Jaimecaa ninmi: “39 huatacunata cazarashca jipami, ñuca huarmigu Sofiaca, unaita ungushca cashpa huañuparca. Ñuca amigocunapash siempremi cumbanajuhuarca, ocupadomi carcani. Shinapash, shuj huata enterotami shunguta imahuanbash tujsijpishna ninanda llaquirijun cariani. Asha ratotaca alillatami sintirin carcani. Shinapash ñapashmi llaquiyan carcani. Ñuca huarmigu huañushcamandaca, ñami casi quimsa huatacuna pajtamujupan. Shinapash huaquinbica llaquinayanrami” nin.

Quiquinbash shuj familia huañujpichari, Jaimeshna llaquilla capangui. Huarmi o cusa, familia, o shuj alipacha rijsi huañujpica, tucuicunallatami ninanda llaquiripanchi. Psiquiatría nishcamanda parlaj shuj revistapica ninmi: “Familiapi pipash huañujpica, unaitapachami gentecunaca llaquirin” nishpa. Pipash huañujpica ninanda llaquirishpachari tal vez pensanman: “¿Ima horacamanda cashna llaquilla sintirigrini? ¿Ima horashi cutin cushilla caita ushasha? ¿Imashinata alillata sintiri ushasha?” nishpa.

Cai revistapimi chai tapuicunataca yachajupashun. Cati temapica, familiapi pipash huañujpi, ima llaquicunalla tiajtami ricupashun. Chaishuj temacunapica, chai llaquicunata aguantangapaj imacunatalla rurai ushashcatami ricupashun.

Familiapi pipash huañushcajpica, cai revistaguta liishpa alillata sintirichunmi munapanchi.

Gentecunaca na tucuicunachu igual capanchi. Chaimi familiapi pipash huañujpica, huaquingunaca ninanda llaquirin, cutin shujcunaca llaquilla cashcataca na ricuchinllu. Llaquilla cashcata ricuchina o parlanaca alimi can. Shinapash, familiapi pipash huañujpica, shuj shuj costumbrecunata charimanda o imashinapash viñashca cashcamandami llaquilla cashcataca shuj shuj formacunapi ricuchipanchi.

¿IMA LLAQUICUNALLATA RICURIN?

Familiapi pipash huañushca jipa ima llaquicunalla tianataca casi na yacharinllu. Shinapash casi siempremi gentecunaca cashna pasan:

Ratomi cambianlla. Familiapi pipash huañujpi huacajuna, ricunayachishpa llaquirijuna, cushillashnalla cashpata ñapash llaquiyanaca normalmi can. Huaquinbica, imatapash yarishpa, o parlajushcata purijushcacunataiman muscushpami ashtahuan llaquirin. Callaripica huañui tiashcataca casi na cri usharinllu. Teresaca ninmi: “Ñuca cusagu cungashcapi huañujpica, imata nita, imata ruraitaca na atinarcanichu. Huacaitapash na usharcanichu. Ninanda pinarimandaca samaita cacharitallapash na usharcanichu. Muscujunshnami carcani” nishpa.

Yapata pinarin, culirarin, o nali sintirin. Ivanga ninmi: “Ñucanchi churigu 24 huatacunata charishpa huañujpica, ñuca huarmiguhuanrami culiralla purinajurcanchi. Ñucanchicuna shina cashcataca na yarcanchichu. Imamandata ñucanchi churigutaca na ashtahuan ayudarcanchi yashpami, ñucanchimandallata nali sintirin carcanchi” nin. Alejandroca paipa huarmigu unaita ungushca cashpa huañujpimi nirca: “Ñuca nali cajpimi Taita Diosca cashnapacha sufrichihuanyarin yarcanimi. Shinapash jipamanga, Taita Diostarami culpajuni yashpami ashtahuan nali sintirin carcani” nin. Callari temapi parlashca Jaimeca ninmi: “Huaquinbica, ñuca huarmigu ña huañushca cajpipash, imamandata huañurcangui nishpami paihuanra culirashpa ñucallata nali sintirin carcani. Shinapash ñuca huarmiguca na culpata chariparcachu” nishpa.

