Lloq’e ladopi: 1945 watapi Eindhoven (Países Bajos) llaqtapi huk iñiqmasita hap’ishanku predicasqanrayku; paña ladopi: Tiyasqayki nacionpi, ¿munallankuchu autoridadkuna predicanaykichista?
TAWA T’AQA
Diospa gobiernon juiciokunata atipan: Gobiernokunaq leyninkuta respetaspa predicanchis
ISKAY iñiqmasikunan predicashaspa uyarirqanku policiaq carron hamushasqanta. Chayta uyarispan paykunaqa manaña huk punkuta takarqankuñachu. Chayllamanmi huk policía carronpi chayamurqan, hinaspa paykunata tapurqan: “¿Qankunachu wasin-wasinta rispa Bibliamanta yachachishankichis? Runakunan qankunamanta quejakushanku”, nispa. Paykunataq respetowan nirqanku Jehová Diospa testigonkuna kasqankuta. Ichaqa, ¿imatan paykunata ruwarqanku?
Chaypaq yuyarisun ñawpaq watakunapi iñiqmasinchiskunata. Ñawpaq watakunapi, ¿imaynatan tiyasqayki nacionpi autoridadkuna Jehová Diospa testigonkunata tratarqanku? ¿Munallankuchu tiyasqayki nacionpi predicakunanta? Askha watakunan iñiqmasinchiskuna askha nacionkunapi ‘allin willakuykunata defenderqanku, allintataq takyachirqankupas’, chayraykun askha nacionkunapi predicashallanku (Filip. 1:7). Jehová Diospa testigonkunaqa askha juiciokunatan atiparqanku, chaymi maypiña tiyanki chaypas chaykunata estudiaspaqa kallpachasqan sientekunki. Kay t’aqapin chaykunamanta yachasun. Juiciokunapi atipasqanchismi sut’ita rikuchin Diospa gobiernon cheqaq kasqanta, ñoqallanchismantaqa manan chaykunata atipasunmanchu karqan.