Cutin cutin pandarishpapash nali cosascunata ruranataca saqui usharcanimi

ÑUCA PUNDA CAUSAI.

1949 huatapimi ñuca taitaca Alemaniamanda shamushpa Australia llactapi trabajota mascangapaj shamushcarca. Ñuca taitaca minacunapi, michata ruraj empresacunapi trabajota mascangapami shamushcarca. Paica Victoria nishca pushtupimi causai callarishcarca. Chaipimi ñuca mamitahuanga cazarashcarca. Ñucaca 1953 huatapimi nacirircani.

Huaquin huatacuna jipaca ñuca mamitami testigo de Jehovacunahuan Bibliamanda yachajui callarirca. Chaimi uchilagu cajpillata Bibliamanda yachachihuajushcata yarini. Pero ñuca taitaca tucui religiongunata nimamanda na ricunayachimandami ñuca mamita Bibliata estudiajushcamandaca manllanaita culirashpami millai millai tucui callarirca. Ñuca Taitata ninanda manllashpapash ñuca mamitaca Bibliamandaca pacallami yachajushpa catirca. Yachajushcacunataca ninandami alicachin carca. Ñuca mamitaca ñuca taita na huasipi cajpimi ñuca paniman, ñucamanga Bibliamandaca yachachin carca. Cai Alpaca shuj juyailla paraisomi tucunga, Bibliapi nishcacunata cazushpaca siempremi cushilla causanguichi nishpami yachachin carca (Salmo 37:​10, 29; Isaías 48:17).

Ñuca taita nali nali cajpimi 18 huatacunatalla charishpa huasimandaca rina tucurcani. Ñuca mamitapa yachachishcacuna cierto cashcata yachashpapash, Bibliapa yachachishcacunata na shungupi charimandami imata yachajushcataca causaipica na pactachircani. Huasimanda rishpaca minas de carbonbi electricista cana trabajotami tarircani. Y 20 huatacunata charishpami cazararcani. Quimsa huatacuna jipa ñuca primera ushigu nacirijpimi causaipi ima ashtahuan importante cashcata pensari callarircani. Bibliata yachajuna familia ucupi cushilla causachun ayudanata yachaimandami testigo de Jehovacunahuan Bibliamanda yachajui callarircani. Shinapash ñuca huarmiguca testigo de Jehovacunataca na ricunayachinllu carca. Tandanajuiman rijpicarin Bibliamanda yachajushpa catingapaj munashpaca mejor huasimandaca rilla nihuarcami. Imata ruranata na atinashpami Bibliamanda yachajunataca saquircani. Alita ruranata saquishcamandaca jipamanmi arripintirircani.

Trabajopi compañerocunami shuj punllaca pornografía nishcata ricuchihuarca. Pornografía nishcapi ruraicuna millanayai cajpipash ricunayanmi carca. Shinapash chai jipaca napacha ali sintirinllu carcani. Bibliapi yachajushcacunata yarishpami Taita Diosca cashtigahuangami yashpa pensarin carcani. Shinapash chaicunata cutin cutin ricujuimandami jipamanga pornografiata ricuna viciopi urmarcani.

Ñuca mamitapa yachachishcacunataca asha ashami ladoman saquishpa catircani. Chaimi 20 huatacuna jipaca pornografía nishca millanai ruraicunata ricujuimanda ñucaca nalipacha gente tucurcani. Chaimandami mapa, malcriado shimicunatalla parlan carcani. Shinallata jarihuan huarmihuan pacta canamanda panda yuyaicunata charimandami ñuca huarmiguhuan causajushpapash shuj huarmicunahuan juchapi urmarcani. Shuj punllaca espejopi ricurishpaca ñucaca ñucamandallatami millanayachiri callarircani.

Ñuca causai nalipacha cajpimi ñuca matrimoniopash tucurirca. Chaimi Jehová Diosta tucui shungu mañashpa 20 huatacuna yalishca cajpipash, cutin Bibliamanda yachajui callarircani. Chai tiempopica ñuca taitaca ñami huañushca carca. Cutin ñuca mamitaca testigo de Jehovami carca.

BIBLIAMI ÑUCA CAUSAITA CAMBIARCA.

