6 REBECA
Na manllashpami na rijsishca llactaman rirca
ÑAMI chishi can. Rebecaca familiaman yacuta apangapami shuj jatun funduhuan pozo yacuman rin. Talvez chaitaca cada punllami ruraj carianga. Chai pozopi na rijsishca runacuna camellocunahuan cajta ricushpapash Rebecaca yacuta japingapami rin.
Rebeca yacuta apashpa tigrajujpimi shuj mayorlla jariguca: “Por favor, canba yacu fundugumanda asha yacuguta carahuai” nishpa mañarca. Rebecaca chai na rijsishca jaricunata juyaihuanmi tratarca. Paicunamanga na mitsashpami cararca. Paica: “Ñuca amolla, yacugutaca ufiapailla” nishpa ñana munangacaman yacutaca cararca.
Shinallata Rebecaca paicunapa 10 camellocunamanbashmi yacugutaca cararca. Chai mayorlla jariguca camellocuna ñana munangacaman chai juyailla joven huarmigu yacuguta carajta ricushpaca manllarishcami quidarca. Chai jariguca: “¿Pipa ushita cangui? ¿Quiquinba familiapa huasipi cai tutaca tucuillacuna quidaita ushapanchimanlla?” nishpami tapurca. Chaimi Rebecaca paicuna maipi quidanata, paicunapa animalcunaman micunata caranatapash ofrecirca.
Rebeca na yachajpipash Jehová Diosca chai mayorlla jarihuan tuparichunmi tucuita rurarca. Chai mayorlla jariguca Eliezermi cashcanga. Huaquin semanacuna huashamanga Abrahanga paipi ninanda confiaimandami caru caruta richun cachashpa paipa churi Isaacpa shuj huarmiguta mascachun mingarca. Abrahanga: “Chai huarmiguca Jehová Diosta adoraj familiamandami cana can” nishpa cutin cutinmi nirca. Chaimi Eliezerca Jehová Diospa ayudata mañarca. ¿Imatata mañarca? Isaachuan cazarachun Jehová Dios agllashca huarmigu paicunata aliguta tratashpa mingachichunmi mañarca. Y Rebecaca chaitami rurarca.
Rebecaca chai runacunata na rijsishpapashmi ayudarca. Cai tiempopi causaj gentecunamanda parlashpaca Bibliapica: “Millai millaicuna, alita ruranata na gushtajcunami canga” ninmi (2 Tim. 3:1, 3). Chaimi cunanbica na rijsishca gentecunata ayudanaca na fácil can. Bibliapa tiempopi na rijsishca gentecunata ayudana ashtahuan fácil cajpipash Rebecaca na mitsashpa caraj, mingachij huarmigu cashpami alipacha ejemplota ricuchirca. Shinallata na manllashcataca shuj shuj cosascunata rurashpami ricuchirca.
Rebecapa huasiman chai runacuna chayajpica imamanda caru caru llactamanda shamushcatami yachaj chayarca. Rebecapa taita Betuel y paipa turi Labanga micungapami Eliezertaca paipa huasiman invitarca. Shinapash nara micui callarishpallatami Eliezerca imapa chaipi cashcata parlarca. Chaipimi Eliezerca Jehová Dios Rebecahuan tuparichun ayudashpa imashina bendiciashcata parlarca. Chaita uyashpaca Betuel y Labán Jehová Dios chai jarita ayudashcata cuenta japishpami: “Caitaca Jehová Diosmi rurajun” nirca.
Paipa huasimanda caruta rishpa na rijsishca jarihuan cazarachun Taita Dios munashcata yachashpaca Rebecaca ¿imatashi rurarca?
Rebecaca ¿imatata rurarca? Abrahanga Eliezer tarishca huarmigu paihuan Canaán llactaman talvez na ringapaj munanataca alimi yacharca. Shinaca Rebecaca paillatami decidita ushana carca. Eliezerca cayandi punllaca: “Rebecataca ¿cunanllata pushai ushanillacha?” nishpa tapurca. Chaimi Rebecapa familiaca: “¿Ringapaj munanguichu?” nishpa tapurca. Paica: “Ari, munanimi” nircami. Paipa huasita saquishpa, paipa familiata talvez nunca ñana ricunata yachashpapash ringapaj dispuestami carca. ¿Imamandata na manllashpa rirca? Rebecaca Jehová Diospa voluntad pactarichun paita utilizajushcatami intindishcanga.