Na aliguta pensari ushanllu. Huañui tiashca ratocunapica, pandacunataiman pensashpami huaquinbica huañushcata uyashcashnalla, ricushcashnallaman sintirin. Cutin huaquinbica imata ruranajushcatapash cunganllami. Teresaca ninmi: “Huaquinbica ali parlashpa tiajushpatami, cuenta japijpica ñuca cusa imashina, imamanda huañushcata ñapash pensarijun cashcarcani. Imaguta rurashpapash, na yaipi rurai ushashpami preocuparin carcani” nin.

Sololla cangapaj munan. Familiapi pipash huañujpimi huaquingunaca, paicunalla cangapaj munashpa shujcuna chaipi cajpica ashata fastidiarin. Jaimeca ninmi: “Cazadocunahuan cashpa, solterocunahuan cashpapash na ali sintirinllu carcani” nishpa. Ivanba huarmi Yolandaca ninmi: “Huaquinguna quejarishpa parlanajujta uyashpaca, ñucashna jatun problemacunata charishpaca, imatashi ninman yashpami paicunataca nalicachishpa uyan carcani. Cutin shujcuna paicunapa huahuacunamanda cushijushpa parlanajujpica, paicunamanda cushijushpapash llaquillami sintirin carcani. Ñucapash, ñuca cusapash ñaupaman catingapami munan carcanchi. Shinapash, ñaupaman catitaca na ushanajurcanchichu” ninmi.

Saludpashmi afectarin. Familiapi pipash huañujpica, micuna ganaspash chingan, o ansiami imatapash micunayan, tsalayan, racuyan, puñuipash chingan. Aaronga ninmi: “Ñuca taita huañujpica, huata enterotami na ali puñui ushan carcani. Ñuca taitata yarishpami, tucui tutacuna chai horasllata rijcharin carcani” nishpa.

Alejandroca ninmi: “Na ali sintirishpami tauca viaje doctorpaman rircani. Shinapash doctorca, na imapash canguichu, sanomi cangui nihuarcami. Chaimi ñuca huarmigu huañujpi llaquirijuimanda ungushcashna sintirijushcata cuenta japircani” nin. Ungushcashna sintirijuna tiempohuan yalina cajpipash doctorpaman rinaca alimi can. Huaquinbica, yapata llaquirijujpimi ñucanchi cuerpopi defensacuna bajarishpa imapash ungüicuna japin.

Importante cosascunataca na ali rurai ushanllu. Ivanga ninmi: “Ñucanchi churigu Eric huañushcataca familiacunamanbash, rijsicunamanbash, paita trabajachidormanbash, paipa huasi dueñomanbashmi villana tucurcanchi. Papelcunatapash ruranami carcanchi. Shinallata, Ericpa cosascunahuan imata ruranatapash ricunami carcanchi. Shaijushca, llaquilla caimandaca chai cosascunata aliguta ruraitaca na ushanajurcanchichu” ninmi.

Huaquingunapaca, huañushcacuna imata ruranajushcata ruranaca shinllimi can. Teresaca ninmi: “Ñuca cusagumi bancopi paganacunata, cobranacunataca siempre ricun carca. Pai huañujpica ñucallata chai cosascunata rurana tucushpami ashtahuan pinarircani. Ñucallata tucuita ruraitaca na ushashachu yarcanimi” nin.

Imashinami ricupashcanchi, familiapi pipash huañujpica, ungushcashna sintirimanda, o imapash shuj llaquicuna ricurishcamandami, aguantashpa ñaupaman catinaca shinlli can. Ninanda llaquirijushpapash, huañui tiashca jipa ima llaquicunalla tiajta yachashpami, aguantai ushapanchi. Ama cungapanguichu, na tucui gentecunachu igual capanchi. Chaimandami, llaquirishcataca shuj shuj formapi ricuchipanchi. Ashtahuangarin, familiapi pipash huañujpi llaquirijuna normal cajta yachashpami, llaquilla quedashcacunaca alillata sintirita ushan.

