Jehová Diosta sirvijcunaca nalita ruranamanda caruyanami can

1. Testigo de Jehovacunapaca ¿imata importantepacha can?

TESTIGO de Jehovacunapaca Taita Diospa shutica importantemi can. Chaimandami maijanbash edificio huasipi o museo nishca ucupi Taita Diospa shutita ricushpaca ashtacata cushijunchi. Testigo de Jehovacunallami Taita Diospa shuti Jehovataca ninanda utilizanchi. Shinapash Jehová Diospa shutita charinaca shuj jatun responsabilidadmi can.

2. Jehová Dios ñucanchita alicachichunga ¿imatata rurana capanchi

² Jehová Dios ñucanchita alicachichunga paipa shutita utilizashpapash paipa mandashcacunataca cazunami canchi. Chaimandami Bibliapica nin: ‘Nalita ruranamanda anchurichi’ nishpa (Sal. 34:14). Apóstol Pablopash Diospa shutita charina shuj jatun responsabilidad cashcata ricuchingapami nirca: ‘Jehová Diospa shutita charijcunaca nalita ruranamanda caruyachun’ nishpa (2 Tim. 2:19, NM). Shinaca ¿imashinata testigo de Jehovacunaca nalita ruranamanda caruyashun?

‘NALITA RURANAMANDA CARUYAICHI’

3, 4. a) Biblistacunaca ¿maijan textotata aliguta intindingapaj munashca? b) ¿Imamandata na ali intindi ushashca?

³ (2 Timoteo 2:19, liingui.a) Cai textopica “huasichi callaringapaj Taita Dios churashca rumimandami” apóstol Pabloca parlajun. Chai rumi sellascapica nijunmi: “Jehová Diosca paipalla cajcunataca rijsinmi” nishpa. Cai shimicunataca Números 16:5​manda japishpami apóstol Pabloca parlajurca (punda temata ricupangui). Chai rumi sellashcapica nijurcapashmi: “Jehová Diospa shutita charijcunaca nalita ruranamanda caruyachun” nishpa. Chai shimicuna maijan textomanda cashcataca biblistacunapash na ali intindi ushashcachu. ¿Imamandata na ali intindi ushashca?

⁴ Pundapica Escrituras Hebreaspi maijanbash textomanda parlajunshnallami can. Shinapash Escrituras Hebreaspi textocunahuan ricujpica ni shuj textohuan na igualanllu. Chaimandami maijan textomanda cashcataca na cabal yacharin. Shinapash 2 Timoteo 2:19​pi callari shimicunataca Números capítulo 16​manda japishpami apóstol Pabloca Coré na cazushcata parlajurca. Shinaca ¿2 Timoteo 2:19​pa cati shimicunapash Números capítulo 16mandallatachu parlajun?

5, 6. Coré, Datán, Abiramga ¿imatata rurarca? (Callari dibujota ricupangui.)

⁵ Bibliapica ninmi, Eliabpa churi Datán, Abiramga Corehuan tandanajushpami Moisesta, Aarondaca na cazungapaj munarca nishpa (Núm. 16:1-5). Paicunaca nimapa na Moisestaca respetanllu carca. Jehová Dios Moisesman autoridadta cushca cajpipash na cazungapaj munarcachu. Paicunaca Jehovata ali sirvij israelitacunapurapi causashpami shujcunatapash espiritualmente llaquichinajurca. Shinapash Jehová Diosca ricujurcami. Chaimandami picuna paita ali sirvinajujta, picuna nali sirvinajujta ricuchirca. ¿Imashinata ricuchirca?

⁶ Bibliapica ninmi: ‘Mandaj Diosca Moisestaca nircami: Tandanajushca israelitacunamanga villangui: “Coré, Datán, Abiram shuti runacuna causanajuj carpa muyundi ladomandaca anchurichi” nishpa. Shina nijpimi Moisesca Datanbaman, Abirambaman rirca. Chaiman rijujpica israelitacunata mandaj rucucunapashmi Moisesta catishpa rirca. Moisés chaiman chayashpaca israelitacunamanga villarcami: “Diosta na manllaj cai runacunapa carpacunamanda anchurichi. Paicunapa juchacunamanda ama paicunahuan huañungapaca, paicuna ima charishcatapash napacha tacarinachu canguichi” nishpa. Shina nijpimi. Corepa, Datanba, Abiramba carpa muyundimandaca anchurinajurca’ (Núm. 16:23-27). Chaipimi Jehová Diosca paita na cazujcunataca tucuchirca. Cutin paita cazushpa nalita ruranamanda caruyajcunaca causashpami catirca.

7. ¿Moisespa punllacunapi ima pasashcatata apóstol Pabloca 2 Timoteo 2:19​pica parlajushcanga?

