Imata crishcata catishpa causapashunchi

1. ¿Imamandata apóstol Pabloca cushilla sintirirca?

APÓSTOL PABLOCA huañuchi tucunata yachashpapash, paipa causaipi imacunatalla rurashcata yuyarishpami cushilla sintirirca. Chaimandami “carreratapash ñami calpashpa tucuchishcani. Imata crishcatapash na saquishcanichu” nirca (2 Tim. 4:​6-8). Apóstol Pablo cristiano tucushpaca ali decisiongunatami agllarca. Chaimi Jehová Dios paihuan cushilla cashcataca seguro carca. Ñucanchicunapashmi apóstol Pabloshna ali decisiongunata agllashpa Jehová Diosta cushichingapaj munapanchi. Chaipaca ¿imatata rurana capanchi?

2. Imata crishcata catishpa causajcunaca ¿imatata ruran?

² Apóstol Pabloca paimanda y shuj cristianocunamanda parlashpaca “imata crishcata catishpami causapanchi. Y na ñucanchi ñavi imata ricushcatalla catishpaca causapanchichu” nircami (2 Cor. 5:7). Ñavi imata ricushcatalla catishpa causajcunaca imata ricushcatalla, uyashcatalla o sintishcatalla catishpami imapash decisiongunataca agllan. Cutin imata crishcata catishpa causajcunaca Jehová Dios munashcashnami imapash decisiongunataca agllan. Paicunapa decisiongunahuanga Jehová Dios bendicianata seguro cashcata y Jehová Diosta cazuna paicunapallata ali cashcatami ricuchin (Sal. 119:66; Heb. 11:6).

3. Imata crishcata catishpaca ¿imashinata beneficiaripanchi? (2 Corintios 4:18).

³ Huaquinbica imatapash ricushpalla, uyashpalla o sintishpallami imapash decisiongunataca agllapanchi. Pero solo ricushpalla, uyashpalla o sintishpalla importante decisiongunata japishpaca, ñucanchicunallatami llaquipi urmashun. ¿Imamandata shina nipanchi? Ñucanchi ñavi, rinri y shunguca huaquinbica pandachinllami. Shinallata ñucanchi ñavi imata ricushcatalla catishpaca, Jehová Diospa voluntadta y paipa consejocunataca talvez na pactachishunllu (Ecl. 11:9; Mat. 24:​37-39). Cutin imata crishcata catishpaca ‘Taita Diospa ñaupapi ali caj’ decisiongunatami agllapashun (Efes. 5:10). Jehová Diospa consejocunata cazushpaca ñucanchillatami tranquilo, cushilla sintiripashun (Sal. 16:​8, 9; Is. 48:​17, 18). Shinallata para siempre causaitapashmi ushapashun (2 Corintios 4:18​ta liipangui).

4. Imata crishcata catishpa causajushcata o ñavi ricushcatalla catishpa causajushcataca ¿imashinata yachai ushapanchi?

⁴ Imata crishcata catishpa causajushcata o ñucanchi ñavi imata ricushcatalla catishpa causajushcata yachangapaca cai tapuicunapimi pensarita ushapanchi: Imatapash decidigrijushpaca ¿Jehovapi y paipa consejocunapi confiashpachu decidini? o ¿imatapash ricushpallachu decidini? nishpa. Cai temapica trabajota agllagrijushpa, pihuan cazaranata agllagrijushpa y Jehovapa organizacionba instrucciongunata catigrijushpa imashina imata crishcata catishpa causajushcatami yachajupashun.

TRABAJOTA AGLLAGRIJUSHPA

5. Shuj trabajota agllagrijushpaca ¿mashnata ganagrijushcatallachu yaipi charina capanchi?

⁵ Tucuicunallatami ñucanchillata y ñucanchi familiata mantiningapaca shuj trabajota minishtipanchi (Ecl. 7:12; 1 Tim. 5:8). Huaquingunaca trabajopi yapalla ganajuimandami familiata mantinitapash y culquita ahorraitapash ushan. Cutin shujcunaca trabajopi asha culquitalla ganajuimandami familiapa minishtirishca cosascunata randingapalla pactachin. Chaimi shuj trabajota agllagrijushpaca, mashnata ganagrijushcataca yaipi charina capanchi. Pero si solo mashnata ganagrijushcapilla pensarinajushpaca, ñavi imata ricushcatalla catishpa causanajushcatami ricuchinajupanchiman.