Bibliapa yachachishcacunataca ñuca causaipica napacha pactachijurcanichu. Bibliapica Taita Diosmi casilla ali causaitaca caranga ninmi. Chaita chasquingapami tucui usharishcaguta rurangapaj decidido carcani. Mapa, nali shimicunata ama parlangapaj, ama ñapash culirangapami decidirircani. Shinallata shuj shuj huarmicunahuan purinata, apostashpa pugllanata, machanata, ñuca trabajopi shuanatapashmi saquircani.

Trabajomanda compañerocunaca ñuca imamanda cambiangapaj munashcataca na intindircachu. Paicunaca nalicunata rurachunmi quimsa huatacaman imacunatapash ruran carca. Imamandapash culirajpi o cungashcapi shuj nali shimita nijpica paicunaca ñapashmi “ricui canga na cambiarishcanguichu” nihuanmi carca. Shina nihuajpica shungucamanmi nanarihuan carcani. Ñuca imasha cashcata saquitaca napacha ushashachu yuyanmi carcani.

Ñuca trabajopica pornografía nishca mapa ruraicunata ricuchij cosascunaca tucui ladocunapimi tiarca. Trabajopi compañerocunaca chai fotocunataca caishuj chaishujmi yalichirin carca. Pundacunapica ñucapashmi chashnallata ruran carcani. Pornografiata ricuna viciota saquingapaj munajpipash chai compañerocunaca chaicunata ricuchunga cutin cutinmi atichihuan carca. Ñucaman Bibliamanda yachachijuj huauquiguhuanmi chaimandaca parlarcani. Ñuca imashna sintirijushcata parlajujpica huauquiguca ali alimi uyahuarca. Chai viciota saquichun ayudaj textocunatapacha ricuchishpa, aliguta consejashpami ayudahuarca. Shinallata Jehová Diostaca ayudahuai nishpami cuti cutin mañana cangui nishpami consejahuarca (Salmo 119:37).

Shuj punllaca tucui ñuca compañerocunata tandachimushpami caita chaishuj ishcai alcohólico compañerocunaman carapaichi nishpa cervezata curcani. Shina nijpica ñuca compañerocunaca ninanda culirashpami “paicunaca chai viciota saquingapaj munanajunshnaca, maitata cervezataca cujuringayari” nishpa ninanda culiranajurca. Chaimi ñucapashmi shuj viciota saquingapaj esforzarijuni nircani. Chai punllamandapachami ñuca compañerocunaca ñucapash pornografiata saquingapaj esforzarijushcata cuenta japirca. Chaimanda caimanmi pornografiata ricuchun atichinajunataca saquirca.

Jehová ayudajpimi chai viciotaca asha asha saquishpa 1999 huatapicarin bautizarishpa testigo de Jehová tucurcani. Cushilla ali causaiguta charichun Jehová Dios shuj oportunidadta carahuashcamandaca ninandami agradecini.

Jehová Diosca shuj juyaj Taita caimandami pornografiamandaca cuidarinami canguichi nin. Ñuca punda rurashcacunata Jehová imamanda na alicachijtaca cunanga alimi intindini. Proverbios 3:​5, 6​pi nishca shimicunaca cabalpachami. Chaipica: “Mandaj Diostaca, cambaj tucui shunguhuan yariangui. Aligutapacha yarishpami purini yashpaca, ama jariyanguichu. Imata rurangapajpash, Diostara yaringui. Paimi, can purina ñangunapipash aliguta pushanga” ninmi. Bibliapi mandashcacunaca nali cosascunamanda jarcarichunllaca na ayudanllu. Cushilla causaita charichunmi ayudan (Salmo 1:​1-3).

IMA BENDICIONGUNATATA CHASQUIPASHCANI.

Pundacunapica ñucamandallatami millanayachirin carcani. Shinapash cunanbica concienciapipash tranquilomi sintirini. Cunanga ali causaitami charini Jehová Dios ñucata perdonahuashcata, ayudahuajushcatami sintini. Huata 2000​pica Jehová Diosta tucui shungu juyaj Karolin shuti huarmiguhuanmi cazararcani. Ñuca huarmiguhuanga tranquilo, cushillami causapanchi. Ñucanchica Jehová Diospa limpio organizacionbi cashcamanda, juyaihuan trataj organizacionbi cashcamandaca ninandami cushijupanchi.