¿Imashinata Bibliataca lii callarina can?

Bibliata liijushpa cushilla sintiringapaca ¿imatata rurana capangui? ¿Imashinata Bibliapi yachajushcata quiquinga pactachi ushangui? Shujcuna Bibliata liichunga cai 5 yuyaicunami ayudashca. Ricupashun.

Liingapaj ali pushtuta mascapangui. Bibliata liingapaj tranquilo, chulunlla, punchalla, lugarlla pushtuta agllashpaca ashtahuanmi intindingui.

Ñucapapash sirvingami yashpa liipangui. Bibliataca Taita Diosmi cushca. Bibliata liijushpaca ñucapami sirvinga yashpami liina capangui. Imashinami shuj uchila huahuagu paipa taitamanda tucuita yachajungapaj munan. Shinallatami quiquinbash yuyana cangui. Chaipaca panda yachachishcacunata ladoman saquishpa, Taita Dios yachachichunmi saquina capangui (Salmo 25:4).

Nara lii callarishpallata Diosta mañapangui. Bibliaca Diospa yuyaitami charin. Bibliata ali intindingapaca Diospa ayudatami minishtinchi. Taita Diosca paipa jucha illaj espirituta mañajpica cungallami (Lucas 11:13). Taita Diospa espíritu santomi Tucuita Ruraj Dios imashina cajta ali intindichun ayudanga. Jipamangarin ‘Taita Dios imata yarijujtapashmi’ yachajupangui (1 Corintios 2:10).

Intindinata yashpa liipangui. Yangata liinamandallaca na liinachu capangui. Aliguta pensarishpami liina capangui. Chaimanda cashna tapuripai: “Paicunaca ¿ima cualidadcunatata ricuchirca? Yachajushcataca ¿imashinata pactachi ushani?” nishpa.

Yachajuna munaihuan liipangui. Bibliata liijushpa cushilla sintiringapaca, quiquinba causaipi ayudachun yachajungapami esforzarina cangui. Por ejemplo Diosta ashtahuan rijsingapaj, tucuicunahuan ali cangapaj, shuj ali cusa o ali huarmi cangapaj, imacunatapash ashtahuan yachajunatami yuyana cangui. Chaita pactachingapaca Bibliapi mascanallami capangui.a

Imashinami ricushcanchi cai 5 yuyaicunami Bibliata lii callarichun ayudanga. Shinapash Bibliata liijushpa ashtahuan cushilla sintiringapaca ¿imatata rurana capangui? Cati temapimi shuj yuyaicunata yachajupangui.