¿Religionbash, Taita Diospash, Bibliapash ñuca causaipi ayudai ushanllu?

Bibliapica caitami yachachin

Ari, ayudai ushanmi. Bibliaca antiguo antiguo libromi can. Shinallata alipacha consejocunatami charin. Imapash tapuicunata charishpaca Bibliapimi yachajui ushanchi. Shinallata Bibliaca ali causachunmi ñucanchicunataca ayudan. Huaquin tapuicunata yachajupashun.

1. ¿Pita tucui rurarca? Bibliapica Taita Diosmi tucuita rurarca ninmi (Apocalipsis 4:11). Taita Diosca ñucanchita ruraimandami ñucanchicuna cushilla, ali causangapaj imata minishtishcata ali yachan.

2. ¿Taita Diosca ñucamanda preocuparinllu? Bibliapica Taita Diosca “tucui ñucanchicunapa ladopimi can”, na cangunamanda carupichu can nishpami yachachin (Hechos 17:27). Taita Diosca ñucanchimanda preocuparinmi, ali causachunbashmi munan (Isaías 48:17, 18; 1 Pedro 5:7).

3. Taita Diosta rijsinaca ¿imashinata ñucanchitaca ayudan? Taita Diosca ‘paimanda yachajuna munaihuanmi’ ñucanchitaca rurarca (Mateo 5:3). Chaimandami ñucanchita Ruraj Taita Diosta ashtahuan rijsingapaj, paiman ashtahuan quimiringapaj munanchi. Taita Diospash paiman quimirichunmi munan. Chaimi Bibliapica “Taita Diosmanmi quimirina capanguichi. Chaimi paipash quiquingunapamanga quimiringa” nin (Santiago 4:8).

Ashtaca gentecunaca Taita Diosman quimirishpami ashtahuan ali y cushilla causashca. Taita Diosman quimirishpapash na tucuilla problemacunamandachu caruyai ushanchi. Shinapash Bibliapi alipacha consejocunaca caicunapimi ayudan:

• Familiahuan cushilla causachunmi ayudan.

• Shujcunahuan ali llevarichunmi ayudan.

• Depresionda, culquimanda preocupaciongunata, unguicunata y shuj problemacunatapash aguantachunmi ayudan.

Ashtaca religiongunaca Bibliamanda parlashpapash, Bibliapi yachachishcacunataca na pactachishpami causan. Pero Taita Diosta alipacha catij religionga Bibliapi yachachishcatami pactachin. Taita Diosta ali rijsichunbashmi ayudan.