Huaquin semanacunata camellopi rishca jipaca tucuicunami Canaán llactapi Abrahán causajuj pushtuman chayarca. Ña tutayajujpimi Rebecaca shuj runagu pambapi purijujta ricurca. Chai runaguca pensaringapami llujshishca carca. Chai jari Isaac cajta cuenta japishpami Rebecaca paipa umata shuj velohuan quilparirca. Shinami Isaac paipa cusa tucuna cashcata aceptajushcata ricuchirca. Isaacca 40 huatacunatami charirca. Paica aliguta pensarij, shujcunata llaquij jarimi carca. Shinallata paipa mama Sara quimsa huatacuna huashaman huañushcamandami todavía llaquilla carca. Rebecaca ¿Isaacta juyashpa, Jehová Diosta sirvichun y familiata pushachun ayudashpachu ali huarmigu tucugrijurca? Bibliapica Rebeca chaicunata ali pactachishcatami ricuchin. Shinallata Bibliapica: “Isaacca tucui shunguhuanmi paitaca juyarca. Shinami Isaacca paipa mama huañushcamanda ña ama llaquilla cangapaj consolari usharca” nishpami Isaac paipa huarmi Rebecamanda imata yuyashcatami ricuchin.
Bibliapi ima nijta liipai
¿Imatata nipanguiman?
Rebecaca ¿imashinata na manllashcataca ricuchirca?
Ashtahuan informacionda mascapai
1. Abrahán huahuacunata charijpica ¿imashinata Eliezerpa causaica cambiarca? Shina pasashcamanda Eliezer na culira cashcataca ¿imashinata yachapanchi? (Gén. 15:2-4; 24:12; w97 1/1 30 párr. 2).
2. Abrahanga Isaac Rebecapa llactaman richunga na munarcachu. Chaipa randica, Rebeca Canaán llactapi causachunmi munarca. ¿Imamandata chaita rurachun munarca? (w97 1/1 30 párr. 3).
3. ¿Imamandata Rebecaman y paipa familiamanga regalocunata cararca? (it “Rebeca” párr. 4).
4. Rebecaca Harán llactamanda Négueb llactapi Isaacpa huasimanmi rirca. Chaiman rinaca ¿facilchu cashcanga? (wp16.3 14 párr. 9). A
www.LifeintheHolyLand.com
Foto A: Punda punllacunapica Négueb nishca alpacunapica ashtaca gentecunami causan carca. Shinallata verde jihuacuna tiajpimi Abrahanga paipa animalcunataca chaipi michita usharca.
Imata yachajushcapi pensaripai
Pihuan cazaranata agllangapaca Abrahán, Rebeca, Isaacpa ejemplomandaca ¿imatata yachajupanchi? (Gén. 24:2, 3; 27:46–28:1).
Rebecaca shinllita trabajaj, na mitsa, respetaj huarmigumi carca. Cunan tiempopi panigucunaca ¿imashinata paipa ejemplota catita ushan? B
Foto B
¿Imashinata Rebecapa ejemplota catishpa na manllashcata ricuchita ushapangui?
Ima pasashcapi pensaripai
Cai historiaca Jehová Diosmandaca ¿imatata yachachihuan?
Cai historiaca Jehovapa voluntadhuan y Bibliapa temahuanga ¿imatata ricunata charin?
Rebeca causarijpica ¿imatata paita tapungapaj munaiman?
Ashtahuan yachajupai
Rebeca na manllaj huarmi, na manllaj mama cashcata imashina ricuchishpa catishcata ricupai.
“Rebeca huarmiguca Diosta ali sirvij cashcataca ruraicunahuanmi ricuchirca” (w04 15/4 8-11)
Huahuacunaca Rebecapa ejemplomandaca ¿imatata yachajuita ushan?
“Rebeca huarmiguca ali cualidadcunatami charirca” (“Actividades ilustradas”, nishcata jw.org paginapi ricupangui)