Lloq’e ladopi: Corea nacionpi huk colportora predicashan (1931); paña ladopi: Corea del Sur nacionpi makiwan rimaq runata predicashanku
ISKAY T’AQA
Diospa gobiernonmanta willakun: Allin willakuykunata pachantinpi willakun
HUK iñiqmasinchisqa predicaq rinanpaqmi alistakurqan, payqa sayk’usqan kasharqan semanantin llank’asqanmanta, chaymi qhepakuyta munarqan wasinpi. Ichaqa Diosmanta mañakuspan predicaqqa lloqsirqanpuni. Payqa huk kurak cristianawanmi predicarqan, chay iñiqmasiqa tukuy sonqowanmi unayña Diosta servisharqan, chayqa ancha allin qhawarinapaqmi. Wasin-wasinta predicashaspan kayta piensaykurqan: “Kay ratopin iñiqmasikunaqa pachantinpi ñoqa hina predicashanku, kaq qelqakunallawanmi predicashankupas, hinaspapas llapallankun kaq preparacionta chaskinku”, nispa. Wasinman kutipuspaqa manañan sayk’usqañachu kasharqan, ancha kusisqataqmi kasharqan wasinpi mana qhepakusqanmanta.
Kay tiemponchispiqa Diospa gobiernonmi runakunata yachachishan. Jesusmi willarqan tukukuy p’unchaykunapi pachantinpi predicakunan kasqanta (Mat. 24:14). ¿Imaynatan chay profecía hunt’akurqan? Kay t’aqapin rimasun pikunachus predicasqankumanta, imaynata predicasqankumanta, imakunawan predicasqankumantapas, chaykunata ruwaspan askha runakunata yanapakushan Diospa gobiernon cheqaq kasqanta yachanankupaq.