispaq, chhayna kasqanta yachaspan tukuy sonqowan payman k’askakunchis (Jos. 1:8; Sal. 8:1; Isa. 41:10).
Bibliata astawan leenki chayqa, aswan allintan yachanki qanmanta Dios imatachus munasqanta, chhaynapitaq ancha kusisqa kawsanki. Ichaqa astawanraqmi kusikuyniyki yapakunqa allin yuyaywan sasachakuyniykikunata atipaqtiyki, hinan Salmo takita qelqaq hina ninki: “Unanchasqa simiykikunaqa utirayachikunmi, chaymi chaykunata kasuni”, nispa (Sal. 119:129). Pay hinan qanpas Bibliaq yachachikuyninkunawan yanapachikuspa Diospa munasqanman hina yuyaykuyta atinki, chhaynapitaq ancha kusikuyta tarinki (Isa. 55:8, 9).
Bibliata leespan yachanchis Jehová Diosqa munakuq Taytanchis kasqanta. Payqa allintan yachan kamachikuyninkunata mana kasukuspa aychanchispa munasqallanta ruwaspaqa nishu sasachakuypi ñak’ariypi tarikunanchista, chaymi Bibliapi kamachikuyninkunata qowanchis mana allin ruwaykunamanta waqaychakunanchispaq allin ñanpi kaspa sumaqta kawsananchispaqpas. Simin Qelqanta leespan aswan allinta rikusunchis Diosninchis Yayanchis ima kasqanta.
Sapa p’unchay Bibliata leey
Sapa p’unchay Diospa Simin Qelqata leeq runamantan Salmota qelqaq nirqan: “¡Imapas ruwasqanqa allillanpunin!” nispa (Sal. 1:3). Pantaq runaña kanchis, Satanaspa munaychakusqan pachapiña tiyashanchis, Saqraña oqoykuyta munawashanchis chaypas, atipasunmanmi ima sasachakuytapas chhaynapi Jehová Dioswan amigontin kananchispaq. ¿Imatan chaypaq ruwananchis? Sapa p’unchaymi Bibliata leenanchis, chayman hinataq kawsananchis.
Sapa p’unchay ratullapas Bibliata allinta leespa Diospa yuyaykusqanta yacharisun chayqa, kallpatan hap’isun sasachakuykunata aguantananchispaq. Iñiyninkurayku carcelpi tarikuq wakin cristianomasinchiskunaqa periodicokunapi tarisqanku versiculokunallatan k’utuchispanku leeyta atiqku, chaykunatan umankupi hap’ikuqku, hinaspa chaykunapi yuyaymanaqku. Chhayna kallpachakusqankumantan Jehová Diosqa paykunata allinpaq qhawarirqan (Mat. 5:3). Ñoqanchismi ichaqa mana presochu kashanchis, chaymi mana ninanchischu: “Sapa p’unchay huk versiculollatapas ratulla leespayqa allin kallpachasqan kasaq”, nispaqa. Aswanmi sapa p’unchay tiempota hap’inanchis Bibliata leenanchispaq, yuyaymanananchispaq, chayman hina kawsananchispaqpas, chay ruwayqa allinninchispaqmi kanqa.
Yachasqanchis hina, manan llapa yuyaykusqanchiskunachu hunt’akun, chaymi yachananchis mayqen ruwaykunata ñawpaqman churananchista. Imaña kaqtinpas unutaqa sapa p’unchaymi ukyanchispuni, chhaynallataqmi Diospa Siminwan kallpachasqa kananchispaqpas tiempota t’aqananchis imaña kaqtinpas (Hech. 17:11).
Tukunaykikama Bibliata leey
¿Llapantañachu Bibliata leerunki? Wakinqa sasapaqmi qhawarinku Génesis qelqamanta Apocalipsis qelqakama Biblia leeyta. Chaymi wakin runaqa Bibliata llapanta leeyta munaspa Griego Rimay Qelqakunamanta qallarinku. ¿Imanaqtin? Yaqapaschá paykunapaqqa mana sasachu chay qelqakuna entiendey, chhaynapi Jesuspa yupinta qatikunankupaq. Chaymantapas chay qelqakunaqa manan nishu askhachu leenankupaq. Chay 27 qelqakunata tukurqospaqa, Hebreo Rimay 39 qelqakunatañataqmi leeyta qallarirqanku, chay qelqakunapi yachachikuykunata entiendespataq kusikurqanku. Hinaspapas chhayna ruwasqankun yanaparqan wakmanta Griego Rimay Qelqakunata leenankupaq, chaymantapachan manaña saqerqankuñachu Biblia leeyta. Qanpas tukuy kawsayniykipi sapa p’unchay Bibliata leenaykipaq kallpachakuy.
