Tukuy tiempopaq yachachikuykuna: Honrado kanapaq

BIBLIAQ YACHACHISQAN. “Señor Diosníy, ¿pitaq wasiykipi tiyanqa? [...] Mana huchachanata kawsaqmi, chaninkaqta ruwaqmi, tukuy sonqopuni cheqaqkaqta rimaqmi” (Salmo 15:1, 2).

CHAYQA ALLINNINCHISPAQMI. Askha runakunan ninku: “Honrado kayqa allinmi”, nispa. Ichaqa chayta niq runakunapas llank’anankupi sapallanku tarikuspan mana honradochu kanku. Chaypin rikukun sonqonkupi imapunichus kasqan.

Raquelqa llank’asqan empresapaqmi imaymanata rantin, ninmi: “Wakinqa niwaqkun, ‘ñoqamanta rantiwanki chayqa empresa llank’asqaykipaq rebajasqay qolqemantan wakinta qopusqayki’ nispa. Ichaqa manan munarqanichu, honrado kanapaq Bibliaq yachachisqantan kasukurqani. Jefayqa qhepamanmi chayta yacharqan, chaymi kunanqa astawanraq ñoqapi confian”, nispa.

Chayta kasuspaqa Raquelqa aswan qolqeyoqmi kanman karqan. Ichaqa sichus jefan yacharqonman karqan chayri, ¿llank’achillanmanchu karqan? ¿Huk llank’anatapas tariyta atinmanchu karqan? Manapaschá. Raquelqa astawanmi piensarqan conciencianpi respetasqa kananpiwan. Biblian willan allin runamanta reqsisqa kayqa qolqemantapas qorimantapas aswan allinraq kasqanta (Proverbios 22:1).

Jessiepas llank’ananpiqa honradon, manataqmi qellakachakuspachu llank’an. Chhayna kasqanraykun gerente kapurqan, nirqankutaqmi ima horapi llank’ay munasqanta akllakunanpaq; chhaynapin payqa aswan tiempoyoq karqan familianwan kuska kananpaq religionninpi kaqkunata ruwananpaqpas.

Wakin empresakunaqa honrado runakunatan maskhanku. Huk kutinmi huk empresamanta gerente Filipinas nacionpi Jehová Diospa testigonkunaq sucursalninman qelqaspa llank’anata munachirqan, nirqanmi: “Llank’anataqa qoyta munaykichis honrado allin llank’aq kasqaykichisraykun”, nispa. Chhayna kasqanchismantaqa Jehová Diostan agradecikunchis, paymi yachachiwanchis mana allin kaqta cheqnikunapaq allin kaqtataq munakunapaq (Amós 5:15).