Quimsa Punlla Jatun Tandanajuipa huaquin yuyaicuna

Jatun tandanajuipa horario. Tandanajuica quimsandi punllatami 9:20​ta callaringa. Shinapash pungucunataca ñami las 8​ta pascanga. Tandanajuita ali callaringapaca canticopa musicacuna uyarijpillatami ña tiarina canchi. Viernesta, sabadotaca las 5:00​tami tucuringa. Cutin domingotaca las 4:00​tami tucuringa.

Candashpa Jehová Diosta alabashunchi. Ñaupa punllacunapipash Jehová Diosta sirvijcunaca candashpami Jehová Diosta alaban carca. Cunan punllacunapipash candashpami Jehovata alabanchi (Sal. 28:7). Tucui Quimsa Punlla Jatun Tandanajuicunami canticopa musicacunahuan callarin. Canticopa musicacunaca jatun tandanajui callarishcata ricuchingapaj, Jehová Diosta alabangapaj, paimanda ashtahuan yachajungapami can. Chaimandami, jatun tandanajuipa presidente de la sesión huauqui canticopa musicacunaca ñami callarigrin nijpica, ñucanchi asientocunapica ñami tiajuna canchi. Canticopa musicacunatapash alimi uyana capanchi. Shinami ñucanchi organizacionba orquestapi ayudashca huauquipanicunapa trabajota ninanda alicachishcata ricuchishun. Paicunaca tucui ñucanchicuna juyailla canticopa musicacunata uyachunmi, chai canticocunata grabangapaca paicunallata paicunapa gastocunata pagashpa huatapi ishcai viajeta Patterson (Nueva York) llactaman rin. Canticopa musicacunata uyashca jipaca, canticocunata candashpami Jehová Diosta alabashun.

Parqueadero. Carrocunata ñucanchillata cuidajuimandaca na cobranajushunllu. Carrocunataca imashina chayashcapimi churashun. Parqueaderocunaca uchillami can. Chaimandami shujlla carropi pactajcunaca shujlla carropi rishpa ali canman. Discapacitadocunapa nishca partecunapica paicunata apaj carrocunatallami churana can.

Asientocuna. Pungucunata pascajpica ñucanchi munashca asientocunata japingapaca na musparishpa calpanachu canchi. Ashtahuangarin shujcunapimi preocuparina canchi. Huaquinbica ñucanchi na munashca asientocunapichari tiarina tucun. Shinapash shinami Diosta sirvijcuna cashcata ricuchishpa Diosta jatunyachishun (Juan 13:34, 35; 1 Cor. 13:4, 5; 1 Ped. 2:12). Asientocunataca ñucanchihuan causajcunapa, ñucanchihuan carropi rijcunapa o ñucanchihuan Bibliata yachajujcunapallami japina capanchi. Shinallata shuj asientocunata na ocupagrijushpaca asientocuna jahuapi na imatapash churajunachu canchi. Mayorcunapa, ungushcacunapa sillacunaca na ashtacacuna tianllu. Chaimandami huaquinbica, na tucui familia paicunahuan tiarita ushanchi. Shinaca mayorcunalla, ungushcacunalla, paicunata ayudajcunalla chai sillacunapi tiarichunmi saquina canchi.

Aliguta mudarishunchi. Jatun tandanajuiman rishpaca aligutami mudarina canchi. Cai mundopi gentecunashnaca na maipash cachun ropata churajunachu canchi (1 Tim. 2:9). Shinallata hotelman chayajushpa, hotelmanda ña rinajushpa o tandanajui jipa maipi purigrishpapash pinganayai o maipash cachun ropataca na churajunachu canchi. Shinami tarjeta de solapata churajushpaca cushilla sintirishun, oportunidad tiajpica na pinganayachishpami Diospa Shimimandapash villachishun. Aliguta mudarishpa, aliguta portarishpaca shujcunapash Diospa Shimimanda yachajuna munaita charichunmi ayudashun. Jehová Diostapash jatunyachishun (Sof. 3:17).

Celular, tablet o shuj aparatocunapash. Jatun tandanajuiman celularta o shuj aparatocunata apangapaj munashpaca, shujcunata ama molestangapami programana canchi. Camarata, filmadorata, tabletta o shuj aparatocunata apashpapash shujcunapa ñaupajpica na shayarijunachu canchi. Jatun tandanajuipi cashca horas shujcunaman mensajecunata na yangata cachashpami shujcunata respetashcatapash ricuchishun.

Micuna. Chaupi punlla micunata randingapaj llujshijunapa randica ñucanchillatami micunataca apana capanchi. Shinapash asiento ucupi pactana cosascunapillami micunataca apana capanchi.

Contribucionguna. Jatun tandanajui tiashcamanda agradicishcata ricuchingapaca obra mundial nishca cajacunapimi contribuciongunataca churana canchi. Chequepi cungapaj munashpaca “Testigos de Jehová” nishpami churana canchi.

Jambicuna. Doctor mandajpi jambicunata ufiajushpaca jambicunataca apashpami rina canchi. Jatun tandanajuipica ñucanchi minishtijushca jambicunataca na charingachu. Diabetes ungüita charishpa jeringuillacunata utilizana cashpaca, jeringuillacuna peligroso cashcamandami utilizashca jipaca na maicunapipash yangata shitanalla canchi. Jatun Tandanajui Huasipa basurerocunapi, mingarishca huasicunapa basurerocunapi o hotelcunapa basurerocunapipash jeringuillacunataca na shitanachu canchi.

Zapatocuna. Taco zapatocunata churajuimandaca tucui huatacunami llaquicuna tiashca. Chaimandami rejillacunapi, gradascunapi ama urmangapaca ali agllashpa zapatocunataca churajuna canchi.

Sordolla gentecuna. Jatun tandanajuipa programataca FM bandapimi sordollacunaca chai localpillata uyai ushanga. Uyangapaj munashpaca shuj uchila radiotami pilacunahuan, audifonocunahuan apana can.

Huahuacunata apana cochecuna. Huahuacunapa cochecunataca na apanachu can. Shinapash, asientopi churashpa huahuacunata tiachinalla sillacunata charishpaca apanallami can.

Perfumecuna. Jatun tandanajuicunata ruraj huaquin ucucunapica huaira maita yaicunaca na tianllu. Huaquingunaca alergiacunata o imapash ungüicunatami charin. Chaimandami paicunapi preocuparishpa na yapata perfumeta o coloniata churarina canchi (1 Cor. 10:24).

Persona que mostró interés (S-43) hoja. Jatun tandanajui punllacunapi gentecunahuan Bibliamanda parlashpa ashtahuan yachajungapaj munajpica, Sírvase visitar hojapimi paipa shutita, direccionda anotana canchi. Chai hojataca Departamento de Publicacionesmanmi cuna can o jatun tandanajuimanda tigrashca jipami chai hojataca congregacionbi secretarioman cuna can.

Restaurantecuna. Restaurantecunapipash ali portarishpami Jehová Diospa shutita alabanchi. Jesusta ali catijcuna cashcamandaca aliguta mudarishpami rina capanchi. Costumbre cajpicarin ñucanchita atindishcamandaca asha culquiguta paicunaman cunallami canchi.

Servicio voluntario. Ayudangapaj munashpaca, Departamento de Servicio Voluntarioman rinallami canchi. Nara 16 huatacunata charijcunapash ayudanallami can. Shinapash paicunataca taitamamacuna o shuj huauquimi ricuriana can.