Jesusca Gólgota pushtupimi huañurca

Sacerdote principalcunami Jesustaca Pilatopa mandana huasiman aparca. Pilatoca: “Cai runaca ¿ima nalitata rurashcayari?” nishpa tapurca. Chaipimi paicunaca: Paica reymi cani nijunmi. Chaimi Pilatoca: “¿Canllu judiocunapa rey cangui?” nishpa tapurca. Jesusca: “Ñucapa Gobiernoca cai mundopi gobiernocunashnaca na canllu” nirca.

Jipamanga Pilatoca, Galilea llactata mandaj Herodes imamandapash juchachinata ricuchunmi Jesustaca paipaman cacharca. Shinapash Herodesca Jesusta imamandapash na juchachita ushashpami Pilatopamanllata tigrachirca. Chaimi Pilatoca gentecunataca: Herodespash, ni ñucapash imamanda juchachinata na charinchichu, paitaca libremi saquigrini nircami. Chaimi gentecunaca: Chai runataca huañuchichunmi munanchi nishpa caparinajurca. Chai jipami soldadocunaca Jesustaca ñavipi tucashpa, ninanda astishpa macanajurca. Shinallata cashacunahuan rurashca coronatapash umapi churachirca. Jipamanga: “Ali punlla, judiocunapa rey” nishpa capari callarirca. Chaimi cutin Pilatoca gentecunataca: Cai runataca imamandata juchachinajunguichi, ima nalitapash na rurashcachu nirca. Shina nijpica gentecunaca: “Jatun racu caspipi huarcushpa saquichi” nishpa caparinajurca. Chaimi Pilatoca Jesusta huañuchichun paicunaman curca.

Jipamanga Gólgota pushtumanmi Jesustaca apanajurca. Chaipimi Jesustaca shuj racu caspipi clavashpa saquirca. Chaimi Jesusca Jehová Diosta cashna mañarca: “Ñuca Taitalla cai gentecunataca perdonapayari. Porque paicunaca imata ruranajushcatapash na yachanllu” nishpa. Chai gentecunaca Jesusmanda burlarishpami: “Taita Diospa Churi cashpaca, chai jatun racu caspimanda uriajuyari” ninajurca.

Jesuspa ladopi jatun racu caspipi huarcushca shua runaca: “Jesús, quiquin ña rey shina mandajushpaca ñucata yarihuangui” nirca. Chaimi Jesusca: “Paraisopica ñucahuanmi cangui” nirca. Ña chishi tucujujpica quimsa horastami yana yana tucurca. Jesuspa huaquin discipulocunaca, Jesusta huarcushca racu caspi ladopimi shayanajurca. Chaipica Jesuspa mama Mariapashmi carca. Chaipimi Jesusca Juanda cashna nirca: Canba mamatashna ñuca mamata cuidapangui nishpa.

Jesús ña huañugrijushpaca cashnami nirca: “Quiquinba munaitaca ñami pactachipashcani”. Shina nishca jipaca, umata huarcushpa huañurca. “Chai ratomi, Taita Diospa templo huasipi cortinaca jahuamanda urai llujshijta liquirirca. Alpapash shinllitami chujchurca”. Chaimi shuj soldadoca: ‘Cai runaguca, ciertopachami Taita Diospa Churigu cashca’ nirca.