JOVENGUNAPA TAPUICUNA
Bibliaca ¿imashinata ñucataca ayudaita ushan? Parte 2: Bibliata liishpa cushijupai
Will shuti jovenga cashnami nin: “Bibliata liinaca aburrido cuendami caita ushan. Pero Bibliata imashina liishpa callarinata na atinaimandami aburrido cajta pensaita ushapanchi” ninmi.
¿Bibliata cushijushpa liingapaj imata rurana cashcata yachangapaj munanguimanllu? Caipi tiashca yuyaicunami ayudanga.
Bibliata liishpaca quiquin chai tiempopi cashcashna cuenda liipai
Chaipi cashcashna cuenda liingapaca caita rurapai:
Liingapaj shuj parteta agllapai. Tal vez Bibliapi parlashca historiacunamanda, Jesuspa causaimanda o jw.org paginapi tiashca audiodramacunapa lecturata catishpami lii ushapangui.
Cunanga liinata callaripai. Sololla cashpa, familiahuan o amigocunahuanbashmi lii ushangui. Taucapura cashpaca cada unomi ima parteta liinata agllai ushanguichi.
Caicunatapashmi rurai ushangui:
Liishca textocunapi imacunalla pasajushcata yaringapaca dibujocunatapashmi rurai ushapangui. Chai jipaca cada dibujopi ima pasajushcata asha shimicunapilla escribipai.
Importante yuyaicunata escribipai. Diosta sirvijcunamanda parlajushpaca imacunatalla rurashcata, ima cualidadcunata charishcata, ima bendiciongunatalla chasquishcatapash escribipai.
Chai tiempopi gentecunahuanbacha parlajushcashna yuyapai. Shinami paicunahuan parlashpa, paicunata ciertopacha tapuicunata rurajuj cuenda sintiri ushangui.
Chai lecturapi parlashca gentecunamanda pipash shuj nali decisionda japishcata ricushpaca shuj ali desicionda japijpi imacunalla pasai ushashcata pensaripai. Por ejemplo, Apóstol Pedropi pensarishun. Paica na rijsinichu nishpami Jesustaca negarca (Marcos 14:66-72). Gentecuna Pedrota rimanajujpica paica ¿imatashi rurana carca?
Shinallata Bibliapi yachajushca yuyaicunata quiquinba causaipi imashina pactachi ushashcatami escribi ushangui (Romanos 15:4).
Bibliata liijushpaca chaipi cashcashnami liina capangui.
Ashtahuan informacionda mascapai
Liijushpa ashtahuan informacionda mascashpaca Bibliapica ninan valishca yuyaicunatami taringui. Huaquinbica shuj o ishcai shimicunamandallami ashtahuan informacionda tari ushapangui.
Por ejemplo Mateo 28:7ta, Marcos 16:7huan comparashpa ricupai.
Marcospica ¿imamandata Jesusca paipa yachajujcunamanbash, “Pedromanbash” ricurina cashcata nijun?
Caita yaripai: Marcosca imapacha pasashcata na ricurcachu. Shinapash Pedromi ima pasashcataca tal vez villashcanga.
Bibliamanda importante yuyai: Jesús paita cutin ricungapaj munashcata yachanaca ¿imamandashi Pedrotaca tranquilo sintirichun ayudarca? (Marcos 14:66-72). Jesusca ¿imashinata Pedropa ali amigo cashcata ricuchirca? Shuj ali amigo cangapaca ¿imashinata Jesuspa ejemplota cati ushangui?
Bibliata liijushpa chaipi cashcashna liishpa, ashtahuan informacionda mascashpaca liinataca ashtahuanmi gushtangui.