6. Shuj trabajota agllagrijushpaca ¿imashinata imata crishcata catishpa causanajushcataca ricuchipanchi? (Hebreos 13:5).

⁶ Imata crishcata catishpa causangapaca, siempremi Jehová Diostaca yaipi charina capanchi. Por ejemplo, trabajota agllagrijushpaca cashnami pensarita ushapanchi: “¿Cai trabajopica Jehová Dios millanayachishca cosascunatachu ruragrijuni? ¿Ashtaca tiempotachu ñuca familiatalla saquishpa rigrijuni? ¿Predicacionman, reuniongunaman ritapash ushagrinichu?” nishpa (Prov. 6:​16-19; Filip. 1:10). Aunque trabajota tarina difícil cajpipash chai trabajo imapipash afectagrijujpica, mejor chai trabajotaca na aceptashpami ali canman. Imata crishcata catishpa causajcunaca, imata decidishpapash Jehová Diospi tucui shunguhuan confiashcatami ricuchin (Mat. 6:33; Hebreos 13:5​ta liipangui).

7, 8. Javier huauquiguca, imata crishcata catishpa causajushcataca ¿imashinata ricuchirca? (Fotota ricupangui).

⁷ Sudamérica llactamanda Javiera huauquiguca, imata crishcata catishpa causana importante cashcataca yaipimi charirca. Javierca precursor cangapami munarca. Paica ninmi: “Trabajopica dobleta ganangapaj shuj oportunidadmi tiarca. Chaimi gerentehuan parlagrina carcani. Pero gerentehuan nara parlashpallatami, Jehová Diosta mañarcani. Shuj ali trabajota munashpapash, precursor cachun na saquina cajpica chai trabajotaca na aceptagrijurcanichu” ninmi.

⁸ Shinallata Javierca ninmi: “Gerenteca horas extracunatapashmi trabajana cangui nihuarca. Chaimi paimanga ñuca reuniongunamanda, predicacionmandaca horas extracunataca na trabajai ushapashachu nishpa aliguman explicarcani”. Javierca chai trabajota na aceptashpami ishcai semana jipaca precursor tucurca. Shinallata chai huatallatami shuj trabajo de medio tiempotapash tarirca. Javierca ninmi: “Jehová Diosca ñuca oraciondaca uyarcami. Chaimi precursor caita ushachun shuj ali trabajota tarichun ayudahuarca. Medio tiempota trabajajushcamandami, Jehová Diosta ashtahuan sirvita y huauquipanihuan ashtahuan tiempota yalitapash ushapashcani. Chaimi ninanda cushijupani” nin.

9. Trésor huauquipa ejemplomandaca ¿imatata yachajupangui?

⁹ Ñucanchi charishca trabajo, imata crishcata catishpa causachun na ayudajushcata cuenta japishpaca ¿imatata rurai ushapanchi? Congo llactamanda Trésor huauquipa ejemplota ricupashun. Paica ninmi: “Ñuca gushtashca trabajotami charircani. Ashtacatami ganajurcani y gentecunapashmi ñucataca respetahuan carca” nin. Shinapash Tresorca horas extracunata trabajajuimandami tandanajuicunamanbash seguido faltajurca. Shinallata, chai empresapa ruraicunata pacashpa llullachunbashmi atichin carca. Tresorca trabajota saquingapaj munashpapash trabajo illa quidanatami manllajurca. ¿Imata chai huauquigutaca ayudarca? Paica ninmi: “Trabajo illa quidanata manllajushpapash Habacuc 3:​17-19​pi shimicunata yuyarishpami Jehová Dios cuidanataca seguro carcani. Chaimi chai trabajotaca saquircani. Ashtaca jefecunaca, ali pagajpica trabajadorcunaca familiatapash, paicunapa tandanajuicunatapash saquingalla yanmi. Jehová Diospa ñaupapi ali ricuringapaj y familiahuan ashtahuan tiempota yalingapaj ñuca trabajota saquishcamandaca ninandami cushijupani. Shuj huata jipami Jehová Diosca shuj ali trabajota tarichun ayudahuarca. Chai trabajohuanmi ñuca familiata mantinita y Jehová Diosta ashtahuan sirvitapash ushapashcani. Jehová Diosta en primer lugar churaimandaca, talvez ashalla culquigutami charipashun. Pero Jehová Diosca siempremi ñucanchicuna imata minishtijushcataca caranga” ninmi. Jehová Diospa consejocunapi y paipa promesacunapi confiashpaca imata crishcata catishpa causajushcatami ricuchipashun. Shina causajpimi Jehová Diosca bendicianga.

