Villachingapaj llujshina tandanajuicunaca ¿imashinata cana can?

1. Villachingapaj llujshina tandanajuicunaca ¿imapata can?

¹ Shuj punllaca nara villachingapaj cachashpallatami Jesusca paipa 70 catijcunata tandachirca. ¿Imapata tandachirca? (Luc. 10:1-11.) Jehová Diosca ricuriajungami, ayudajungami nishpa animangapaj, imashina villachinata yachachingapami tandachirca. Ashtahuangarin, aliguta organizashpami paicunataca ishcai ishcai villachichun cacharca. Cunan punllacunapipash villachingapaj llujshina tandanajuicunaca huauquipanicunata animangapaj, yachachingapaj, organizangapami can.

2. Abril quillamandaca ¿mashna tiempotata villachingapaj llujshina tandanajuica parana can?

² Cunangamanga villachingapaj llujshina tandanajuica 10 ó 15 minutocunatami paran carca. Chai tiempopimi pihuan villachinata, maiman rinata ricuchishpa shuj oracionda rurana carca. Shinapash cai abril quillamandaca 5 ó 7 minutocunatallami chai tandanajuica parana can. Congregacionba maijanbash tandanajui jipa villachingapaj llujshishpacarin, Jehová Diosmanda ña yachajushca caimandami villachingapaj llujshina tandanajuica ashtahuan menos tiempota parana can. Villachingapaj llujshina tandanajuicuna asha minutocunatalla parajpimi publicadorcunaca ashtahuan tiempota villachi ushanga. Ashtahuangarin villachingapaj llujshina tandanajuicuna ashalla minutocunata parajpimi pundata villachingapaj llujshishca precursorcuna, publicadorcunaca asha minutocunatalla villachinata saquinga.

3. Villachingapaj llujshina tandanajuitaca ¿imashina organizashpata ali canman?

³ Villachingapaj llujshina tandanajuitaca ¿imashina organizashpata ali canman? Ashtaca congregaciongunaca cuenta japishcami, villachingapaj grupocunaca cada uno shuj shuj ladocunapi tandanajuna ali cashcata. Shinami villachingapaj llujshina tandanajuipash, territoriopash tucuicunapa ladollapi canga, huauquipanicunata organizanapash ashtahuan jahuallami canga. Grupocunapa superintendentecunapash paicunapa grupopi huauquicunataca ashtahuan aligutami ayudai ushanga. Shinapash cada congregacionbi ancianocunami villachingapaj llujshina tandanajuita imashina organizanataca congregacionbi aliguta pensarishpa ricuna can. Villachingapaj llujshina tandanajuita shuj uchilla mañaihuan nara tucuchishpallatami tucuicuna maiman rinata, pihuan llujshinataca ali yachana can.

4. ¿Imamandata villachingapaj llujshina tandanajuipash chaishuj tandanajuicunashnallata minishtirishca can?

⁴ Villachingapaj llujshina tandanajuica minishtirishcami can. Villachingapaj llujshina tandanajuimanga villachingapaj rinajuj publicadorcunallami rin. Na tucuilla huauquipanicuna chaipi cajpipash chaishuj tandanajuicunashnallata minishtirishcami can. Jehová Diosmi chai tandanajuitapash carashca. Chai tandanajuipashmi huauquipanicunahuan juyarishpa, alita ruranata yarichirichun ayudan (Heb. 10:24, 25). Chaimandami villachingapaj llujshina tandanajuita ñaupaman pushajcunaca chai tandanajuipi Jehovata alabangapaj, tucuicunata animangapaj aliguta prepararishpa rina can. Shinaca, villachingapaj llujshina tandanajuipash minishtirishca cashcamandami, usharijpica villachingapaj llujshijcunaca chai tandanajuipipash cangapaj tucui shunguhuan esforzarina can.

