Diablopa ruraicunamanda caruyapaichi

1, 2. ¿Imatata Diablomandapash, paipa ayacunamandapash yachana capanchi?

PARAÍSO Alpagupica, Jehová Dios munashcashnami juyaillaguta causashun. Shinapash cunanbica, Diablopash, paipa ayacunapashmi cai Alpataca mandanajun (2 Corintios 4:4). Paicunata na ricui ushajpipash, paicunaca ciertopachami tian. Ashtaca podertami charin.

² Cai capitulopica, Jehovamanda na caruyashpa, Diablomanda imashina cuidarinatami yachajupashun. Jehová Diosca ayudasha ninmi. Shinapash, ima trampacunahuan Diablopash, paipa ayacunapash ñucanchita pandachingapaj, atacangapaj munajtami yachana capanchi.

‘DIABLOCA LEÓN HUACAJUNSHNAMI’ CAN

3. Diabloca ¿imatata munan?

³ Diabloca ninmi, bendiciajpillami gentecunaca Jehovata adoran. Llaquicuna ricurijpica Jehovata saquingallami nishpa (Job 2:4, 5, liipangui). Pipash Jehovata rijsingapaj munajujpica Diablopash, paipa ayacunapash cuenta japishpami jarcangapaj munan. Jehovaman mingarishpa, bautizarijpicarin ninandami culiran. Bibliapica ninmi: ‘Diabloca, león huacashpa, pitapash micungapaj mascajunshnami muyuriajun’ nishpa (1 Pedro 5:8). Diabloca ñucanchicuna Jehovapa amigo cashpa catichunga na munanllu (Salmo 7:1, 2; 2 Timoteo 3:12).

4, 5. a) Diabloca ¿imatata na jarcai ushanga? b) Ñucanchicunata Jehovamanda Diablo ama caruyachichunga ¿imatata rurana capanchi?

⁴ Diablo munashcashna ñucanchita llaquichichunga, Jehová Diosca na saquingachu. Chaimi Diablotapash, paipa ayacunatapash na manllana capanchi. Jehová Diosca ninmi: ‘Ashtaca gentecunami’ ninan manllanai llaqui punllacunamanda salvaringa nishpa (Apocalipsis [Revelación] 7:9, 14). Chai shimicuna ama pactarichun Diablo jarcangapaj munajpipash, Jehová Diosca na saquingachu, paipa sirvijcunataca cuidajunmi.

⁵ Ñucanchicuna Jehovaman ashtahuan quimirijpica, Jehovamanda caruyachitaca Diabloca na ushangachu. Bibliapica ninmi: “Mandaj Dioshuan cajpica, paipash cangunahuanmi canga” nishpa (2 Crónicas 15:2; 1 Corintios 10:13, liipangui).a Punda tiempocunapica Abel, Enoc, Noé, Sara, Moisés, shujcunapash Jehovaman ashtahuan quimirishpami, Diablo pandachichunga na saquirca (Hebreos 11:4-40). Ñucanchipash chaitallatami rurana capanchi. Bibliapica ninmi: ‘Diablohuanga shinllita macanajuichi. Chaimi cangunamandaca anchuringa’ nishpa (Santiago 4:7).

‘MACANAJUIPISHNAMI’ CAUSAPANCHI

6. Diabloca ñucanchicuna ¿imata rurachunda munan? Chaipaca ¿imatata rurajun?

⁶ Pai munashcashna na llaquichi ushashpapash, ñucanchicunata Jehovamanda asha asha caruyachingapami Diabloca, shuj shuj trampacunahuan atacan. Paica unai huatacunatami gentecunataca chai trampacunahuanllata atacajushca. ¿Chai trampacunaca maijanda can?

7. ¿Imamandata Diabloca Jehovata sirvijcunata atacan?

⁷ Apóstol Juanga nircami: ‘Cai pachapajtalla rurashpa causajcunataca Diablomi mandajun’ nishpa (1 Juan 5:19). Diabloca Jehovata sirvijcunatapashmi mandangapaj munan (Miqueas 4:1; Juan 15:19; Apocalipsis 12:12, 17). Ashalla punllacuna faltajujta yachashpami Diabloca, Jehovata ama cazuchun Jehovata sirvijcunataca catiriashpa atacan. Huaquinbica directomi atacan. Cutin huaquinbica na sintijtami atacan.

8. ¿Imatata na cungana capanchi?

⁸ Bibliapica ninmi: ‘Nalita rurachij, ushaita charij ayacunahuanmi macanajunshna’ causanchi nishpa (Efesios 6:12). Na cunganachu capanchi, Jehovaman mingarishca punllamandapachami Diablohuanbash, paipa ayacunahuanbash shuj macanajuipishna causapanchi. Chaimi apóstol Pabloca, shinllimi shayarina canguichi nishpa, quimsa viajecaman animarca (Efesios 6:11, 13, 14).

