Jesusca ñami Mesías can

Juanga cashnami villachijushca carca: “Ñucapa jipa shamujca ñucata yali ashtahuan podertami charin” nishpa. Casi 30 huatacunata charishpami Jesusca Galilea llactamanda Jordán yacuman rirca. Chaipimi Juanga gentecunata bautizajurca. Jesuspashmi Juan paita bautizachun munarca. Chaimi Juanga cashna nirca: “Quiquinmi ñucataca bautizana cahuangui. Shinapash ¿quiquinrachu ñucapaman shamujupangui?” nirca. Shina nijpimi Jesusca: “Cai viajeca chashna rurapashunlla. Shina rurashpami Taita Dios munashcashna tucuita pactachinajushun” nirca. Chaimi Jordán yacuman yaicushpa Juanga Jesusta cuerpo enterota yacupi pambarca.

Jesusca yacumanda llujshishca jipallami Jehová Diosta mañarca. Chai ratomi, jahua cieloca pascarirca. Chaipimi Juanga Taita Diospa espíritu santotaca shuj palomagushna Jesuspa uma jahuaman shamujujta ricurca. Chaimi Jehová Diosca jahua cielomanda Jesustaca cashna nirca: “Canmi ñuca juyashca Churigu cangui. Canmandami ninanda cushijuni” nirca.

Chaimi Jesusca Jehová Diospa espíritu santota chasquishpa, Cristo o Mesías tucurca. Shinami Jesusca Jehovapa voluntadta cai alpapi pactachi callarigrijurca.

Jesusca bautizarishca jipallami desiertoman rishpa, 40 punllacunata chaipi yalirca. Chai jipaca Juanda ricungapami rirca. Jesús paipaman shamujujta ricushpami Juanga nirca: “Gentecunapa pecadota anchuchij Taita Diospa Maltun Llamaguta ricupaichi” nirca. Jesús Mesías cashcata gentecuna cuenta japichunmi shina nirca. Desiertopi Jesushuan ¿ima pasashcata yachapanguichu? Chaitaca shamuj capitulopimi yachajushun.