¿Imashinata shuj ali causaiguta chari ushapashun?

TAITA DIOSCA gentecuna ali causachunmi munarca. Taita Diosca tucui gentecuna paitalla cazushpa causachunmi munarca. Paipa consejocunatapash catishpa ali causachun, gentecuna Jehová Diospa ali cualidadcunata ricuchishpa causachunmi munarca. Shinallata tucuicuna cushilla ali causachun, familiapipash cushilla causachun, mushuj cosascunata yachajuchun, cai alpatapash shuj juyailla paraíso alpaguta rurachunmi munarca.

TAITA DIOSCA PAI MUNASHCASHNA CAUSAIGUTAMI CARANGA

• ‘Paica, cai pacha tucui manñacunacaman jatun macanajuicunatapash’ tucuchingami (Salmo 46:9).

• “Cunanga cambash ninanda fiñashpa llaquichina punlla pactamushca, cai pachata tucuchijcunata, can tucuchinami pactamushca” (Apocalipsis 11:18).

• “Chaipi causajcunaca, pipash na: “Ñucaca huañujunimi” ninajungachu” (Isaías 33:24).

• “Ñuca agllashcacunaca, paicunapaj maquihuan imatalla rurashcahuanmi cushijushpa causanajunga” (Isaías 65:22).

Cai Bibliapa nishcacunaca ¿imashinata pactaringa? Chaipaca Taita Diosca paipa Reinopi o Gobiernopi mandachun paipa churi Jesusta agllarca. Chaimi Jesusca jahua cielomanda cai alpata mandanga (Daniel 2:44). Shinallata Jesusmanda parlashpaca cashnami Bibliapica nin: “Mandaj Taita Diosca paimanmi, paipaj ñaupa taita David mandashpa tiajushcataca cunga. Pai mandanaca, napacha tucuringachu” nishpa (Lucas 1:32, 33).

Jesús cai alpapi cashpaca tauca milagrocunatami rurarca. Shinami Jesús cai alpata mandajpica tucui gentecuna ali causaiguta charinata ricuchijurca.

CAZUJ GENTECUNATA JESÚS IMASHINA BENDICIANATAMI RICUCHIRCA

• Jesusca shuj shuj ungüicunata charijcunatami jambirca. Shinami Jesusca tucui ungüicunata tucuchi ushashcata ricuchirca (Mateo 9:35).

• Jesusca yacuta, huairatapashmi controlai usharca. Shinami Jesusca yacuta, huairatapash controlai ushashcata ricuchirca (Marcos 4:36-39).

• Jesusca ashtaca gentecunamanmi micunata cararca. Shinami Jesusca gentecunaman imata minishtishcata carai ushashcata ricuchirca (Marcos 6:41-44).

• Jesusca shuj bodapi cashpami yacutaca vinoman tigrachirca. Shinami Jesús mandajujpi gentecuna alipacha causaiguta charinata ricuchirca (Juan 2:7-11).

Taita Diosta juyajcunaca tauca bendiciongunatami chasquinga. Ñucanchipash chai bendiciongunata chasquingapaca ¿imatata rurana capanchi? Chaipaca shuj ‘ñandallami’ japina capangui. Bibliapica cashnami nin: ‘causaita causangapaj’ shuj ñanllami tian nishpa. Shinallata chai ñandaca huaquin gentecunallami tarin ninmi (Mateo 7:14).

ALI CAUSAIMAN APAJ ÑAN

Causaita causangapaj ñanga ¿imata can? Cai ñanga, Taita Dios imata rurachun munashcatami ricuchin. Chaimi Taita Diosca cashna nin: “Ñucami, cangunata Mandaj Taita Dios cani. Ñucami, cangunapaj ali cachun cangunata yachachini. Canguna maijan ñanda rinatapash, ñucami ricuchishpa pushani” nishpa (Isaías 48:17). Cai ali ñanbi purishpaca ali causaigutami charipashun.

Jesusca nircami: “Ñucallami ñan cani. Na llullashpa villajmi cani” nishpa (Juan 14:6). Jesuspa chaquita catishpa, paipa yachachishcacunata crishpami Jehová Diosman ashtahuan quimirita ushapanchi. Shinami ashtahuan aliguta causapashun.

‘Causaita causana’ ñandaca ¿imashinata tari ushapanchi? Ashtaca religionguna tiaimandami Jesusca nirca: “Ñucataca: ‘Apunchi Jesús, Apunchi Jesús’ nishpami purinajun. Shina ninajushpapash, na tucuicuna jahua pachapi Dios mandajuj llactaman yaicui ushangachu. Ashtahuangarin jahua pachapi tiajuj ñuca Taita munashcata pactachijcunallami, yaicui ushanga” nishpa (Mateo 7:21). Shinallata nircami gentecunaca “ima cajpipash grano fucunshna cajta ricushpami rijsinguichi” nishpa (Mateo 7:16). Shinaca Bibliami ali religionda tarichun ayudanga (Juan 17:17).

‘Causaita causana’ ñanda puringapaca ¿imatata rurana capanchi? Ñucanchicunaman pi causaiguta carajtami ali yachana capanchi. Shinallata pi cajta, ima shuti cajta, imashna cajtami yachana capanchi. Ashtahuanbash cunanbi imata rurajujta, gentecunapash imata rurachun pai munashcatami yachana capanchi.a

Gentecuna trabajashpalla, micushpalla, pugllaicunapi yalishpalla o cazarashpalla causachunga Taita Diosca na munanllu. Paica paita rijsishpa, paipa amigocuna tucuchunmi munan. Taita Diosta cazushpami paita juyashcata ricuchinchi. Jesusca nircami: “Na llullaj shujlla Taita Dios cashpami, cambaj Churi Jesucristotaca cachamuhuarcangui. Shina cajta rijsishpallami, pipash causaita causagringa” nishpa (Juan 17:3).

¿IMATATA RURANA CAPANGUI?

Taita Diosta cushichingapaca ñucanchi causaipimi huaquin cambiocunata rurana capanchi. Huaquinbica shinllimi ricuringa. Shinapash ‘causaita causangapaj apaj ñanda’ catishpaca, ñucanchicunaca ashtahuan alimi causashun. Taita Diosmanda ashtahuan yachajungapaj munashpaca, Testigo de Jehovacunaca cushijushpami yachachishun. Shinaca internetpi testigo de Jehovacunapa paginapi, quiquinba datocunata escribingui. Chaimi shuj testigo de Jehová quiquinda cayanga ima punlla, ima horas maipi yachajungapaj parlaringapaj.