CAPÍTULO 35

¿Imashinata Taita Dioshuan ali amigo caita ushani?

Gabrielca shuj jatun llaquihuan cashpami Jehová Dioshuan ali amigo canaca valishcapacha cajta cuenta urmarca. Paica ninmi: “Ñuca 12 huatacunata charijpimi ñuca taitaca jichushpa rirca. Shina jichushpa rijpimi shuj tutaca ñuca cuartoman yaicushpa ‘ñuca taitata cutin huasiman tigrachimupai’ nishpa Jehová Diostaca cutin cutin mañajurcani”.

Shina llaquilla cashpami Gabrielca Bibliata lii callarirca. Shina liijushpaca Gabrielca Salmo 10:14​pi shimicunatami tarirca. Chaipica: “Imatapash na rurai ushajcunaca, cambajmanmi chayan. Canmi, taita mama illaj huahuacunataca, ayudaj cangui” nijunmi. Cai shimicunaca Gabrielpa shungumanmi chayarca. Chaimi paica caitapash nirca: “Bibliata liishpaca Jehová Dios ñucata ayudajta, pai ñuca Taita cajtami sintircani. Jehová Dioshna taitaca ni maipi na tiangachu”.

Tal vez quiquindapashmi Gabrieltashna pasashca. Pero ima cajpipash Jehová Dios canba amigo cangapaj munashcataca na cunganachu cangui. Bibliapica cashnami nin: “Taita Diospajman quimirichi. Shina quimirijpica, paipash cangunapajman quimiringami” (Santiago 4:8). Cai textopi nishcashnaca Jehová Diosta na ricui ushashpapash, na paishnapacha cajpipash paica quiquin paipa amigo cachunmi invitajun.

Shinapash Jehová Diospa ali amigo cangapaca tucuicunallatami esforzarina capanchi. Caipi pensaripai shuj plantaguta charishcanguiman. Chai plantagu aliguta viñashpa catichunga ¿imatata rurana capangui? Plantagu aliguta viñashpa catichunga ali pushtugupi tarpushpa, yacuguta churashpami cuidariana cangui. Jehová Dioshuan ali amigo canataca chai plantaguta cuidajuj cuendami cuidariana cangui. Shinaca Jehová Dioshuan ali amigo cashpa catingapaca ¿imatata rurana capangui?

Bibliata estudianaca minishtirishcapachami can

Shuj amigohuan ali llevarishpa catingapaca paihuan cutin cutin parlana, pai ima nijujta ali ali uyanami minishtirin. Shinallatami pipash Taita Dioshuan amigo tucungapaj munashpaca paihuan cutin cutin parlana, paita ali ali uyana capanchi. Pero ¿imashinata Jehová Diostaca uyaita ushapanchi? Jehová Diosta uyangapaca paipa Shimi Bibliatami estudiana capanchi (Salmo 1:​2, 3).

Bibliata estudianapa randica tal vez televisionda ricunata, videojuegocunata pugllashpa yalinata o amigocunahuan puringapaj llujshinatachari ashtahuan gushtapangui. Shinapash Taita Diospa amigo tucungapaj munashpaca maimandami Taita Diospa Shimi Bibliata estudiashpa paita uyana cangui.

Bibliata estudiashpaca siempremi aburrido yalisha yashpaca na pensanachu capangui. Ñucaca librocunata liijungapaca na canichu yashpapash Bibliata estudiai callarishpaca gushtanguimi. Shinapash chaipaca tiempotami primeroca llujchina cangui. Shinallata Lais imata rurashcatapashmi ruraita ushangui. Paica ninmi: “Tutamandata jatarishpami Bibliamanda shuj capítulo enterota liini” nin. Shinallata 15 huatata charij Mariaca shuj horariota charin. Paica ninmi: “Cada tutami nara puñushpallata ashaguta Bibliata liini” nin.

Quiquinbashmi Bibliata estudiangapaj shuj horariota chari ushapangui. Chaipaca página 292​pi tiashca recuadropi yuyaicunami ayudanga. Chaita ricushca jipaca cada punlla shuj media horasgutallapash Bibliata estudiangapaj ima horas ushashcaguta ricushpa anotapai.

