Apóstol Pablotaca Roma llactamanmi aparca

Ashtaca llactacunapi Diosmanda ali villaicunata villachishca jipaca, apóstol Pabloca Jerusalén llactamanmi rirca. Chaipimi prezo japirca. Shuj tuta carcelpi cajpimi Jesusca shuj muscuipi Pablomanga: ‘Roma llactapipash villachinami cangui’ nirca. Chai jipaca Pablotaca Jerusalenmanda, Cesarea llactamanmi aparca. Chaipimi ishcai huatacunata prezo carca. Shuj punllaca tribunal ucupi llactata mandaj Festo shuti runapa ñaupapi cashpami apóstol Pabloca: “Ñucataca Roma llactapa rey juzgahuachunmi munani” nirca. Chaimi Festo runaca: ‘Roma llactapa rey juzgahuachunmi munani ninguimi. Shinaca, Roma llactapa rey quiquindaca juzganga’ nirca. Shinami apóstol Pablotaca shuj barcopi Roma llactaman aparca. Pablotaca Lucaspash, Aristarcopashmi cumbashpa rirca. Paicunaca Jesusta catijcunami carca.

Ña marpi cajpimi tauca punllacunata ninan huaira jatarishpa mar yacuta caiman chaiman cuyuchijpimi derecho ritaca ñana ushanajurca. Chaimi tucuicuna, huañugrinchimari ninajurca. Shinapash Pabloca cumbacuna, shuj angelmi cashna nihuarca: Pablo, ama manllaichu. Roma llactamanmi chayangui y canhuan rinajujcunapash tucuicunami salvaringa. Shinaca ama manllaichichu na huañugrinchichu nirca.

Shina 14 punllacunata manllanaita huaira jatarishpa yacuta caiman chaiman cuyuchishca jipami Malta shuti islata carupi ricurca. Barco trancarishpa, faquirijpipash 276 gentecunaca tucuillami yacu manñaman chayarca. Huaquingunaca nadashpa, shujcunaca barco pedazocunapi huarcurishpami yacu manñaman chayarca. Chaipimi Malta shuti islamanda gentecuna paicunata cuidarca, cunuchunbash ninata japichirca.

Quimsa quilla jipami soldadocunaca Pablota shuj barcopi Roma llactaman aparca. Chaiman chayajpica huauquipanicunami chasquingapaj rirca. Paicunata ricushpaca Pabloca Diosta pagui nishpami, ninanda animarirca. Pablo prezo cajpimi, pai causagrijushca huasipica shuj soldado cuidagrijurca. Ishcai huatacunatami chaipi yalirca. Gentecuna visitangapaj rijpica, Pabloca Diospa Reinomanda villachishpa, Jesusmandapashmi paicunamanga yachachin carca. Shinallata Pabloca Asia Menor, Judea llactapi huauquipanicunamanbashmi cartacunata escribirca. Imashinami ricunchi ali villaicunata shuj shuj llactacunapi villachichunga, Jehová Diosmi apóstol Pablotaca cacharca.