SIEMPRE CHAPARIANSHNA CAUSASHUNCHI

Tauca millón gentecunami Ucraniamandaca pacajushpa llujshinajun

24 de febrero de 2022tami Rusia llactamanda ejercitoca Ucrania llactata atacarca. Chaimandami ashtaca millón gentecunaca peligropi caimandaca Ucrania llactamanda uchalla llujshingapaj munanajun.a

Ucrania llactamanda Nataliaca ninmi: “Tauca bombacunami tujyanajurca. Ninandami manllanayajurca. Manllaimanda imashina sintirishcataca parlaitapash na ushapanichu. Gentecunata trengunapi llujchinajujta yachashpaca ñucanchipashmi ringapaj munarcanchi. Tucuita saquishpami cada uno shuj uchilla mochilagutalla apana carcanchi. Solo documentocunata, pastillacunata, yacuta y asha micunagutallami apashpa rircanchi. Bombacuna tujyanajujpillatami tucuita saquishpa tren paradaman rircanchi”.

Ucrania llactamanda Nadiaca ninmi: “Ultimocamanmi guerra tianataca na crinajurcanchi. Shuj shuj ladocunapi bombacuna tujyajujtami uyarcani, ventanacunapash tsilinllami shinllita huacanajurca. Minishtirishca cosasgucunatalla japishpami huasimandaca 8 de la mañanata llujshircani. Chai jipami Lviv llactaman ringapaj trenda japircani y chaimandaca buspimi Polonia llactaman rircani”.

Cai temapica cai tapuicunatami yachajupashun:

¿Imamandata ashtaca gentecunaca pacajushpa rina tucun?

Ciertomi can, Rusia llactamanda militarcuna atacajpimi, Ucrania llactapica ashtaca problemacuna tian. Pero Bibliapimi chai problemacuna imamandapacha tiajtaca villajun.

Gobiernocunaca gentecunata ayudangapaj munashpapash fracasashcami. Gentecunata ayudanapa randica cai gobiernocunaca llaquichitarami llaquichishca (Eclesiastés 4:1; 8:9).
‘Cai mundota mandajuj’ Diablomi gentecunamanga nalicunata yachachijun. Chaimandami Bibliapica nin: “Cai mundo enterotaca Diablomi mandajun” (Juan 14:30; 1 Juan 5:19).
Cai mundopica ña ashtaca huatacunatami problemacuna tiashca. Pero Bibliapi nishca shinaca último punllacunapimi causanajunchi. 2 Timoteo 3:1pica ninmi: “Último punllacunapica shinlli, na aguantai ushanalla tiempocunami chayamunga”. Ashtahuangarin cai último punllacunapica guerracuna, terremotocuna, acapanacuna, yarjai tiempocuna y pandemiacunami tiana carca. Shina pasajpimi gentecunaca paicunapa huasicunata saquishpa pacajushpa rina tucushca (Lucas 21:10, 11).

Pacajushpa rinajuj gentecunaca ¿imashinata ali sintirita ushan?

Bibliapi nishca shinaca Tucuita Ruraj Jehová Diosca pacajushpa rishca gentecunata ayudangapami munan. Porque paicunataca Jehováb Diosca ninandami llaquin (Deuteronomio 10:18). Jehová Diosca pacajushpa rishca gentecunapa problemacunata solucionanatami prometishca. Pero ¿imashinashi chaitaca ruranga? Chaipaca jahua cielopi paipa Gobiernotami utilizanga. Y paipa Gobiernomi cai alpapi gobiernocunataca tucuillata tucuchinga (Daniel 2:44; Mateo 6:10). Shinallata paipa Gobiernota utilizashpami Jehová Diosca Diablotapash tucuchinga (Romanos 16:20). Jehová Diospa Gobierno alpa enterota mandajujpica, ñana shuj shuj llactacunapa fronteracunaca tiangachu y llactapurapash ñana macanajungachu. Paicunapa huasimandapash nipipash ñana pacajushpa llujshingachu. Porque Bibliapi nishcashnaca tucuicunami paicunapa propio ‘uvas yura ucupi, jigos yura ucupi tiarishpa samanajunga. Chaipica, pipash na manllachingachu. Caitaca, tucuita Mandaj Diosllatami villarca’ (Miqueas 4:4).