9. Diablopash paipa ayacunapash ¿imatata rurangapaj munan?

⁹ Diablopash, paipa ayacunapash shuj shuj trampacunapimi urmachingapaj munan. Shuj trampapi na urmashca cashpaca na pensanachu capanchi, shuj trampacunapipash na urmashachu nishpa. Diabloca ñucanchicuna imamanda nali sintirijujta ricushpami, ima trampapi urmachinata pensarijun. Diablopa trampacunapi ama urmachunmi Bibliaca advirtijun (2 Corintios 2:11, nota 31​ta ricupangui). Shinaca, ayacunahuan ricunata charij trampa ima cajta ricupashun.

AYACUNAMANDA CARUYASHPA CATIPANGUI

10. a) ¿Ima cosascunata ayacunahuan ricunata charin? b) Ayacunahuan ricunata charij cosascunamandaca ¿imatata Jehová Diosca yuyan?

¹⁰ Brujucunapaman rina, adivinana, huañushcacunahuan parlanapash ayacunahuan ricunata charij cosascunami can. Bibliapica yachachinmi, chai ruraicunaca ‘Mandaj Diospa ñaupajpica millanayaimi’ can. Jehovata adorajushpapash, chai cosascunata ruranaca napacha alichu can nishpa (Deuteronomio 18:10-12; Apocalipsis 21:8). Jesusta catijcunaca, ayacunahuan ricunata charij cosascunapica, nimapi na chapurinachu capanchi (Romanos 12:9).

11. Imatapash yachangapaj munaimandaca ¿imacunapita chapurinchimanlla?

¹¹ Imatapash yachangapaj munaimandami gentecunaca, ayacunahuan ricunata charij cosascunapi chapurinlla. Chaitaca alimi Diabloca yachan. Chai cosascunapi chapurishpaca, Jehovapa amigo cashpa catitaca na ushashunllu.

DIABLOCA PANDACHINGAPAMI MUNAN

12. Gentecuna ¿imashina pensachunda Diabloca munan?

¹² Diabloca gentecunata pandachingapami, ‘nalitara alimi’ can nishpa, ‘alitara nalimi’ can nishpa asha asha crichin (Isaías 5:20). Diabloca, Bibliapi consejocunaca na alichu can, Taita Diosta na cazushpaca ashtahuan cushillami causasha nishpa pensachunbashmi munan.

13. Gentecuna ishcai shungu tucuchunga ¿imatata Diabloca rurashca?

¹³ Callarimandapachami Diabloca, gentecuna ishcai shungu tucuchun munashca. Evataca nircami: “¿Taita Dioschu cangunataca: ‘Huertapi tucui yuracunamandaca, na micunachu canguichi’ nirca?” (Génesis 3:1). Jobpa punllacunapipashmi Diabloca angelcunapa ñaupajpi Jehovataca tapurca: “Job runaca, ¿yangamandachu Taita Diosta manllan?” nishpa (Job 1:9). Jesús bautizarishca jipapashmi Diabloca Jesustaca nirca: “Taita Diospaj Churipacha cashpaca, cai rumicunata tandaman tigrachi” nishpa (Mateo 4:3).

14. Ayacunahuan ricunata charij cosascunaca na yapa peligrosochu can nishpa pensachunga ¿imatata Diabloca ruran?

¹⁴ Cunanbipashmi Diabloca gentecuna ishcai shungu tucuchun munan. Chaimi, ayacunahuan ricunata charij cosascunaca na yapa peligrosochu can nishpa pensachun, chai cosascunataca alitashnalla gentecunamanga ricuchin. Jehovata sirvijcunapashmi huaquingunaca shina pensashca (2 Corintios 11:3). Shinaca ¿imashinata chai trampamanda cuidarina capanchi? Diablo ama pandachichunga ¿imatata rurana capanchi? Chaipaca, diversiongunamanda, jambirina tratamientocunamanda ricupashun.

ÑUCANCHI MUNAICUNAHUANLLATAMI PANDACHIN

15. ¿Imacunata rurashpata ayacunahuan chapurinajunchiman?

¹⁵ Ashtaca videocuna, peliculacuna, videojuegocuna, Internetpi paginacunaca, ayacunata, magiacunata, imapash manllanaicuna ricurishcata, uyarishcatami ricuchin. Ashtacacunaca chaicunaca na imapash canllu ninmi. Shinapash, ayacunahuan chapurijushcataca na cuenta japinllu. Shujcunapash cuyipi fichachishpa, huairata fichachishpa, horoscopocunata liishpami na cuenta japijta ayacunahuan chapurin. Diabloca, ashtacacuna chaicunata rurachunmi, chai cosascunataca alitashnalla, yachanaitashnalla, asinaitashnalla ricuchin. Huaquingunaca yuyanmi, chaicunata ricuitalla ricunaca na peligrosochu can nishpa. ¿Imamandata shina pensanaca nali can? (1 Corintios 10:12).

