Apocalipsis
8 Maltun Llamagu séptimo sellota pascajpica, cazi media horastami jahua cielopica chulunlla quidarca.* 2 Shinallata, 7 angelcuna Taita Diospa ñaupapi shayanajujtami ricurcani. Taita Diosmi paicunamanga 7 trompetacunata curca.
3 Chaipimi shuj angelca inciensota rupachina oro vasijaguhuan chayarca. Chai angelca, altar ladogupimi shayarishpa quidarca. Taita Diospa separashcacunapa* oraciongunata uyashca ratopillatami, chai angelpash oro altarpi inciensota rupachingapaj ashtaca inciensota chasquirca. Chai oro altarca mandangapaj tiarina pushtu* ñaupapimi carca. 4 Taita Diospa separashcacunapa oraciongunata uyajpimi, chai ángel rupachishca incienso cushnica Taita Diospa ñaupaman chayarca. 5 Shinapash angelca, inciensota rupachina vasijaguta ñapash japishpami, altarmanda nina rupajuj carbonda jundachishpa, cai alpaman shitamurca. Chaipimi, shinllita culun nijuj uyarirca y rayocunapashmi jahua cielopica ricurirca. Shinallata parlocunatapashmi uyarcani. Terremotopashmi tiarca. 6 Chaimi 7 trompetacunata charinajuj 7 angelcunaca, chai 7 trompetacunata tocangapaj alistarirca.
7 Primer ángel trompetata tocajpica rundupash, yahuarhuan chapushca ninapashmi cai alpamanga urmamurca. Chaimi cai alpapa shuj jatun parte* ruparca. Shinallata, ashtaca* yuracunapashmi ruparca. Y tucuilla jihuacunapashmi ruparca.
8 Cati ángel trompetata tocajpica, rupajuj jatun urcushnami mar yacuman shitarimurca. Chaimi mar yacupa shuj jatun parteca* yahuarman tigrarca. 9 Shinallata, mar yacupi tiaj animalcunamandaca ashtacacunami* huañurca. Y ashtaca* barcocunami tucuchi tucurca.
10 Tercer ángel trompetata tocajpica, ushashcata* rupajuj shuj jatun estrellami jahua cielomandaca ashtaca* riocunapi y pugyucunapi urmamurca. 11 Chai estrellaca Ajenjo* shutimi carca. Shinallata ashtaca* yacucunami ajenjo plantashna tucurca. Chai yacucuna jaya jaya tucujpimi, ashtaca gentecuna huañurca.
12 Cuarto ángel trompetata tocajpica, indipa shuj jatun partepash, lunapa shuj jatun partepash* y ashtaca* estrellacunapashmi yanayarca. Chaimi cazi chuscu horasta punllaca yanayarca. Y tutapash shinallatami tucurca.
13 Jahua cielota shuj águila volajujtami ricurcani, uyarcanipash. Chai aguilaca shinllitami cashna nijurca: “Aij, aij, aij cai alpapi causanajujcunalla, paicunaca ninan llaquicunatami charinga. Porque ñallami chaishuj quimsa angelcunaca paicunapa trompetacunata tocashpa huacachinga”.