Villachingapaj llujshina tandanajuica chaishuj tandanajuicunashnallata minishtirishcami can

5. a) Superintendente de servicio huauquica ¿ima responsabilidadtata charin? b) Villachingapaj llujshina tandanajuita ñaupaman pushana cashpaca ¿imatata panicunaca rurana can? (Página 6pi recuadrotapash ricupangui)

⁵ Aliguta ñaupaman pushangapaca ¿imashinata prepararina can? Imashinami congregacionbi asignaciongunata aliguta pactachichunga asignacionda tiempohuan, uchalla cuna can, shinallatami villachingapaj llujshina tandanajuipi aliguta ñaupaman pushachunga pi ñaupaman pushanataca uchalla villana can. Villachingapaj llujshina grupocuna shuj shuj ladocunapi tandanajuna cajpica grupocunapa superintendentecuna o paicunata ayudaj huauquicunami villachingapaj llujshina tandanajuipica ñaupaman pushana can. Cutin, shuj ladopilla tucuicuna tandanajuna cajpica superintendente de servicio huauquimi chai tandanajuipi pi ñaupaman pushanataca uchalla ricuna can. Huaquin superintendente de servicio huauquicunaca, shuj hojapi programata rurashpami chai hojataca grupota llujchinajuj tucuilla huauquicunaman cun, tablero de anuncios nishcapipash churan. Shinallata villachingapaj llujshina tandanajuipica aliguta organizana, yachachinami minishtirin. Chaimandami superintendente de servicio huauquica maijan huauqui aliguta ñaupaman pushanata ricushpa agllana can. Villachingapaj llujshina tandanajuita ñaupaman pushangapaj shuj anciano, shuj siervo ministerial o shuj huauqui na tiajpica ashtaca experienciata charij panitami superintendente de servicio huauquica agllaita ushan. (“Villachingapaj llujshina tandanajuipi shuj pani ñaupaman pushana cashpaca ¿imatata rurana can?” nishca recuadrotapash ricupangui.)

6. ¿Imamandata villachingapaj llujshina tandanajuita ñaupaman pushajcunaca aliguta prepararina can?

⁶ Bibliamanda Yachachingapaj Escuelapi, o Villachinata Yachajungapaj Tandanajuipi shuj asignacionda charishpaca ¿pita tandanajuiman rijushpara prepararinajunchiman? ¿Nachu asignacionda aliguta pactachingapaca pundatallata asignaciondaca aliguta prepararinchi? Shinallata, villachingapaj llujshina tandanajuita ñaupaman pushachun churajpica aligutami prepararina canchi. Asha minutocunatalla parana cashcamandacarin, aliguta yachachingapaj, chai tandanajuita tucuchina tiempopi tucuchingapami aliguta prepararina canchi. Ashtahuangarin, villachingapaj llujshina tandanajui nara callarijpillatami maipi villachigrinataca ali yachana canchi.

7. Villachingapaj llujshina tandanajuipica ¿imacunamandallata parlai ushapanchi? (Página 6pi recuadrotapash ricupangui.)

⁷ ¿Imacunamandata parlashun? Congregacionguna shuj shuj cashcata ricushpami aliguta cazushpa aliguta yarishpa sirvij esclavoca villachingapaj llujshina tandanajuipi imata ninataca na shuj bosquejopi churashca. Imacunamandalla parlai ushashcata yachangapaca “Villachingapaj llujshina tandanajuipica ¿imacunamandallata parlai ushanchi?” nishca recuadrota ricupangui. Chai tandanajuipica shujcunata comentachinallami can. Huaquinbica shuj demostracionda ruranallami can o villachingapaj maijan video ayudajta ricushpami jw.org direccionbi videota ricuchinalla can. Villachingapaj llujshinajuj huauquipanicunata imashinata animanata, aliguta villachichun ima yuyaicuna ayudanata pensarishpami chai tandanajuita ñaupaman pushaj huauquicunaca aliguta prepararina can.

Villachingapaj llujshinajuj huauquipanicunata imashinata animanata, aliguta villachichun ima yuyaicuna ayudanata pensarishpami grupota llujchij huauquicunaca aliguta prepararina can

8. Sabadota, domingota villachingapaj llujshina tandanajuipica ¿imacunatata yarichi ushapanchi?

⁸ Sábado punllataca ashtacacunami Villajun revistahuan villachingapaj llujshin. Huaquingunaca chaupi semanapi na llujshi ushashpa, sabadota villachingapaj llujshishpami Familiahuan Adorana Tutapi repasashca presentaciondaca ñana yari ushan. Chaimandami grupota llujchij huauquica Diosmanda Villashunchi último hojapi presentaciongunata yarichita ushan. Shinallata, chai llactapi imapash pasashcajpi, imapash fiesta tiajpica chaicunamanda ashaguta parlashpa revistacunata imashina saquinatami parlai ushan. Revistacunata chasquijpi cutin shuj punlla tigrangapaj imata ninatapashmi parlai ushan. Ashtahuangarin, villachingapaj llujshijcunapurapi pipash chai quilla revistacunahuan ña villachijushca cajpica chai revistata saquingapaj imata nina ali cashcata o imapash ali experienciata parlapai ninallami can. Domingocunatapash cai yuyaicunatallata catishpami chai quillapi saquina publicaciongunamanda grupota llujchij huauquica parlaita ushan. Villachingapaj llujshina tandanajuicunapica Diosmanda ali villaigucuna folletota, Diosta uyashunchi folletota, Enseña librota imashina saquinatapash parlanallami can. Bibliata yachachi callaringapaca ima punllapash chai publicaciongunataca saquinallami canchi.

