Halloweenda ruranaca ¿imashinata tiai callarirca?

Bibliapica caitami yachachin

Bibliapica Halloween fiestamandaca na parlanllu. Halloween fiestataca noche de brujas nishpapashmi rijsin. Chai fiestataca 31 de octubretami ruran. Bibliapa yachachishcacunahuan ricujpica Halloween fiestapa ruraicunaca nalichu can.

Cai temapica caicunatami yachajupashun

• Halloweenmanda parlocuna y costumbrecuna

• ¿Halloween imashna callarishcata yachanaca minishtirinllu?

• Halloweenga ¿imashnata callarirca?

Halloweenmanda parlocuna y costumbrecuna

• Samhain nishca: Mito Celta libropi nishcashnaca “Gentecunaca 2 mil huatacuna huashamanga Samhain fiesta punllapica jahua cielomanda espiritucuna cai alpata visitai ushashcata. Shinallata causaj gentecuna huañushcacunata visitai ushashcatami criin carca” ninmi. Shinallata chai libropica “Samhain fiesta punllataca todaviami ruran shinapash cunanbica chai punllataca Día de los difuntos o Halloween nishpami rijsin” (“Halloweenga ¿imashinata callarirca?” nishca recuadrota ricupangui).

• Disfrasarishpa huasin huasin caramelocunata mañashpa shinallata caramelocunata na carajpi imatapash rurasha nishpa manllachina: Shuj libropica cai alpaman shamushca jahua cielomanda espiritucuna ama imatapash rurachun nishpami celta gentecunaca “alalailla disfrascunata” churajun cashca. Shinallata ama imatapash rurachun nishpami chai espiritucunamanga mishqui cosascunata caran cashca.a

  

  Europa llacta iglesia Catolicapi sacerdotecunaca nali ruraicunatami rurai callarirca. Chaimi iglesiapi catijcunataca disfrasarishpa huasin huasin rishpa rezashpa rezashcamanda regalocunata mañachun nishpami cachan cashca.

• Fantasma, bruja nishcacuna: Fantasmacunata, brujacunataca nali espiritucuna nishpami rijsin. Obra Halloween Trivia nishcaca cai “espiritucunaca monstrocuna” cuenta can ninmi. Shinallata “huañuihuan, difuntocunahuan, huañuita manllaihuanbashmi ricunata charin” ninmi.

• Hallowenba calabaza nishca: Gran Bretaña llactamanda gentecunaca “micunata mañashpami huasin huasin rin cashca chaipa cuentaca almacunamandami rezan cashca”. “Nabosta utucushpa chai ucupi espelmata churashpaca alma purgatoriopi cashcatashna ricuchingapaj munashpami chashna ruran cashca” (Halloween—From Pagan Ritual to Party Night). Huaquingunaca chai farolcunataca nali espiritucunata manllachingapaj nishpami utilizan cashca nin. 1800 huatamandapachami America del Nortepica nabospa randica calabaza nishcata utilizai callarirca.

¿Halloween imashna callarishcata yachanaca minishtirinllu?

Ari. Huaquin gentecunaca cushilla yalingapallami Halloween fiestataca ruranchi nin. Shinapash chai fiestapa ruraicunaca Bibliapa yachachishcacunahuan ricujpica nalipachami can. Halloweenga huañushcacunapa panda crishcacunahuan, nali espiritucunahuan, demoniocunahuanmi ricunata charin.

Halloween nishca fiestapa ruraicunamanda Taita Dios imata yuyashcataca cai cati versocunapimi ricuchijun:

• “Canguna purapica, ayacunata mañaj canata, huañushcacunata tapuj canata yachajuj runapash na tianachu” (Deuteronomio 18:10-12).

  ¿Imatata ningapaj munan?: Taita Diosca huañushcacunahuan parlachunga na munanllu. Ni siquiera huañushcacunahuan parlangapaj munani nishpa pensachunllapash na munanllu.

• “Huañushcacunaca, imatapash na yachanllu” (Eclesiastés 9:5).

  ¿Imatata ningapaj munan?: Huañushcacunaca imatapash na yachaimandami causa gentecunahuanga na parlaita ushan.

• “Demoniocunahuanga imata ricunata charichunbash na munapanichu. Jehová Diospa copamandapash, demoniocunapa copamandapash na ufianachu capanguichi” (1 Corintios 10:20, 21).

  ¿Imatata ningapaj munan?: Taita Diospa amigo cangapaj munashpaca demoniocunahuan ricunata charij cosascunata na ruranachu capanchi.

• “Macanajuchun Taita Dios cushca armadurataca completotami churajuna capanguichi. Porque ñucanchi macanajuica na gentecunahuanllu can. Sino jahua cielopi caj demoniocunahuanmi macanajunajunchi” (Efesios 6:11, 12).

  ¿Imatata ningapaj munan?: Jesusta catijcunaca demoniocunahuan ricunata charij cosascunapica na chapurinachu canchi.