Pakasqa qorita tarinku
¿HAYK’AQLLAPAS tarirankichu mana yuyaykusqayki cheqaspi ancha chaniyoq qorita? Estonia suyupin, 2005 watapi 27 p’unchay marzo killapi Ivo Laud sutiyoq Testigo Alma Vardja sutiyoq Testigomasinpa mach’akunapaq thanta wasinta paskaysishaspa pakasqa qorita tarisqa. Huknin perqata paskashaspan huknin k’aspipi k’askasqa tablata rikusqaku. Chay tablata horqoqtinkutaq huk huch’uy tablata tarillasqakutaq. Chay tablawanmi pakasqa kasqa huk t’oqo 10 centimetro anchoyoq, 1,2 metro sayayniyoq, ukhumantaq 10 centimetro. (1) Chay t’oqoqa mana piqpa rikunanpin kasqa. Chay ukhupin qorita tarisqaku. ¿Imayna qorin karan? ¿Pin chay qorita pakaran?
Chaypin tarisqaku raktha papelwan k’uyusqa k’uyukunata. (2) Chay k’uyukuna ukhupin Jehová Diospa testigonkunaq ruwasqan qelqakuna kasqa, astawanqa huñunakuypi estudianapaq Qhawaq revistakuna, wakinqa 1947 watamanta. (3) Chay qelqakunaqa estonio simipin makillawan allin qelqasqa kasqa. Chay k’uyukunata t’aqwisqankupin tarillasqakutaq documentokunata, chaypin yachasqaku pichus chay k’uyukunata pakaran chayta. Chay documentokunaqa Alma sutiyoq iñiqmasinchispa Villem Vardja qosanta ñawpa watakunapi policiakuna imaymana tapusqankumantan rimasqa. Chaypin tarillasqakutaq hayk’a watachus carcelpi kasqanmanta documentokunatapas. Ichaqa, ¿imaraykun carcelpi karan?
Villemqa Estonia suyupi (chay suyuqa repúblicas socialistas soviéticas nisqamantan karan) tarikuq Tartu llaqtapi iñiq t’aqatan umalliran, qhepamantaq Otepää llaqtapiñataq. Payqa yaqapaschá manaraq segunda guerra mundial qallarishaqtin Diosmanta yacharan. 1948 watapi 24 p’unchay diciembre killapin comunistakuna carcelman apasqaku Diospaq llank’asqanrayku. Chaypin policiakuna imaymananmanta tapuyusqaku huk Testigokunaq sutinta willakunanpaq. Manan defiendekunantapas munasqakuchu, aswanmi sentenciasqaku chunka wata Rusia suyupi tarikuq sasa llank’ana campopi llank’ananpaq.
Villemqa 1990 watapi 6 p’unchay marzo killapin wañukapuran chaykaman Dios sonqo karan. Payqa manan warminman imatapas willasqachu qelqakuna pakasqanmanta, manachá munaranchu hap’iruspa imaymana tapunankuta. ¿Imaraykun Villem pakaran chay qelqakunata? Comité de Seguridad del Estado soviético (KGB) nisqamanta policiakunan qonqaylla hermanokunaq wasinpi rikhurispa Bibliamanta qelqakunata maskhayuspa qechuyuqku. Villemqa iñiqmasinkuna espiritualpi saksasqalla kanankupaqpunichá chay qelqakunata pakaran. 1990 watapin Tartu llaqtapi tarillasqakutaq pakasqa qelqakunata chaykunatapas Villemmi pakasqa.
¿Imaraykun chay k’uyukunata ninchis qori nispa? Chay tiempopi cristianokuna espiritual mikhunata ancha chaniyoqpaq qhawarisqankurayku, chaymi makillawan qelqaspa munayllata k’uyuruspa allinta waqaychasqaku (Mat. 24:45). Qanri, ¿paykuna hinachu ancha chaniyoqpaq qhawarinki espiritual mikhunata? Chay espiritual mikhunan tarikullantaq Qhawaq nisqa revistapi, chay revistaqa 170 simikunamanta aswanraqmi lloqsimushan.