¿Cambiarankuchu Bibliaq willakuyninta?

Manan cambiasqachu kashan. Bibliapi yachachikuykunataqa ñaupaq tiempomanta copiakunawanmi compararanku, chaypin sut’ita reparakuran mana cambiasqachu kasqanta. Waranqa-waranqa watakuna ukhupin Bibliataqa gastakuq materialkunapi copiaranku, chaywanpas kaqllan kashan.

Bibliata copiaspa, ¿manachu imallapipas pantaranku?

Kunanqa askhan kashan ñaupaq tiempopi ruwasqanku Bibliamanta copiakunaqa, chay tarisqanku wakin copiakunapiqa maykunapis copiaspa pantaranku chaykunaqa reparakushanmi. Ichaqa chay partekunapi pantasqankuqa manan Bibliapi imachus nisqantaqa cambianchu, wakin partekunapin ichaqa yuyaypipuni Bibliaq nisqanta cambiasqaku, chaytaqa unay watakuna ñaupaqtaraqmi cambiankuman karan. ¿Mayqen partekunapin Bibliapi chayta cambiamuranku? Chayta qhawarisun.

1. Wakin antiguo Bibliakunapin 1 Juan 5:7 textopi nisqanta kay jinata t’ijrasqaku: “Janaq pachapi: Yaya, Simi, Santo espíritu. Chay kinsantinmi ch’ullalla”, nispa. Ichaqa Bibliamanta ñaupa copiakunawan comparaqtinkuqa manan chay jinachu kashan. Original qelqakunapiqa manan chay simikunaqa rijuriranchu. Aswanpas chay simikunataqa Bibliata t’ijraqkunan yapaykuranku.a Kay tiempopi allin t’ijrasqa Bibliakunapipas manan chay simikunaqa kanchu.

2. Bibliamanta ñaupa copiakunapiqa waranqa-waranqanpin Diospa sutin rijurishan, chaywanpas askha Bibliakunapin Diospa sutinpa rantinpi “Señor” otaq “Dios” nispalla churasqaku.

¿Kashanmanchu juj partekunapipas pantasqa?

Kay tiempopiqa askhan kashan Bibliamanta ñaupa copiakunaqa, chay copiakunawan comparaspaqa ratullan tarikun maykunapis pantaranku chaytab. Chhaynaqa imaninkun chay copiakunapi nisqanwan comparaspa, ¿confiasunmanchu kay tiempopi Bibliaq yachachikuyninpi?

• William Henry Green estudioso runan Hebreo simipi qelqakunamanta otaq Antiguo Testamento qelqakunamanta niran: “Antiguo Testamento qelqakunapi yachachikuykunaqa llapanmi kaqlla kashan manan imapas faltanchu. Juj librokunaqa manan chhaynachu”, nispa.

• Bibliakunata allinta t’aqwiq Frederick Bruce runan Griego simipi qelqakunamanta otaq Nuevo Testamento qelqakunamanta niran: “Pruebakunan kashan Nuevo Testamento qelqakuna iman kaqlla kasqanmanta, manan pipas chaytaqa iskayachiyta atinmanchu. Juj librokunamantaqa manan chhayna askha pruebakunaqa kanchu”, nispa.

• Bibliaq copiankunata t’aqwiq Sir Frederic Kenyon runan niran: “Pipas mana iskayaspan Bibliata jap’ispa niyta atinman: Kay Bibliaqa Diospa cheqaq Palabranmi, pachaj-pachaj watakunaña pasaran chaypas Diospa willakuyninqa kaqllan kashan”, nispa.

¿Imakunan rikuchillantaq Bibliapi yachachikuykuna kaqlla kashasqanta?

• Hebreo simipi Griego simipi Bibliata copiaqkunaqa sut’illantan willaranku chay tiempopi Diosta serviq runakuna imakunatas mana allinta ruwaranku chaykunata (Números 20:12; 2 Samuel 11:2-4; Gálatas 2:11-14).c Chaymantapas qelqarankun Diosta mana kasukuq judío runakunamanta, jinallataq pantasqa yachachikuykuna mana allin kasqantapas (Oseas 4:2; Malaquías 2:8, 9; Mateo 23:8, 9; 1 Juan 5:21). Ñaupaq tiempopi Bibliamanta qelqakunata copiaqkuna iman kaqllata copiaspan rikuchiranku honrado kasqankuta, Diospa Palabranta anchatapuni respetasqankutapas.

• Rikusqanchis jina, Diosmi Bibliata yuyaycharan, paytaqmi kunankamapas cuidashan Bibliapi nisqanta ama cambianankupaq (Isaías 40:8; 1 Pedro 1:24, 25).d Diosqa manan ñaupaq tiempopi runakunallapaqchu Bibliapi yachachikuykunataqa qelqachiran, aswanpas payqa munaranmi kay tiempopipas llapa runakuna yachanankuta (1 Corintios 10:11). “Ñaupaqpi qelqasqa kaqkunaqa yachachiwananchispaqmi qelqasqa karan [...] aguantananchispaqpas yanapawanchis, chaymi suyakuyniyoqpas kanchis” (Romanos 15:4).

• Jesuspas qatikuqninkunapas mana iskayaspan Hebreo simipi qelqakunawanqa Diosmanta yachachiranku. Paykunaqa manan jayk’aqpas llakikurankuchu: “Chay qelqakunaqa mana allinpaschá kashan” nispaqa (Lucas 4:16-21; Hechos 17:1-3).