PIHUAN CAZARANATA AGLLAGRIJUSHPA

10. Cazarangapaj munajcunaca ¿imashinata ñavi ricushcatalla catinajunman?

¹⁰ Cazaranataca Jehová Diosmi churarca. Chaimi cazarana munaita charinaca normal can. Cazarangapaj munaj huaquin panigucunacab huauquigucuna imashina cajta, imashina portarijta, culquita imashina gashtajta, familiata imashina cuidajtami ricun. Shinallata ali o nali cajta y pai cushilla cachun chai huauquigu paimanda imatalla rurajtapashmi ricun. Chai cosascunata ricunaca importantemi can. Pero solo chai cosascunatalla ricushpaca, ñavi imata ricushcatallami catijunman.

11. Cazarangapaj munajcunaca ¿ima consejocunatallata catin? (1 Corintios 7:39).

¹¹ Jehová Diospa consejocunata yaipi charishpa pihuan cazaranata decidij huauquipanicunamandaca Jehová Diosca orgullosomi sintirin. Cazarangapaj munajcunaca ¿ima consejocunatallata catin? Cazarangapaj munajcunaca ‘na yapa jovenllu cana canguichi’ o ‘flor de la juventud’ nishcata yalishcacunami cana canguichi nishca consejotami cazun (1 Cor. 7:​36, notatapash ricupangui). Shinallata Jehová Diospa consejocunata catishpami, Jehová Dios gushtashca cualidadcunata charij cusata o huarmita mascan (Prov. 31:​10-13, 26-28; Efes. 5:33; 1 Tim. 5:8). Shinallata na Testigo jari o huarmi molestajpica “Cristopa discipulohuanllami cazarana” canguichi nishca consejotapashmi cazun (1 Corintios 7:39​ta liipangui). Paicuna cushilla cachun Jehová Dios ayudanata seguro caimandami chai consejocunataca cazun (Sal. 55:22).

12. Rosa panigupa ejemplomandaca ¿imatata yachajupanchi?

¹² Colombia llactamanda Rosa panigupa ejemplota ricupashun. Paica precursorami can. Paipa trabajopica na Testigo jaritami rijsirca. Rosa paniguca ninmi: “Paica ali alimi carca. Gentecunatapash ayudaj, viciocunatapash na charij jarimi carca. Ñucatapash alimi tratahuan carca. Ñuca gushtashca cualidadcunatapashmi charirca. Pero na Testigochu carca. Paita rechazanaca dificilpachami carca. Shinallata chai tiempopica solallami sintirijuimandami, cazarangapaj munajurcani. Pero nara shuj turigutaca rijsircanichu” ninmi. Shinapash Rosaca ñavi ricushcatallaca na catircachu. Paipaca Jehová Diospa amiga canami ashtahuan importante carca. Chaimandami chai jarihuan parlanata saquishpa Jehová Diosta ashtahuan sirvinapi ocupada yalirca. Asha tiempo jipallami Rosataca Escuela para Evangelizadores del Reinoman invitarca y cunanga precursora especialmi can. Rosaca ninmi:“Jehová Diosca ninandami bendiciahuashca. Chaimi ñuca shungupica cushillapacha sintiripani” ninmi. Ñucanchi shungu imata munajushca na catishpa Jehová Diospa munaita ruranaca huaquinbica dificilmi can. Pero Jehová Diospa consejocunata catinaca ñucanchipallatami ali can.

JEHOVAPA ORGANIZACIONBA INSTRUCCIONGUNATA CATIGRIJUSHPA

13. Jehovapa organizacionba instrucciongunataca ¿imashinata huaquingunaca ricui callarin?

¹³ Jehová Diosta aliguta sirvichunmi ñucanchicunamanga Jehová Diospa organizacionga ancianocunata, superintendente de circuitocunata, sucursalpi sirvinajuj huauquicunata o Cuerpo Gobernantepi sirvinajuj huauquicunata utilizashpa instrucciongunataca cun. Pero huaquinbica chai instrucciongunata imamanda cujta na intindishpami huaquingunaca chai instrucciongunaca nalichu can nishpa pensarin. Shinallata chai instrucciongunata cushca huauquicunapa pandarishcacunatarami ricui callarin. Pero chaita rurashpaca ñavi imata ricushcatalla catishpa causanajushcatami ricuchin.