¿CUTIN CUSHILLA CAITA USHASHACHA?

¿Imatata yaipi charina capangui? Cunanbi llaquilla sintirijujpipash, tiempohuanga chai llaquicunaca bajarishpami catinga. Cungaitapacha cungaitaca na ushapanguichu. Alillata sintirijujpipash huaquinbica, huañushca huata pactamujpi o cazarashca huata pactamujpimi, cutin llaquilla sintiririn. Shinapash tiempohuanga, taucacunami alillata sintirishpa paicuna imata ruranajushcata cutin rurai callarishca. Ñaupaman catichun familiacuna, rijsicuna ayudashpaca alipachami canman.

¿Mashna tiempotashi llaquilla catipangui? Huaquingunaca, huaquin quillacuna jipami alillata sintiri ushan. Shujcunaca shuj o ishcai huata jipa, o shujcunacarin tauca huatacuna jipami alillata sintirin.a Alejandroca ninmi: “Quimsa huatacuna jipami alillata sintiri usharcani” nishpa.

Pacienciata charipangui. Cada punllami aguantashpa catina capangui. Quiquinba llaquica na unaicamanllu tianga. Shinapash, alillata sintiri ushangapaj o ama unaicaman yapata llaquirijungapaca ¿imatata rurai ushapangui?

Pipash huañujpi llaquilla cajcunata ayudangapaca, ashtaca ayudacunami tian. Shinapash imashina ña yachajuparcanchi, gentecunaca shuj shuj caimandami, huaquingunaca shuj cosascunata rurashpa alillata sintirin, cutin shujcunaca shuj cosascunata rurashpa alillata sintirin.

Shinapash huaquin ayudacunaca ashtaca gentecunapami ali can. Especialistacunaca, Bibliapi imata nijujtallata nishpami gentecunataca alillata sintirichun ayudan.

1: FAMILIACUNA, RIJSICUNA AYUDACHUN SAQUIPANGUI

• 

  Huaquin especialistacunaca ninmi, familiapi pipash huañujpi chai llaquita aguantangapaca, familiacuna, rijsicuna ayudachunmi saquina can nishpa. Shinapash huaquinbica quiquinlla cangapaj munashpachari shujcuna ayudangapaj munajpica ashata fastidiaringui. Shinapash shina sintirinaca normalmi can.

• Na siempre cumbachun minishtishpapash, na solollachu cana capangui. Huaquinbica jipacunamanmi shujcuna cumbachun minishtirin. Imaguta minishtijushcata o na minishtijushcatapash aligumanmi nina capangui.

• Quiquinllata imata minishtijujta ricushpami, mashna tiempota shujcunahuan canata o sololla canatapash ricuna capangui.

BIBLIAPICA NINMI: ‘Shujllapa randica, ishcaipura [canami] ashtahuan ali. Shinami, shuj urmajpipash, shujca paipa cumbata jatarichinga’ nishpa (Eclesiastés 4:9, 10).

2: MICUNAPI CUIDARIPANGUI EJERCICIOTAPASH RURAPANGUI

• Micunapi cuidarishpami, llaquilla cashpapash alillata sintiri ushapangui. Frutacunata, verduracunata, na yapa frito micunacunatami micuna capangui.

• Yacutapash, jugocunatapashmi ufiariana capangui.

• Micuna ganasta na charishpaca, ratogu ratogumi imagutapash micujuna capangui. Shinallata doctortapashmi tapuita ushapangui, ima vitaminacunatata ufiai ushapani nishpa.a

• Ligerolla purina o ejerciciota ruranapashmi alillata sintirichun ayudaita ushan. Huaquingunaca ejerciciota rurajushpami, ima pasashcata pensarishpa alillata sintirin. Cutin shujcunaca, ama pensaringapami ejerciciota ruran.

