Diospa gobiernonpa kamachikuyninkuna: Diospa chanin-kayninta maskhashanchis

HUK iñiqmasinchismi repararqan paytapas familiantapas huk wasimasin qaynakunamantaña qhawashasqanta. Huk kutinmi napaykusqan qhepaman chay wasimasin iñiqmasinchista tapurqan: “Qankunaqa Jehová Diospa testigonkunan kankichis, ¿riki? ¿Imaraykun hukniray kankichis?”, nispa. Iñiqmasinchistaq kutichirqan: “¿Imaraykun chayta ninki?”, nispa. Hinan chay runa nirqan: “Qankunaqa manan huk runakuna hinachu kankichis, manan huk religionkuna hinachu politicapipas guerrakunapipas chaqrukunkichis nitaqmi fiestakunatapas festejankichischu. Hinaspapas manan cigarrota fumankichischu, familiaykipas allintan kawsan. ¿Imaraykun hukniray kankichis?”, nispa.

¿Imaraykun hukniray kanchis? Diospa gobiernonpa kamachikuyninkunata kasukusqanchisraykun. Reyninchis Jesusqa ch’uyanchawashallanchismi payta qatikunanchispaq chaymi mana kay pachapi runakuna hinachu kanchis. ¿Imakunapin ch’uyanchawanchis? Diosta serviyninchispi, kawsayninchispi, Diospa llaqtan ukhupi llank’ayninchispi ima. Chaytaqa ruwarqan Dios hatunchasqa kananpaqmi.