Pedroca quimsa viajetami Jesusta negarca

Jesusca paipa apostolcunahuan último Pascua micuita micunajushpami, paicunataca: Cai tutaca tucuillami ñucatalla saquigrihuanguichi nirca. Chaimi Pedroca: Caishujcuna canda saquijpipash ñucaca napacha candaca saquishachu nirca. Shina nijpimi Jesusca Pedrotaca: “Cai tutallatami, gallopash nara candajpillata canga quimsa viajecaman na rijsinichu nishpa ñucataca negahuangui” nirca.

“Jesusta prezo japijcunaca, Caifás shuti sacerdote principalpa huasimanmi Jesustaca aparca”. Chaicamanga casi gulpi apostolcunami pacajugrishca carca. Shinapash ishcai apostolcunaca chai gentecunahuanmi Jesusta catishpa rinajurca. Shujca Pedromi carca. Paica, Caifás shuti sacerdote principalpa huasi patiocaman yaicushpami, ninapi cunushpa tiajurca. Chaipi Pedrota ricushpami shuj sirvienta huarmigu quimirishpa Pedrotaca: “Canbashmi Galilea llactamanda Jesushuanga igual purin carcangui” nirca.

Chaimi Pedroca: ‘No sé, imata nijunguicha’ nirca. Chai jipa, patio yaicunaman Pedro rijpica, shuj joven huarmigupashmi paita ricushpaca, chaipi caj gentecunamanga: ‘Cai runapashmi Jesushuanga purijurca’ nirca. Shinapash Pedroca cutinmi negarca: “Chai runataca na rijsinichu” nishpa. Chai jipallami, shuj runapash Pedrota ricushpaca: “Canbashmi paicunahuan igual purin carcangui. Galilea llactamanda gentecunashnami parlajungui” nirca. Cutinmi Pedroca ‘chai runataca rijsitapash na rijsinichu nishpa juramenturca’.

“Shina nijhuanmi shuj gallo candarca”. ‘Shina candajhuanmi Jesusca, Pedrota tigrarishpa ricurca. Shina ricujpimi, Jesús villashca shimicunata yarirca’. “Chaita yarishpami Pedroca, canllaman llujshishpa ninandapacha llaquirishpa huacarca”.

Chaicamanga importante tucuilla sacerdotecunapash y llactapi autoridadta charijcunapash tandanajushpami Jesusta huañuchingapaj Caifás runapa huasipi parlarinajurca. Paicunaca imamandapash juchachishpa Jesusta huañuchinatami decidishca carca. Shinapash Jesustaca imamandapash na juchachi usharcachu. Cutinmi Caifasca Jesustaca: “Canga, ¿Taita Diospa Churichu cangui?” nishpa tapurca. Chaimi Jesusca: “Ari, ñucami cani” nirca. Shina nijpimi Caifasca: Paica Diostami nalicachishpa rimajun nirca. Chaimi tucui sacerdotecunaca, paica huañunapachami can ninajurca. “Chaita nishca jipallami Jesustaca, ñavipi tucashpa huactanajurca”. Jesustami: “Can profeta cashpaca pi huactajujta villahuayari” ninajurca.

Ña punllayajpimi, Judiocunata mandajcunapa ñaupaman Jesustaca apanajurca. Chaipimi: Canga ¿Taita Diospa Churipachachu cangui? nishpa cutin tapunajurca. Shina nijpimi Jesusca: Ñuca Taita Diospa Churi cajtaca, cangunallatami ninajunguichi nirca. Shina nijpica Diostami nali shimicunahuan rimashca nishpa Jesustaca juchachirca. Chaimi Roma llactata mandaj Poncio Pilatopaman aparca. Chai jipa ima pasashcataca cati capitulopimi yachajupashun.