Shuj sacerdoteca paipa iglesiatami saquin

Huahuagu cashpa quiquinba causai imashina cashcata parlapai.

Huata 1943​pi, Italia llactapimi nacirircani. Shuj uchilla pueblogupimi ñuca huauquipanicunahuan viñarcanchi. Ñuca taitaca carpinteromi carca. Shinallata campopipashmi trabajan carca. Ñucanchi taitacunaca ñucanchitaca católico cuendami viñachirca.

¿Imamandata sacerdote tucuparcangui?

Uchillagu cashpaca misapi cura parlajujta uyanataca ninandami gushtan carcani. Pai imatalla rurajta ricunatapashmi gushtan carcani. Chaimandami ñucapash sacerdote tucungapaj munarcani. Ña 13 huatacunata charijpica cura tucuchunmi ñuca mamitaca shuj católico colegiopi churahuarca.

Chai colegiopi cashpaca ¿Bibliamandachu yachajuparcangui?

Na, na ashta yachajun carcanichu. 15 huatacunata charijpimi shuj profesorca Mushuj Testamento Bibliata carahuarca. Chaipica Jesuspa causaimandami parlan. Chaitaca cutin cutinmi liijun carcani. Ña 18 huatacunata charishpami Roma llactaman causangapaj rircani. Chaipica shuj católico universidadpimi estudiai callarircani. Chai universidadtaca papami ricun carca. Chai universidadpimi latín y griego shimicunata yachajurcani. Shinallata historia, filosofía, psicología, teología nishcatapash estudiarcani. Domingocunata misapi huaquin versocunata liishpapash o Bibliamanda huaquin lecturacunata uyashpapash, Bibliataca na estudianllu carcanchi.

Seminariopi ña director cashpaca ¿clasescunatapashchu cun carcangui?

Ashtahuanbachaca administrashpami trabajan carcani. Pero huaquinbica Concilio Vaticano II nishcapa huaquin decretocunamandami yachachin carcani.

¿Imamandata quiquinba iglesiamandaca caruyai callariparcangui?

Quimsa razongunami tiarca. Chai iglesiaca politicapimi ninanda satirin carca. Shinallata chai iglesiapi curacuna, chai iglesiaman rijcunapash nalicunata rurashpami causan carca. Ashtahuanbash chai iglesiapi huaquin yachachishcacunaca na cabal carcachu. Chaimi cashna nishpa tapurin carcani: ¿Imamandata shuj juyaj Taita Diosca pipash huañujpica para siempre castigashpa charita ushanman? ¿Ciertopachachu Taita Diosca shuj rosariota utilizashpa chaitallata chaitallata nishpa paita mañachun munan?a

Shinaca ¿imata rurangapata dicidiparcangui?

Ninanda huacashpami Jehová Diostaca ayudahuai nishpa mañarcani. Chai jipaca Biblia de Jerusalén nishcapa shuj copiatami randiparcani. Chai Bibliaca chairallami italiano shimipi llujshishca carca. Shinami Bibliata lii callarircani. Shuj domingo tutamandataca iglesiapi ña misata cushca jipami ishcai jaricuna shamurca. Paicunaca testigo de Jehovacunami canchi nihuarcami. Paicunahuanga más o menos shuj horas yalitami Bibliamanda, shinallata Bibliapi religionmanda imata nijta parlarcanchi.

Chai Testigocunahuan parlajushpaca ¿imatata ashtahuanbachaca gushtaparcangui?

Paicuna imasha paicunapa crishcacunamanda parlajtami ashtahuanbachaca alicachiparcani. Shinallata paicuna shuj católico Bibliata alipacha utilizan cashcatami ricuparcani. Ña tiempo jipaca Mario shuti shuj Testigomi ñucata visitai callarirca. Ñucataca ninandami pacienciata charihuarca. Cada sabadomi tamia o na tamia shamun carca. Siempremi tutamanda las 9 en puntota pungutaca huajtachin carca.

Chai Testigo shamujta ricushpaca, chaishuj curacunaca ¿imatata nin carca?

Paicunatapashmi ñucanchihuan parlachun invitan carcanchi. Pero paicunaca Bibliata estudianataca na munanllu carca. Shinapash Bibliapi ciertopacha cosascunata yachajujuimandaca estudianataca ninandami gushtan carcani. Por ejemplo, Taita Dios imamanda llaquicuna tiachun saquishcatami yachajuparcani. Chaitaca siempremi yachangapaj munan carcani.

¿Bibliata ama estudiachunga iglesiata ñaupaman pushajcunaca jarcarcachu?

Huata 1975​pimi Roma llactaman huaquin viajecunata rircani. Chaiman rishpami imata yachajujushcata parlarcani. Shinapash chaipi ñaupaman pushajcunaca pandacunatami yachajujungui nihuarcami. Pero ni maijan Bibliataca na utilizarcachu. Chai jipaca 9 de enero de 1976​pimi shuj cartata escribircani. Chai cartapica iglesiamanda llujshingapaj munashcatami escribircani. Ña ishcai punllacuna jipaca chai seminariomanda llujshishpami por primera vez Testigocunapa reunionman rircani. Chaica shuj asambleami cashcarca. Chaipica ashtaca congregaciongunami pacta carca. Tucuimi diferentepacha carca. Chaipi cajcunaca cada unomi shuj Bibliata charirca. Paicunaca discursantecuna shuj textota nijpica, paicunapa Bibliapillatami mascan carca.

Quiquinba familia chaita yachaj chayashpaca ¿imatata nirca?

Mayoriami ninanda culirarca. Shinapash ñuca huauquipash Lombardía llactapi Testigocunahuan Bibliata estudiajujtami yachaj chayarcani. Chaimi paita visitangapaj rircani. Chai llactamanda Testigocunapashmi ñucata ninanda ayudahuarca. Paicunaca trabajota tarichun, shinallata maipi causanatapash tarichunmi ayudahuarca. Chai huatapillatami Testigo shina bautizarircani.

Chaita rurashcamandaca ¿tal vez arripintiripanguichu?

Na, maitashi arripintirijusha. Cunan si Taita Diosman quimirishcatami sintipani. Ñucaca Bibliapimi pai pi cashcata yachajupashcani. Gentecunapa yuyaicunata o iglesia catolicapa nishcacunataca na catishcanichu. Cunan si cabalta yachachijushcamandami tucui gentecunahuan parlai ushapani.