․․․․․

Bibliata estudiangapaj shuj horariota ruranaca facilmi can. Pero Bibliata estudiangapapacha callarishpaca dificilmi ricurin. Tal vez 11 huatata charij Jezreel jovenshnami sintiri ushapangui. Paica cashnami nin: “Bibliapa huaquin partecunata intindinaca huaquinbica shinllimi can” ninmi. Shina cajpipash Bibliata liinataca na saquinachu cangui. Bibliata liijushpaca canba amigo Jehová Diostapachami uyajungui. Bibliata siempre liingapaj tiempota llujchishpaca ashtahuanmi alicachingui.

Jehová Diosta mañataca ama saquichu

Taita Dioshuan parlangapaca siempremi oracionda rurana capanchi. Chaica Taita Diosmanda shuj jatun regalomi can. Jehová Dioshuanga tuta cashpapash, punlla cashpapash o ima horas cashpapash parlanallami canchi. Paica siempremi ñucanchitaca uyan. Jehová Diosca quiquin imata ningapaj munashcata uyangapaca listomi can. Chaimandami Bibliapica cashna nin: ‘Taita Diosman imatapash villashpa ninanda mañana canguichi. Tucui imamandapash pagui nishpa mañaichilla’ (Filipenses 4:6).

Cai textopi nishcashnaca ima llaquicunata charishpapash Taita Diosmanga tucuita villashpa oracionbi mañanallami cangui. Mañajushpaca huaquin cosascunamanda agradicishpapashmi oracionda rurai ushapangui. Pensaripai, amigocuna favorcunata rurajpica siempremi agradicirin. Shinallatami Jehová Diostapash pagui nishpa agradicina cangui. Quiquinmandaca pipash na Jehová Dioshnaca imagutapash rurashcachu (Salmo 106:1).

Imacunamandalla Jehová Diosta agradicingapaj munashcata anotapai.

․․․․․

Problemacunahuan, llaquicunahuan ñana ushanshna sintirijushpaca ¿imatata rurai ushapangui? Bibliapica: “Llashaj quipishna cambaj llaquitaca, Mandaj Diosman saquilla. Paica ayudangallami. [Alita] rurajtaca, na tucui causaipi llaquita apajuchun saquingachu” nijunmi (Salmo 55:22).

Jehová Diosman imacunatalla villangapaj munashcata anotapai.

․․․․․

Canba propio experienciamandallatami yachajuita ushapangui

Jehová Dioshuan ali amigo cangapaca pai quiquinda siempre ayudajtami yaria cana capangui. Davidca, ‘Mandaj Dios ali cajta ricuna cashcata’ nishpami consejarca (Salmo 34:8). David cai shimicunata escribijuj tiempopica paipa causaica peligropimi carca. Paitaca rey Saulmi huañuchingapaj munajurca. Chaimandami Davidca filisteocunapurapi pacajungapaj rirca. Shinapash filisteocunapashmi Davidtaca huañuchingapaj munanajurca. ¿Imashinashi Davidca salvarirca? Paica loco cuenda tucushpami chaimandaca llujshi usharca (1 Samuel 21:10-​15).

Shinapash Davidca paimandallata salvari ushashcataca na nircachu. Paica Jehová Dios ayudajpi salvari ushashcatami nirca. Chaimi Davidca cashna nishpa escribirca: “Mandaj Diostami mascajurcani. Paimi, ñuca mañajujta uyahuarca. Ñuca tucui imatalla manllajushcamandapash cacharichihuarcami” (Salmo 34:4). Davidca Jehová Dios paita ayudashcata cuenta japimandami ‘Mandaj Dios ali cajta ricuna’ canguichi nishpa consejarca.a

Cunanga Jehová Dios quiquinda imashina ayudashcata yarishpa anotapai. Shinami Jehová Dios quiquinda siempre ayudajta cuenta japipangui.

․․․․․

Ñucanchi taitamamacuna Bibliamanda yachachishpa viñachishca cajpipash, cada unomi Taita Diospa amigo cangapaj esforzarina capanchi. Shinapash Jehová Diospa ali amigo cangapaca ¿imata ayudanga? Cai capitulopi tiashca yuyaicunami Jehová Diospa amigo tucuchun ayudanga. Jehová Diospa amigo tucungapaj esforzarijpica paillatami quiquindaca ayudanga. Bibliapica: “Diosta mañaichi, paica carangallami. Mascaichi, taringuichimi. Punguta huactachishpa cayaichi, paica pascangallami” ninmi (Mateo 7:7).

