Sano cana, ñaupaman catinami minishtirin

NA SANO GENTECUNASHNA CABAL CAJCUNA, IMAPASH NALI UNGÜITA CHARIJCUNACA NINANDAMI LLAQUIRIN. Juangaa sano sanomi carca. Shinapash cuerpo enteropi paralisista cujpimi ninanda llaquirirca. Paica ninmi: “Ninanda llaquirishpami, causana o imata rurana munaitapash chingachircani” nishpa.

Imashinami ricupanchi, pipash siempre sano caitaca na ushanchichu. Shinapash sano cangapaca cuidarita ushanchimi. Cuidarijujpipash imapash ungüi japijpica ¿imatata rurashun? ¿Llaquirishpallachu causashun? Na. Shinapash pundapica, sano caita ushangapaj, huaquin yuyaicunata ricupashun.

ALIGUTA PENSARINA. (1 Timoteo 3:2, 11). Yapata micujpi, yapata ufiajpica ashtaca culquimi gashtarin, ungüicunapash japinllami. Proverbios 23:20, 21​pica ninmi: ‘Ufiajcunahuan, aichatalla micujcunahuanbash, ama tandanajunguichu. Machaj runapash, yapata micuj runapash, imatapash na charijmi tucunga’ nishpa.

NA ÑUCANCHI CUERPOTA MAPAYACHINACHU CANCHI. 2 Corintios 7:1​pica ninmi: ‘Ñucanchi cuerpotapash, ñucanchi espiritutapash mapayachinamandaca anchuchinami canchi’ nishpa. Gentecunaca tabacota chupashpa, machashpa, drogacunata ufiashpami paicunapa cuerpota mapayachin. Estados Unidosmanda Centros para el Control y la Prevención de Enfermedades nishcaca ninmi, tabacota chupaimandami gentecunaca “imapash ungüicuna japishpa paicunapa casi tucuilla cuerpota huaglichin” nishpa.

CAUSAICA VALISHCA REGALOMI CAN. Hechos 17:28​pica ninmi: ‘[Taita Diosmandami] causanchi, purinajunchi, imatapash ruranchi’ nishpa. Chaita yaipi charishpaca, na peligroso trabajocunata rurashunllu, na yangata manejashunllu, o shuj ratoguta cushijuimandalla imapash pugllaicunata pugllashpaca na ñucanchi causaita peligropi churashunllu.

LLAQUI YUYAICUNATA CONTROLANAMI CANCHI. Yapata culirajpi, envidiajpi, imatapash musparishcalla rurajujpimi, ungüicunapash japinlla. Bibliapica ninmi: “Ninanda fiñarinata saquishpa, chai fiñarinataca shitai” nishpa (Salmo 37:8). Shinallata ninmi: “Cangunaca, na cayandi punllamanda yarishpa musparinachu canguichi. Punllandimi llaquicunaca tian” nishpa (Mateo 6:34).

ALI YUYAICUNAPIMI PENSARINA CANCHI. Bibliapica ninmi: “Cushilla shunguca, cuerpomambash causaita cunmi” nishpa. Shinallata ninmi: “Cushilla shunguhuan causanaca, cuerpopajpash ali jambigumi” can nishpa (Proverbios 14:30; 17:22). Escocia llactapa Ministerio de Saludpi trabajaj Derek Cox shuti doctorpash ninmi: “Cushilla gentecunataca, ungüicunapash casi na japinllu” nishpa.

ÑAUPAMAN CATINGAPAJ IMAGUTAPASH RURANA. Callari parrafopi parlashca Juan shinami, ungushca cashpapash ñaupaman catina tucunchi. Llaquirishcalla parajushpaca, ashtahuanmi peoriashun. Bibliapica ninmi: “Imatalla rurana punllapi imata ruranatapash na munashpaca, ushai illajmi tucungui” nishpa (Proverbios 24:10).

Ungushca cashcata yachaj chayashca jipaca, ungushca cashcata intindishpami huaquingunaca ñaupaman catingapaj esforzarin. Juanga nircami: “Ñana ali tucunata yachashpaca, Taita Diosta ninanda mañashpami, Bibliapa yuyaicunapi pensarircani” nishpa. Shinami Juanga, jarcaicunata ladoman saqui callarirca. Ashtahuangarin paipashmi shujcunatapash llaquishpa, intindishpa Bibliapi ali villaicunata paicunaman villachi callarirca.

Stevepash 15 huataguta charishpami, shuj quirumanda urmashpa cungamanda uraiman na cuyuri ushashpa quedarca. 18 huatacunata charishpaca ñami maquicunata cuyuchita usharca. Jipamanga universidadman rishpami, shuj shuj huarmicunahuan puri callarirca, drogacunata ufian carca, machan carcapash. Shinapash, Bibliata yachajui callarishpami, ali causai tianata crishpa, pai charishca viciocunatapash saqui usharca. Paica ninmi: “Ñana pundashna ñucalla sintirinichu, cunanga cushilla, tranquilo, alimi causani” nishpa.

Stevepa, Juanba causaita ricushpami, Salmo 19:7, 8​pi shimicunaca cierto cashcata cuenta japi ushapanchi. Chaipica ninmi: ‘Mandaj Dios mandashcacunaca ima pandapash illaj cashpami, mushuj causaiman tigrachin. Mandaj Dios mandashcacunaca imapapash alipacha cashpami, shungutaca cushichin. Mandaj Dios imatalla rurai nishcacunaca ima mapapash illaj cashpami, ñavitaca punchayachin’ nishpa.