BIBLIAPICA NINMI: “Pipash paipaj cuerpotallataca na millanayachinllu. Ashtahuangarin aliguta micushpa alichirinatami yachan” nishpa (Efesios 5:29).

3: ALI PUÑUSHPA SAMAPANGUI

• 

  Puñunaca minishtirishcapachami can. Shuj familia huañushcamanda llaquirijcunaca, ashtacatami shaijun. Chaimi paicunaca ashtahuan puñushpa samana can.

• Huaquin tragocuna, yana cafepash puñuita chingachinllami. Chaimi chaicunataca na yapata ufiana capangui.

BIBLIAPICA NINMI: ‘Ninanda trabajashpa shaijunapa randica, ashaguta samanami ashtahuan ali’ can nishpa (Eclesiastés 4:6).

4: IMA ALI CANATA RICUPANGUI

• 

  Familiapi pipash huañujpi llaquirishpapash, na tucuicunachu shinallata llaquirinchi. Chaimi, alillata sintiri ushangapaca, quiquinba ima ali canata ricuna capangui.

• Familiapi huañui tiajpica, llaquilla cashcata parlanatami huaquingunaca gushtan, cutin shujcunaca na gushtanllu. Especialistacunaca ninmi, imashina sintirijushcata parlanaca minishtirishcami can. Shinaca, parlangapaj munashpapash na ushashpaca, shuj alipacha rijsimanmi imashina sintirijushcataca ashagu ashagu parlai ushapangui.

• Huaquingunaca huacashpami alillata sintirin. Cutin shujcunaca llaquirishpapash ashagutallami huacan.

BIBLIAPICA NINMI: ‘Maijan cashpapash paipa shungupi ninan llaquihuan, nanaihuan cajtaca [paillatami] yachan’ nishpa (2 Crónicas 6:29).

5: NALIPICA AMA URMAPANGUICHU

• 

  Familiapi pipash huañujpimi huaquingunaca, ama yapata llaquirijungapaj ashtaca tragota, drogacunata, jambicunata ufian. Chaita ruranaca nalichu can. Shuj ratoguta ali sintirishpapash, jatun llaquicunapimi urmaita ushapangui. Alillata sintiringapaca shuj cosascunatarapashmi rurana capangui.

BIBLIAPICA NINMI: ‘Ñucanchi cuerpota mapayachinamandaca anchuchinami canchi’ nishpa (2 Corintios 7:1).

6: TIEMPOTACA ALI APROVECHAPANGUI

• Huaquingunaca imashina sintirijushcatami shuj ratoguta parlan. Cutin shuj ratogutaca, shuj cosascunapi pensaringapami imagutapash ruran.

• Shujcunata rijsingapaj o ña rijsishcacunahuan ashtahuan ali llevaringapaj esforzarishpa, o shuj cosascunata ruranata yachajushpami alillata sintiri ushapangui.

• Asha ashami shuj cosascunata pundapi churai callarishpa, shuj cosascunata rurashpa ñana yapata llaquirijupangui.

BIBLIAPICA NINMI: ‘Tucuipami [tiempo tian]. Huacangapapash, asingapapash’ nishpa (Eclesiastés 3:1, 4).

7: IMATA RURANATA MASCAPANGUI

• 

  Uchallami imagucunatapash rurai callarina capangui.

• Puñuna horaspi puñushpa, trabajashpa, shuj cosasgucunatapash rurashpami cutin alillata sintiri callaripangui.

• Ali cosascunata rurashpa, chaicunapi ocupado cashpami, ñana yapata llaquirijupangui.

BIBLIAPICA NINMI: ‘Paipa shungupi ninan cushijuita cushpa’ Taita Dios ocupado charijpimi, ‘paipa causai punllacunataca, na yapa yarishpa causanga’ nishpa (Eclesiastés 5:20).

8: NA MUSPARISHPACHU DECIDINA CAPANGUI

• Pipash huañushca jipallami ashtacacunaca jatun decisiongunata rurashpa jipamanga arripintirinajun.