16. ¿Imamandata ayacunahuan ricunata charij cosascunataca na agllana capanchi?

¹⁶ Diablopash paipa ayacunapash ñucanchicuna imata pensanajujtaca na yachai ushanllu. Shinapash ñucanchi o ñucanchi familia ima diversiongunata agllajta ricushpami, ñucanchi imata pensanajujta, imata munanajujtapash cuenta japin. Huañushcacunahuan parlajcunamanda, brujacunamanda, vampirocunamanda, aya japishcacunamanda parlaj librocunata, peliculacunata, musicacunata uyanajujpica, paicunamanda yachangapami munan yashpami, Diablopash paipa ayacunapash chaicunatallata rurachingapaj munanga (Gálatas 6:7, liipangui).

17. ¿Imashinata Diabloca, ñucanchicuna ali tucuna munaicunamandapash aprovecharin?

¹⁷ Ungüicunamanda ali tucuna munaimandapashmi Diabloca aprovecharin. Huaquingunaca, ali tucungapaj munashpa shuj shuj hospitalcunaman, doctorcunapaman rishpapash na ali tucushcachu (Marcos 5:25, 26). Huaquinbicarin, ricudorcunapamanmi rishca, o ayacunahuan ricunata charij tratamientocunatami catishca. Shinapash Jesusta catijcunaca, chai tratamientocunataca na catinachu capanchi (Levítico 19:31).

18. ¿Ima tratamientocunatata na agllana capanchi?

¹⁸ Bibliapica advirtinmi: “Mandashcata na uyanayachij runataca, pai mañajujtapash Diosca millanayachinmi” nishpa (Proverbios 28:9). Shinaca, nalita rurajcunapa oraciondaca, Jehová Diosca na uyangapaj munanllu. Jambiringapaj munaimanda imapash nalita rurashpaca, Jehovapa ñaupajpica na ali ricurishunllu, pai ayudachunbash na saquinajunchimanllu (Salmo 41:3). Chaimandami shuj tratamientota agllagrijushpaca, imapash nali cosascunahuan o ayacunahuan ricunata charij cosascunahuan na chapurishca cashcataca, ali yachana capanchi (Mateo 6:13). Chai cosascunahuan chapurishcashnallami can yashpaca, chai tratamientotaca na catinachu capangui (nota 32​ta ricupangui).

AYACUNAMANDA PARLOCUNA

19. ¿Imamandata ashtaca gentecunaca Diablota manllan?

¹⁹ Huaquin gentecunaca Diablopash, ayacunapash tiajtaca na crinllu. Cutin shujcunaca paicuna tiajtaca alimi yachan. Ashtacacunaca paicunata manllaimandami imacunatapash crishpa causan. Huaquingunacarin, gentecunata ayacuna imashina llaquichishcata parlashpami shujcunataca manllachin. Huaquingunaca chashna parlocunata alicachishpami shujcunamanga parlan. Chaimi gentecunaca Diablota manllashpa causan.

20. ¿Imata rurashpata Diablotaca ayudanajunchiman?

²⁰ Diabloca paita manllachunmi munan (2 Tesalonicenses 2:9, 10). Alipacha umachinata yachaimandami, ayacunamanda yachangapaj munajcunataca na cierto cosascunata crichin. Chaimi huaquingunaca imatapash cierto ricushcatashna, uyashcatashna parlan. Chai parlocunata shujman shujman parlajpimi, chai parlocunaca mirashpa catin. Chashna parlocunahuan gentecunata manllachishpaca Diablotami ayudanajunchiman (Juan 8:44; 2 Timoteo 2:16).

21. Ayacunamanda parlajunapa randica ¿imacunamandata parlana capanchi?

²¹ Diablo ñucanchita imashinapash manllachishca cajpica, na chaicunataca shujcunaman parlajunachu capanchi. Diablota, paipa ayacunata manllanapa randica, Jesuspi pensarishpami, Jesusmanda, Jehová cushca podermandapash parlana capanchi (Hebreos 12:3). Jesusca paipa catijcunamanga na ayacunamanda parlajurcachu. Chaipa randica ali villaicunata, ‘Taita Diospa juyailla rurashcacunatami’ villachijurca (Hechos 2:11; Lucas 8:1; Romanos 1:11, 12).

22. ¿Imatata nimamanda na saquigripanchi?

²² Na cunganachu capanchi, Diabloca imashinapash Jehovamanda caruyachingapami munan. Shinapash, maijan trampacunahuan pandachingapaj munajtaca alimi yachanchi. Ayacunahuan ricunata charij cosascunahuan ashagutallapash pandachichunga, nimamanda na saquishunllu (Efesios 4:27, liipangui). Diablomanda caruyashpaca, paipa trampacunamandapash caruyashpami, Jehová Dios cuidajushcamandaca seguro sintirishun (Efesios 6:11).