3 JUAN

1 Ñucaca ñami rucugu capani. Ñuca juyashca huauqui Gayo, quiquinmanmi escribijupani. Quiquindaca tucui shunguhuanmi juyapani.

2 Ñuca juyashca huauqui, imashinami cunangaman aliguman causajupashcangui shinallata aliguman causashpa catipachun y sano cashpa catichunmi Taita Diostaca mañapani. 3 Huaquin huauquicuna shamushpa, cabal yachachishcacunata quiquinba shungupi charijta y chai yachachishcacunata pactachishpa causajujta parlajpica, ninandami cushijuparcani. 4 Ñuca huahuacuna cabal yachachishcacunata pactachishpa causanajujta yachashpaca ninandami cushijuni.*

5 Ñuca juyashca huauqui quiquinga, na rijsishca huauquicunatapash ayudashpaca alitami rurajungui. 6 Chai huauquicunaca, quiquin paicunata juyashpa ayudashcatami congregacionmanga* parlashca. Paicuna ña rinajujpica, paicuna minishtinajuj cosasgucunapi ayudapangui. Imagupi ayudashpapash Taita Dios munashcashna rurapangui. 7 Porque paicunaca Taita Diospa shutimanda predicangapami rirca. Pero paicunaca, paicunata na judío gentecuna imagupipash ayudachunga na shuyanajurcachu. 8 Chashna huauquicunataca mingachinami capanchi. Shinami cabal yachachishcacunata villachingapaj apoyarinajushun.

9 Congregacionmanga huaquin shimigucunatami escribiparcani. Shinapash Diotrefesca, nimata na ñucanchi partemandaca respetohuan chasquingapaj munanllu. Paica siempremi cangunapurapica primero cangapaj munan. 10 Chaimandami chaiman rishpaca, ñucanchimanda nalicunata parlashpa purijushcamandaca rimasha. Paica shina cashca jahuapash, huauquicunata respetohuan chasquingapaca na munanllu. Cutin chasquingapaj munaj huauquicunatapash jarcashpami, congregacionmandapash llujchishpa cachangapaj munan.

11 Ñuca juyashca huauquigulla, nalicunata rurajcunapa ejemplotaca na catinachu capangui. Sino alicunata rurajcunapa ejemplotami catina capangui. Porque alita rurajcunaca Taita Diospa ladomi can. Cutin, nalita rurajcunaca na Taita Diostaca ricushcachu. 12 Tucui huauquicunami Demetriomandaca alicunata parlan. Chai parlocuna cierto cashcataca, paipa causaipi cabal yachachishcacunata pactachishpami Demetrioca ricuchishca. Ashtahuangarin, ñucanchipashmi paitaca alicachinchi.* Paimandaca alicunatami parlapashcanchi. Y ñucanchi parlashcacuna cierto cajtaca, quiquinga alimi yachapangui.

13 Quiquinmanga ashtaca cosascunatami ningapaj munapani. Pero caicunata shuj cartapi escribishpa catingapaca na munapanichu. 14 Ashtahuangarin quiquinda uchalla ricushpa quiquinhuan ñavi ñavi parlangapami munapani.

Tranquilo ali causaiguta charipangui.

Caipi ñucanchi amigocunami quiquinmanga saludocunata cachamupan. Y chaipi amigocunataca ñuca partemanda cada unota shutipi saludapangui.