LO QUE LOS JÓVENES PREGUNTAN, VOLUMEN 1 LIBROPI, CAPÍTULO 38 Y 39PIMI CAIMANDACA ASHTAHUAN YACHAJUI USHAPANGUI

[Nota]

BIBLIAMANDA TEXTO

“Diosmanda yachajungapaj, paicunapaj shungupi ninanda munajcunaca, ninandami cushijun” (Mateo 5:3)

CAITA RURAPAI

Cada punlla Bibliapa 4 paginacunata liipai. Shina rurashpaca shuj huatapica Biblia enterotami liishpa tucuchipangui.

¿YACHAPARCANGUICHU?

Jehová Diosca quiquin paipa amigo tucuchun munaimandami cai librota liichun, Bibliapa consejocunatapash pactachichun ayudajun (Juan 6:​44).

CAITAMI RURAGRINI

Bibliamanda ashtahuan yachajungapaca caitami ruragrini: ․․․․․

Taita Diosta ashtahuan mañangapaca caitami ruragrini: ․․․․․

Ñuca taitacunataca ¿imacunamandallata tapungapaj munani? ․․․․․

QUIQUINGA ¿IMATATA YUYAPANGUI?

● Bibliamanda yachajunata ashtahuan gushtangapaca ¿imata rurai ushapangui?

● Gentecunapa mañashcacunataca ¿imamandata Jehová Diosca uyangapaj munan?

● ¿Imashinata Taita Diostaca ashtahuan aliguta mañai ushapangui?

[Página 291pi fotopa yuyai]

Huahuagu cashpaca oracionda rurajushpa chaitallatami cutin cutin mañan carcani. Shinapash cunanga punllapi tucui ima pasashcatami Taita Diosmanga villani. Chaimi shuj shuj cosascunamanda Jehová Diosmanga cada punlla parlai ushashcani.’’ (Eva)

[Recuadro]

Quiquinba Bibliapillata yachajupai

1. Quiquin gushtashca textocunata liishpa callaripai. Chaita ali intindingapaca Jehová Diosta ayudahuai nishpa oracionbi mañapai.

2. Aliguta intindingapaca alimanda liipai. Bibliataca ama jahua jahualla liinguichu. Bibliata liijushpaca quiquin chaipi cashcashna pensaripai. Shinami Bibliapi parlashcacuna imashinapacha pasashcata cuenta japipangui.

3. Liishcapi aliguta pensaripai. Imagutapash lii tucuchishpaca cashna tapuripai:

● ¿Imamandashi Jehová Diosca Bibliapi caita escribichirca?

● Bibliapi parlashcacunamandaca ¿picunallata ñucapaca ali ejemplocuna o nali ejemplocuna can?

● Cai yachajushcacunataca ¿imashinata ñuca causaipi pactachi ushani?

● Caipica ¿imatata Jehová Diosmandaca yachajuni?

4. Jehová Diosta mañapai. Mañajushpaca imata yachajushcata, chai yachajushcata imashina quiquinba causaipi pactachigrijushcata Jehová Diosman shuj oracionda rurashpa villapai. Shinallata Jehová Dios paipa Shimi Bibliata carashcamandapash agradicipangui.

[Foto]

“Cambaj Shimica, ñuca chaqui sarunata punchayachijuj lamparagushnami, ñuca ñanda punchayachijuj michagushnami” (Salmo 119:105).

[Recuadro]

Imacunalla ashtahuan importante cashcata ricupai

¿Jehová Diosta mañangapaj, Bibliata estudiangapapash tiempota charipanguichu? Chaita yachangapaca ima ashtahuan importante cashcatami ricuna capangui.

Cunanga caita rurapai: Shuj baldepi huaquin rumicunata churapai. Chai jipaca arenahuan jundachipai. Shina rurajpica ¿imata pasan? Tucuimi facillla yaicun.

Cunanga cutin chaitallata rurapai. Pero cai viajeca arenatara baldepi jundachipai. Cai viajeca ¿imata pasarca? Arenatara primero churaimandami rumicunaca ñana yaicurcachu.

Caimandaca ¿imatata yachajupanchi? Quiquinba causaipi diversiongunatara primero churashpaca espiritual cosascunapaca tiempota ñana charinguichu. Chaimandami Bibliapica Jesusta catijcunataca: “Ima ashtahuan importante cashcatami ricuna canguichi” nin (Filipenses 1:​10, TNM ). Cai consejota pactachishpaca tucuipa tiempota charishcatami cuenta japipangui. Ama cungapanguichu: ashtahuan importante cosascunatarami primero churana capangui.

[Foto]

Jehová Dioshuan amigo canataca shuj plantaguta cuidajuj cuendami cuidana capanchi