• Huasita, trabajota cambiangapaj munajushpa o huañushcapa cosascunahuan imata ruranata decidigrijushpaca, mejor ashaguta shuyashparapashmi ali canman.

BIBLIAPICA NINMI: ‘Aliguta yarishcahuanga, ashtacatapachami charinga. Ashtahuangarin yapata musparishpa [rurajcunaca] imagupash illajmi tucunga’ nishpa (Proverbios 21:5).

9: YARISHPA CATIPANGUI

• 

  Ashtacacunaca, paipa huañushca familiata yarishpa catingapaj esforzarishpami ali sintirin.

• Huañushcapa fotogucunata o imapash cosasgucunata ricunalla pushtugucunapi, o imapash importante fechacunata anotashpa charishpami alillata sintiri ushapangui.

• Ña alillata sintirijushpa ricungapami, cushilla cashcata yarichij recuerdocunataca alichina capangui.

BIBLIAPICA NINMI: “Punda huatacunata yarichiyari” nishpa (Deuteronomio 32:7).

10: HUAQUIN PUNLLACUNATA SAMAPANGUI

• Huaquin punllacunata samanatami yaipi charina capangui.

• Na vacación llujshi ushashpapash, shuj o ishcai punllagutami, maimanbash tranquilo puringapaj, o shuj ladocunapi parquecunata rijsingapaj rita ushapangui. O busta japishpami buspi tiajushpallata imagutapash gushtashpandi rita ushapangui.

• Imagupipash ashaguta cambiashpallatami alillata sintiri ushapangui.

BIBLIAPICA NINMI: ‘Jichushca pambapi ashaguta samangapaj jacuchi nishpami Jesusca, paipa yachajujcunata nijurca’ nishpa (Marcos 6:31).

11: SHUJCUNATA AYUDAPANGUI

• 

  Shujcunata ayudashpaca quiquinllatami ali sintiripangui.

• Callaringapaca, maijanbash familia o shuj alipacha rijsi huañushcamanda llaquilla cajcunatami imagupipash ayudai ushapangui. Paicunapash llaquilla cashcataimanmi tal vez parlangapaj munanajunga.

• Shujcunata ayudashpa, cushichishpami quiquinbash cutin cushilla sintirishpa, imagutapash rurashpa catina munaita charipangui.

BIBLIAPICA NINMI: “Carajpi japijcunatapash yalimi carajcunaca, ninanda cushijun” nishpa (Hechos 20:35).

12: IMA ASHTAHUAN IMPORTANTE CAJTAMI CUTIN PENSARINA CAPANGUI

• Huañui tiajpimi, ima ashtahuan importante cajta cutin pensarita ushapangui.

• Quiquinba causaipi imata rurajushcata pensaringapami aprovechana capangui.

• Aliguta ricushpami, ima ashtahuan importante cajta pundapi churana capangui.

BIBLIAPICA NINMI: “Jatun micuita ruranajuj huasiman rinapaj randica, huañui tiaj huasiman rinami ashtahuan ali. Chai punllami, tucui runacunapaj causaica tucurin. Causaj runaca chaita ricushpami, shungupi [pensaringa]” nishpa (Eclesiastés 7:2).

Cabalta parlashpaca, imata rurashpapash alipacha sintiritaca na usharinllu. Shinapash, ashtacacunaca cai revistapi ali yuyaicunata catishpami, familiapi pipash huañujpica alillata sintiri ushashca. Alillata sintiringapaca shuj yuyaicunapashmi tian. Shinapash cai revistapi yuyaicunata catishpaca alillata sintiri ushashcatami cuenta japipangui.