9. Invitación hojacunata, tratadocunata saquingapaj campaña tiajpica ¿imatata sabadota villachingapaj llujshina tandanajuipica yachachita ushan?

⁹ Invitación hojacunata, tratadocunata saquingapaj campaña tiajpica ¿imatata sabadota villachingapaj llujshina tandanajuipica yachachita ushan? Revistacunandi invitaciongunata, tratadocunata imashina saquinata o pipash ashtahuan yachangapaj munajpi imata ruranatami parlai ushan. Shinallata campaña punllacunapi villachina ali cashcata yarichingapaca experienciacunatapash parlanallami can.

10, 11. ¿Imamandata publicadorcunaca villachingapaj llujshina tandanajuimanga aliguta prepararishpa rina can?

¹⁰ Publicadorcunaca ¿imashinata prepararina can? Villachingapaj llujshina tandanajuipi tucuicuna animaringapaca grupoman nara rishpallatami aliguta prepararina can. Shinami ali comentariocunata cuita ushanga. Villachingapaj minishtina publicaciongunatapash tandanajui nara callarijpillatami ña charijuna canchi. Shinami uchalla villachingapaj ri ushashun.

¹¹ Villachingapaj llujshina tandanajuimanbash uchallami chayana canchi. Jipayashpaca ali atindishpa tianajujcunatami estorbashun. Ashtahuangarin grupota llujchij huauquipa arreglocunatami huaglichishun. ¿Imamandata shina ninchi? Grupota llujchij huauquica, ashacunalla villachingapaj llujshishcata ricushpami nara villachi tucuchishca territorioman tucuillacunata tal vez cachanga. Cutin villachina territorio carupi cajpica, carrota na charij huauquicunatami carrota charij huauquicunahuan tal vez cachanga. Cutin peligroso pushtu cajpica huaquin huauquicunatami panicuna villachijuj ladollapi o paicunahuan villachichun cachanga. Maijanbash publicador ungushca cajpica planolla pushtucunapi o gradascunata na vitsana huasicunamanmi tal vez cachanga. Mushuj publicadorcuna tiajpica experienciata charij publicadorcunahuanmi villachichun cachanga. Shinaca jipayashca chayashpaca chai tucuilla arreglocunatami grupota llujchij huauquica cambiana tucunga. Huaquinbica tucuicunallatami imamandapash jipayashcanchi. Shinapash jipayana costumbreta charishpaca pensarinami capanchi ¿villachingapaj llujshina tandanajuita na alicachimanda o ñucallata imatapash na uchalla ruraimandachu jipayajuni? nishpa.

12. Siempre chai huauquihuanllata villachinata yachashpaca ¿imatata rurai ushapanchi?

¹² Publicadorcunaca ña parlarishcalla cashpaca pihuan villachinata nita ushanmi o pihuan villachichun churanatapash shuyanallami can. Shinapash siempre chai huauquihuanllata villachinata yachashpaca ¿nachu shuj huauquicunahuanbash villachinaca ali canman? (2 Cor. 6:11-13.) ¿Nachu huaquinbi huaquinbica mushuj publicadorhuan villachingapaj llujshishpa paita ayudaita ushanchiman? (1 Cor. 10:24; 1 Tim. 4:13, 15.) Villachingapaj llujshina tandanajuipi imata nijujta, maijan territorioman rinata nijujpica aligutami uyajuna canchi. Chai tandanajui jipaca, ama chai arreglocunata cambiashpa uchalla villachingapaj ripashunchi.