14. Imata crishcata catishpa causajcunaca ¿imatata seguro can? (Hebreos 13:17).

¹⁴ Imata crishcata catishpa causajcunaca Jehová Dios paipa organizacionda ñaupaman pushajushcataca seguromi can. Shinallata paicuna ima pasajujta Jehová Dios ricujujtapash seguromi can. Chaimandami imapash instrucciongunata cujpica uchalla y aliguman cazun (Hebreos 13:17​ta liipangui). Cazushpaca congregacionbi tucuicuna shujllashna cachunmi ayudan (Efes. 4:​2, 3). Shinallata aunque imperfecto huauquicuna instrucciongunata cujpipash, chai instrucciongunata cazujpi Jehová Dios bendicianataca seguromi can (1 Sam 15:22). Imatapash corregina cajpica Jehová Diosca pai agllashca tiempopimi correginga (Miq. 7:7).

15, 16. Imata crishcata catishpa causachunga ¿imata Kevindaca ayudarca? (Fotota ricupangui).

¹⁵ Imata crishcata catishpa causanaca alipachami can. Perú llactapi ima pasashcata ricupashun. Perú llactapica español shimita parlashpapash quechua shimita parlaj ashtaca runa gentecunami tian. Quechua shimita parlaj huauquipanicunaca ashtaca huatacunatami paicunapa territoriopica quechua shimita parlaj gentecunata mascan carca. Pero chai llactapa leycuna cambiashcamandami chashna predicaitaca ñana usharca (Rom. 13:1). Chaimi huauquipanicunaca quechua shimita parlaj gentecunataca ¿imashinashi tarishun? nishpa pensarinajurca. Shinapash mushuj instrucciongunata catinajushcamandami Jehová Diosca paicunapa esfuerzocunata bendiciajushcata cuenta japirca.

¹⁶ Kevinga quechua shimita parlaj congregacionbimi anciano can. Callaripica mushuj instruccionga na alichu can yashpami pensarijurca. Paica ninmi: “Quechua shimita parlaj runa gentecunata taringapaca ¿imatashi rurashun? nishpami pensarijurcani. Pero Proverbios 3:5pa shimicunapimi pensarircani. Shinallata Moisespa ejemplopipashmi pensarircani. Jehová Diosca Moisestaca israelitacunata Egipto llactamanda llujchishpa Mar Rojoman apachunmi mandarca. Mar Rojoman chayajpica egipciocunamanda na salvari ushanashnami ricurijurca. Shina cajpipash Jehová Diostami cazurca. Cazushcamandami Moisesca Jehová Dios shuj jatun milagrota rurajta ricurca” ninmi (Éx. 14:​1, 2, 9-11, 21, 22). Kevinga mushuj instrucciongunata catina alipacha cashcatami ricurca. Paica ninmi: “Jehová Diosca ninandami ñucanchitaca bendiciarca. Pundaca ashtacata purishpami quechuata parlaj gentecunataca tarin carcanchi. Huaquinbicarin shuj o ishcai gentecunatallami tarin carcanchi. Pero cunanga runa gentecunahuanga parlaitapash, ashtaca revisitacunata ruraitapash y ashtaca gentecunaman Bibliata yachachitapashmi ushapashcanchi. Tandanajuicunamanbash ashtaca gentecunami rinajun” ninmi. Shinaca imata crishcata catishpa causajpica Jehová Diosca siempremi bendicianga.

17. Cai temapica ¿imatata yachajupashcanchi?

¹⁷ Imashinami cai temapi yachajupashcanchi, trabajota agllagrijushpa o pihuan cazaranata agllagrijushpa y Jehovapa organizacionba instrucciongunata catigrijushpaca, imata crishcata catishpa causajushcatami ricuchina capanchi. Shinallata educacionbi, diversiongunapi y huahuacunata imashina viñachinapipashmi imata crishcata catishpa causajushcataca ricuchina capanchi. Imapash decisionda agllagrijushpaca na solo ñavi ricushcapillachu confiana capanchi. Sino Jehová Dioshuan ali amigo cashpa catinapi, paipa consejocunapi y paipa promesacunapimi ashtahuanga confiana capanchi. Shinami ‘ñucanchita Mandaj Taita Diostaca causaita causaicaman cazushpa purinajushun’ (Miq. 4:5).