CAI HUATACUNAPICA ASHTACATA ESTUDIASHPAPASH, familiapi pipash huañujpica, Bibliapi consejocunahuanllatami especialistacunapash alillata sintirichun gentecunataca ayudashca. Bibliapi consejocunaca alipachami can. Chai consejocuna alipacha cajpipash, Bibliapica shuj yuyaicunapashmi tian. Shinaca, huañuj tiajpi alillata sintirichun Bibliapi yuyaicuna imashina ayudajta ricupashun:

• Ñucanchi huañushca familiacuna na maipipash sufrinajujta yachachunmi ayudan

  Eclesiastés 9:5​pica ninmi: “Huañushcacunaca imatapash na yachanllu” nishpa. Tucui imata pensajushcapash chaipimi tucurin (Salmo 146:4). Chaimandami Bibliapica nin, huañuica puñujui cuendami can nishpa (Juan 11:11).

• Ñucanchita juyaj Taita Dios cushichinata crichunmi ayudan

  Bibliapica ninmi: “Mandaj Diosca,a [alita] rurajcunatami ricuriajun. Paicuna caparishpa mañanajujtaca, aligutapachami uyariajun” nishpa (Salmo 34:15). ¿Ali sintiringapalla o ñucanchi pensamientocunahuan ama musparijungapallachu Taita Diostaca mañanchi? Na. Ñucanchita cushichij Taita Diosman quimiringapami mañapanchi.

• Ali causaiguta charichunmi ayudan

  Bibliapica cutin cutinmi nin, huañushcacunaca causaringami nishpa. Shamuj punllacunapi, cai Alpapi ali causai tianata parlashpaca ninmi: “Taita Diosmi, paicunapaj ñavimandaca, tucuilla viquita fichanga. Huañuipash, huacaipash, llaquipash, nanaipash, na ashtahuan tiangachu” nishpa (Apocalipsis [Revelación] 21:3, 4). Alipacha causaimi tianga.

Jehová Diospi crij ashtaca gentecunaca, huañushcacuna causarinata crishpami, pipash huañujpica alillata sintiri ushashca. 65 huatacunata cazarashca jipa, paipa cusagu huañujpimi Anaca nirca: “Bibliapica ninmi, huañushcacunaca na maipipash sufrinajunllu, Taita Diosca paipa yuyaipi cajcunataca causachingami nishpa. Ñuca cusagu huañushcata aguantanaca shinllipachami cashca. Shinapash Biblia ima nijta yarishpami animarini” nin.

Ñaupa temacunapi parlashca Teresaca ninmi: “Ñuca cusagu huañushca punllamandapachami, Taita Dios ayudajujta sintishcani. Ninanda llaquirijuj ratocunapica paimi ñuca maquimanda japinshna ayudajuhuashca. Bibliapi nishca shinaca, huañushcacuna causarinata crishpami, ñuca cusagutaca cutin ricushami yashpa ñaupaman cati ushapani” nin.

Cai mundopica tauca millón gentecunapashmi Bibliapi crishpa huañushcacuna causarinataca yaria can. Shinapash Biblia imata nijta na cri ushashpaca, Biblia imatalla nijta, imamanda shina nijtami quiquinllata ricui ushapangui. Shinami cuenta japipangui Bibliaca ashtacatapacha animajta.

¿HUAÑUSHCACUNA CAUSARINATA ASHTAHUAN YACHANGAPAJ MUNAPANGUIMANLLU?

Internetpi jw.org direccionbimi chai temamanda parlaj videocunata ricui ushapangui.

¿HUAÑUSHCA JIPACA IMATA TUCUNCHI?

Bibliapica huañushca jipa ima pasajta parlashpami ñucanchitaca tranquilo sintichin.

PUBLICACIONGUNA > VIDEOCUNA nishcaman yaicushpa (BIBLIAPA YACHACHISHCACUNA›CUSHILLA, TRANQUILO CANAMANDA nishcaman yaicupangui)

¿ALI VILLAICUNATA UYANGAPAJ MUNAPANGUIMANLLU?

Ashtaca nali noticiacuna tiajpipash ¿imapash ali noticiacuna tianllu?

BIBLIAPA YACHACHISHCACUNA > CUSHILLA, TRANQUILO CANAMANDA nishcaman yaicupangui