Pabloca shuj shuj llactacunapimi villachirca

Jesús mandashcashnami, apostolcunaca Diosmanda ali villaicunata tucui gentecunaman villachina cashcata ali pactachinajurca. Huata 47​pica Antioquía llactamanda huauquicunaca Pablota y Bernabetapash shuj llactacunapi villachichunmi cacharca. Paicunaca cushijushpami Asia Menor, Derbe, Listra, Iconio shuti llactacunaman rishpa villachinajurca.

Pablopash, Bernabepash tucuicunamanmi villachinajurca: charijcunaman, pobrecunaman, jovengunaman, mayorllacunamanbash. Ashtacacunami Jesuspa cabal yachachishcacunataca chasquirca. Shinallata paicunaca, Chipre llactata mandaj Sergio Paulo runamanbashmi Diospa Shimimanda villachirca. Pablo y Bernabé villashcata, Sergio Paulo ama crichunmi, shuj brujoca jarcangapaj munarca. Shinapash chai brujomanga apóstol Pabloca: “Jehová Diosmi candaca juzganga y ñausapashmi quidangui” nirca. Shina nijpimi brujo runaca chai rato ñausa quidarca. Chaita ricushpami Chipre llactata mandaj Sergio Paulo runaca Jesusta cati callarirca.

Pablopash Bernabepash tucui ladocunapimi villachinajurca: huasin huasin, mercadocunapi, ñangunapi, sinagogacunapipashmi villachinajurca. Shuj viajeca, Listra llactapimi shuj suchu runaguta jambirca. Chaita ricushpami gentecunaca apostolcunaca dioscunami yashpa paicunata adorangapaj munarca. Chaimi Pablopash, Bernabepash ama shina rurachun gentecunataca: Taita Diostallami adorana canchi. ‘Ñucanchipash, cangunashnallata gentecunami canchi’ nirca. Shinapash judiocunaca Pablomanda y Bernabemanda contrarichunmi gentecunaman llullacunata nishpa parlanajurca. Chaimi gentecunaca Pablota rumicunahuan pigashca jipaca huañushca yashpa chai llactamanda aisashpa llujchirca. Shinapash Pabloca causarami carca. Chaimi shuj huauquicuna uchalla shamushpa cutin chai llactaman pusharca. Jipamanga Pabloca Antioquía llactamanmi tigrarca.

Huata 49​pica, Pabloca cutinmi villachingapaj rirca. Chaipica Asia Menor llactapi huauquipanicunata ricungapami rirca. Chai jipaca Diosmanda ali villaicunataca Europaman rishpa Atenas, Éfeso, Filipos, Tesalónica, shuj llactacunapipashmi villachirca. Chaimanga Silas, Lucas, Timoteo jovenbashmi cumbarca. Paicunaca mushuj congregacionguna tiachun y chai congregaciongunata shinllichishpami ninanda ayudanajurca. Apóstol Pabloca Corinto llactapi huauquicunata animangapami huata chaupita paicunahuan quidarca. Chaipimi Pabloca villachirca, yachachirca, ashtaca congregaciongunamanbash cartacunata escribirca. Shinallata carpa huasicunata rurashpami trabajan carca. Tiempohuanga Pabloca Antioquía llactamanmi tigrarca.

Pabloca huata 52​pica último viajetaca Asia Menor llactamanmi villachingapaj rirca. Chaimandaca Filipos llactaman rishca jipaca, Corinto llactamanmi rirca. Pabloca, tauca huatacunatami Éfeso llactapi yachachishpa, ungushcacunata jambishpa, Éfeso congregacionda ayudashpa yalirca. Shinallata yachachij huasi ucucunapimi Pabloca cada punlla Diospa Shimimanda yachachijurca. Chaita uyashpami ashtaca gentecunaca paicunapa causaipi ashtaca cambiocunata ruranajurca. Chai tucui llactacunapi Diosmanda ali villaicunata villachishca jipaca, Pabloca Jerusalén llactamanmi rirca.