Pipas familiaykipi otaq iñiq t’aqapi mana leeyta yachanchu otaq ñawin arphayapun chayri, ¿imatan ruwawaq? Bibliamantan leepuwaq. Chhaynapin paykunaqa anchata kusikunqaku uyarisqankupi yuyaymanaspa chayman hina ruwaspa ima, qanpas anchatan kallpachakunki (Apo. 1:3).
Tiempoq pasasqanman hinaqa yaqapaschá Bibliamanta wakin textokunata astawan yachayta munanki. Chay t’aqwisqaykin yanapasunki Bibliaq wakin nisqankunata allinta tupachispa entiendenaykipaq. Sichus Bibliaykiq paginankunaq uranpi tarikun maskhanapaq huk textokuna chayqa, maskhawaqmi chaykunatapas, chhaynapin astawan yachanki maypi, imaynapi, imarayku wakin salmokuna apostolkunaq cartankunapas qelqakusqanta. Perspicacia para comprender las Escrituras nisqa librokunapin astawan yachanki Bibliaq willasqan runakunamanta, llaqtakunamanta, imayna runa kanamantapas. Chay libroq recuadronkunan rikuchin profeciakunaq hunt’akusqanta, mayqen reykuna profetakunapas kasqan tiempopi kawsasqankumanta, ima tiempopi imakuna sucedesqanmantapas.
Bibliamanta yachasqaykipi yuyaymanaspan entiendenki imaraykus imakunapas Jehová Diospa llaqtanpi sucedesqanta, entiendellankitaqmi imaraykus kamachinkunata chhaynata tratarqan chaytapas. Yachallankitaqmi imaynatas Jehová Dios qhawarin gobiernokunaq, nacionkunaq, runakunaq ruwasqanta. Chaykunamanta yachasqaykin yanapasunki Diospa yuyaykusqanta allinta entiendenaykipaq.
Bibliapi willakusqanta allinta entiendenaykipaqqa, rikushawaqpas hinan yuyaykunayki maypi imaynapi sucedesqanta. Chaypaqqa mapakunan yanapasunki, chaykunapin willakushan imaynas chay hallp’a kasqanta, karupichus chayllapichus karqan chaytapas. ¿Maynintan Israel runakuna Puka Qochata chimparqanku? ¿Maymanta maykaman karqan Prometesqa Hallp’a? ¿May karutan Jesucristo purirqan predicaspa? ¿Ima munay yunkakunata, orqokunata, pampakunatawanmi apóstol Pablo misionero hina viajaspa rikunman karqan? Chaykunapi yuyaymanaymi astawan yanapasunki leesqaykita allinta entiendenaykipaq. Mapakunatan tariwaq Veamos “la buena tierra” nisqa folletopi, Bibliapipas. Chaymantapas Perspicacia nisqa librokunapin kan qanchis chunka hina mapakuna, ñawpaqkaq libroq tukuyninpin mapakunamanta huk lista kashan. Índice de las publicaciones Watch Tower nisqapipas willakushanmi maykunapis huk mapakunatapas tariwaq chayta. Chay librokuna mana kapusuqtiykiqa, Qhawaq revistakunapi rikhuriq mapakunawan yanapachikuy.
Hebreo Rimay Qelqakunaq nisqan hina, rey Davidmi Jehová Diosta hatuncharqan: “Ñoqapaqqa ancha chaniyoqmi yuyaykusqaykikunaqa, ancha askhallañan chaykunaqa”, nispa (Sal. 139:17). Griego Qelqakunapitaqmi apóstol Pablo Kamaqninchismanta nirqan: “Paymi sonqonchispi k’anchayninta k’anchachirqan, [...] lliphlli-kayninta Jesucristoq uyanpi reqsinanchispaq”, nispa (2 Cor. 4:6). Davidwan Pablowanqa manan kaq tiempollapichu kawsarqanku, ichaqa iskayninkun Diospa Simin Qelqawan kusikurqanku, qanpas anchatan kusikunki Jehová Diospa Siminta sapa p’unchay leeynaykipaq tiempota hap’inki chayqa.