Solo Taita Diospa Gobiernollami cunanbi pacajushpa rinajuj gentecunapa problemacunataca para siempre solucionaita ushan. Jehová Diosca paipa Gobiernota utilizashpami cai problemacunata tucuchinga:

Guerracuna. Jehová Diosca ‘jatun macanajuicuna tiajtapashmi saquichinga’ (Salmo 46:9). Guerracunata Taita Dios imashina tucuchinata yachangapaca “¿Cómo llegará a haber paz en la Tierra?” nishca temata liipangui.
Ninanda llaquichi tucuna. Jehová Diosmi ‘llaquichi tucunamandapash llujchinga’ (Salmo 72:14). Gentecuna imashina cambiai ushajta yachangapaca “Tucuicunata juyashpa tratapashun” nishca temata liipangui.
Pobreza. Jehová Diosmi ‘imagupash illajcuna caparishpa mañajpica, cacharichinga’ (Salmo 72:12). Pobreza ña ama tiachun Taita Dios imata ruranata yachangapaca “Pobrella causaica ¿ima horapash tucuringacha?” nishca temata liipangui.
Yarjai tiempocuna. ‘Urcu umacunapipash granocunaca tiangami’ (Salmo 72:16). Ama pipash yarjai pasachun Taita Dios imata ruranata yachangapaca “Un mundo sin hambre” nishca temata liipangui.

Bibliaca pacajushpa rinajuj gentecunataca ¿ayudaita ushanllu?

Ari, pacajushpa rinajuj gentecunataca ayudaita ushanmi. Shamuj punllacunapi ali causaigu tianata villashca jahuapash, cunanbi problemacunatapash aguantachun consejocunata cushpami Bibliaca ayudan.

Bibliapica ninmi: “Na yachajushca runaca, imata nijpipash tucuita crinllami”. Pero ‘ali yachajushca runaca, imata rurangapajpash aligutami’ pensarin (Proverbios 14:15).

Caitami yachachijun: Ima peligrocuna tianata y chai peligrocunamanda imashina cuidarinatami aliguta pensarina capangui. Shuacunamandaca cuidarinami capangui. Paicunaca mushuj shamujcunatami shuangapaj munan. Manllanajujta y na rijsishca llactapi purinajujtaca ñapashmi cuenta japishpa aprovecharin.

Bibliapica ninmi: “Ñucanchi charishca micunahuanlla y charishca ropaguhuanlla contento capashunchi” (1 Timoteo 6:8).

Caitami yachachijun: Cosascunamandaca na yapata preocuparijunachu capangui. Minishtirishca cosascunahuanlla contento cashpami cushilla caita ushapangui.

Bibliapica ninmi: “Imatami cangunamanda rurachun munanguichiman, chaitallatami shujcunamandapash rurana canguichi” (Mateo 7:12).

Caitami yachachijun: Amable y tranquilomi cana capangui. Shina cajpimi shuj gentecunaca quiquinda respetanga y aliguman chasquinga.

Bibliapica ninmi: “Pipash cangunata nalita rurajpica, na chashnallata tigrachinachu capanguichi” (Romanos 12:17).

Caitami yachachijun: Pipash nali tratajpica, quiquinbash na shinallata tratanachu capangui. Porque si quiquinbash shinallata tratanguica ashtahuan problemacunatami charingui.

Bibliapica ninmi: “Taita Dios poderta cujpimi, ñucaca tucui cosascunata mishangapaj fuerzata charipani” (Filipenses 4:13).

Caitami yachachijun: Taita Diosmi quiquinba causaipica ashtahuan importante cana can. Paita mañashpaca aguantangapaj fuerzata carahuai nishpami mañana cangui. Shina mañajpica Jehová Diosca ayudangami.

Bibliapica ninmi: “Na imamandapash yapata pinarijunachu capanguichi. Chaipa randica, tucuipimi Taita Diosta mañashpa, rogashpa, pagui nishpa quiquingunapa preocupaciongunataca Taita Diosman villana capanguichi. Chaimi Taita Diosca gentecuna na intindi ushanalla tranquilo, ali canata quiquingunamanga caranga. Shinami Taita Diosca Cristo Jesusmanda quiquingunapa shunguta y quiquingunapa pensamientocunatapash cuidariajunga” (Filipenses 4:6, 7).

Caitami yachachijun: Ima problemata charishpapash Taita Diostaca ñucapa shunguta y ñucapa pensamientocunataca cuidariapangui nishpami mañana capangui. “Filipenses 4:6, 7 | ‘No se inquieten por nada’” nishca temata ricupangui.

a Ucraniata atacashca shuj punlla jipami Alto Comisionado de las Naciones Unidas para los Refugiados (ACNUR) nishcaca, Ucrania llactaca shuj jatun emergenciapimi can nircami. Solo 12 punllacunapillami más de 2 millón gentecunaca Ucrania llactamanda pacajushpa llujshirca. Cutin shuj millón gentecunaca chai llactapillatami shuj ladocunaman rishca.

b Jehová shutica Taita Diospa shutimi can (Salmo 83:18). “¿Pita can Jehová?” nishca temata ricupangui.