13. Tucuicunallata esforzarijpica ¿imashinata villachingapaj llujshina tandanajuicunaca ayudanga?

¹³ Jesuspa 70 catijcunaca aliguta organizashpa cachajpimi ‘ninanda cushijushpa Jesuspaman tigrarca’ (Luc. 10:17). Paicunaca Jesús paicunahuan tandanajushpa, aliguta yachachishpa cachajpimi shina cushijushpa tigrarianga. Cunan punllacunapipash villachingapaj llujshina tandanajuicunaca aliguta villachichunmi ayudan. Tucuicuna esforzarijpica chai tandanajuicunaca ‘tucui llactacunapi villachichunmi’ animanga, yachachinga, aliguta organizarishca cachunbash ayudanga (Mat. 24:14).

Villachingapaj llujshina tandanajuipi shuj pani ñaupaman pushana cashpaca ¿imatata rurana can?

Villachingapaj llujshina tandanajuipi shuj pani ñaupaman pushana tucujpica chai panica umata taparinami can, shinallata tiajunami can. Huauquicuna yachachina informacionmandallatami parlana can. Chai panica na yachichijunshnallachu ricurina can. Shinapash maijan tema ali canata ricushpami chai temamanda parlai callarina can. Bautizarishca panita oracionda rurapai nijpica chai panipash umata taparinami cana can. Ashtahuangarin, villachingapaj llujshina tandanajuipi ña parlajujpi shuj huauqui chayamujpica chai huauqui yachachishpa catichunmi panica saquina can. Ama pipash pingai tucushpa llaqui apanajuchunga superintendente de servicio huauquimi imata rurana instrucciongunataca cuna can. Huaquin ejemplocunata ricupashun. Shuj pani ñaupaman pushajushca horaspi bautizarishca chairalla viñajuj huambragu chayajpica ¿imatata rurana can? Ancianocunami ricuna can, chai huauquigu tandanajuita ñaupaman pushanata o na ñaupaman pushanatapash. Na ñaupaman pushai ushana cashpapash oracionda rurai ushana cajpica superintendente de serviciomi, ishcandiman villana can, panimi ñaupaman pushanga cutin huauquiguca oraciondami rurana can nishpa. Cutin huaquinbica, ancianocunaca alimi yachan, huaquin huauquicuna villachingapaj llujshina tandanajuita na ñaupaman pushanata, oracionda na ruranatapash. Shina cajpica anciano huauquicunaca ¿imatata rurana can? Grupota llujchigrijuj panimanmi villana can, chai huauqui chaipi cajpipash quiquinmi ñaupaman pushana capangui, quiquinllatami oraciondapash rurana capangui nishpa. Shinapash imamanda chai huauqui na ñaupaman pushana cashcataca panimanga na villanachu can. Shinallata ancianocunaca chai huauquimanbash villanami can, maijan punllacunapi panicuna grupota llujchinata.

Villachingapaj llujshina tandanajuipica ¿imacunamandata parlai ushanchi?

Diosmanda Villashunchi hojapi huaquin presentaciongunamanda.
Villachingapaj ali cana, jw.org direccionbi maijanbash videomanda.
Imashina ali parlai callarinamanda, cutin tigrangapaj imata ninamanda, publicaciongunata saquishpa contribuciongunamanda imata ninamanda.
Animarichuj ayudaj textocunamanda, villachinapi ayudaj textocunamanda.
Territoriopi villachijushpa ali experienciata charishcamanda o publicaciongunapi llujshishca ali experienciacunamanda.
Diosmanda Villashunchi hojapi llujshishca maijanbash ali yuyaimanda.
Villachinata Yachajungapaj Tandanajuipi chairalla yachajushca ali yuyaimanda.
Villajun revistapi villachinamanda parlajuj temamanda.
Benefíciese libropi “Ven, sé mi seguidor” libropi villachinamanda parlajuj temacunamanda.
Internetpi jw.org paginata imashina villachijushpa utilizanamanda.
Introducción a la Palabra de Dios folletomanda.
Taita Diospi na crijcunahuan, evolucionbi crijcunahuan, hindú, budista o shuj religionda charijcunahuan imashina parlai callarinamanda.
Na uyangapaj munajpi imata ninamanda.
Cumbacuna ashtahuan aliguta villachichun imashina ayudanamanda.
Shuj shimita parlajcunahuan tuparishpa imata ruranamanda.
Shuj shimita parlajcunata imashina mascanamanda, telefonopi, predicación publicapi imashina villachinamanda, revisitacunata imashina ruranamanda, Bibliata imashina yachachinamanda.
Peligroso pushtucunapi imashina cuidarinamanda, ñucanchipilla na pensarinamanda, ali portarinamanda o imacunamandapash.