⁷ Jehová Diosca paipalla cajcunataca alimi rijsin, tucui shunguhuan sirvinajujtapash alimi yachan. Jehová Diosta tucui shunguhuan sirvinajushpapash nalita rurajcunamandaca caruyanami carca. Shinaca ‘Jehová Diospa shutita charijcuna nalita ruranamanda caruyachun’ nishpaca, Números 16:5, 23-27​mandami apóstol Pabloca parlajushcanga. ¿Imamandata shina ninchi? 2 Timoteopi 2:19pa callari shimicunaca Números 16:5, 23-27​pi shimicunamandami parlajun. Shinaca 2 Timoteopi 2:19pa cati shimicunapash chai textocunamandallatami parlajunga.

“MUSPAYACHIJ PARLOCUNATACA, NA UYANACHU CANGUI”

8. Taita Diospa shutita yachashpapash o Jesusta catijcunahuan tandanajushpapash ¿imatata rurana capanchi?

⁸ Jehová Diospa ñaupajpi Timoteo ali ricurishpa catichunmi, apóstol Pabloca Moisespa punllacunapi ima pasashcata Timoteomanga yarichijurca. Coretapash 250 israelitacunatapash cutin yarishun. Paicunaca Taita Diospa shutita ali yachashpapash tucuchi tucurcami. Shinaca Jesusta catijcunahuan tandanajushpapash ¿imatata Jehovata sirvijcunaca rurana can? Jehová Diosta sirvijcunaca tucuicunami ‘nalita ruranamanda caruyana’ can. Shinaca ¿imashinata Timoteoca nalita ruranamanda caruyarca? Cunan punllacunapi Jehová Diosta sirvijcunaca ¿imatata apóstol Pablopa consejomandaca yachajunchi?

9. ‘Muspayachij parlocunaca’ ¿imashinata apóstol Pablopa tiempopi huauquicunataca pandachijurca?

⁹ Nalita ruranamanda caruyachunmi 2 Timoteo 2:19​pa punda textocunapica nin, ‘yanga parlocunamandaca’ na ‘fiñanajushpa rimarijunachu’ canguichi nishpa (2 Timoteo 2:14, 16, 23, liingui). Chai punllacunapi huaquin huauquicunaca Taita Diosmanda caruyashpami shuj huauquicunamanga pandacunata yachachinajurca. Cutin shujcunaca imapash yuyaicunamanda parlashpami congregacionbi huauquicunataca fiñanajuchishpa separanajurca. Chaimandami apóstol Pabloca Timoteotaca nirca: “Muspayachij parlocunataca, na uyanachu cangui” nishpa.

10. Taita Diosmanda caruyashpa pandata yachachijcunahuan tuparishpaca ¿imatata rurana capanchi?

¹⁰ Cunan punllacunapica Jehová Diosmanda caruyashpa congregacionbi pandacunata yachachichunga na saquinllu. Shinapash huaquingunaca Bibliapi na yachachishca yuyaicunatami charin. Chai yuyaicunataca pi nijujpipash na uyanachu canchi. Taita Diosmanda caruyashpa pandata yachachijcunahuanga ñucanchilla cashpa o Internetpi cashpapash nimamanda na parlajunachu canchi. Chai gentecunata intindichingapami parlajuni nijushpapash apóstol Pablopa consejotaca na cazunajunchimanllu. Jehovata sirvijcunaca pandata yachachijcunataca nimapa na uyangapaj munanchichu.

11. a) Huaquinbica ¿imamandata ‘muspayachij yanga parlocunaca’ fiñanajuchin? b) Ancianocunaca ¿imashinata ali ejemplota ricuchi ushan?

¹¹ Diversiongunamanda parlashpaca huaquin huauquicunaca shuj shuj yuyaicunatami charin. Chai parlocunapash ‘muspayachij yanga parlocunami’ can. Chai parlocunapashmi congregacionbi huauquicunataca fiñanajuchin, separanbash. Shinapash Bibliapi mandashcacunata na cazushpa nali diversiongunata agllanajujpica ¿imatata ancianocunaca ruran? Ancianocunaca congregacionbi fiñanajui tiachunga na munanllu. Shinapash na chaimandallachu congregacionbi nali ruraicuna tiachun saquinga (Sal. 11:5; Efes. 5:3-5). Bibliapica ancianocunataca ninmi, tucuicunata ‘Taita Diospa llamagucunatashna ricuriashpa michipanguichi, na yapata mandanachu canguichi. Cangunata ricushpa catichunmi, aliguta causana canguichi’ nishpa (1 Ped. 5:2, 3; 2 Corintios 1:24, liingui). Shinaca congregacionbi ricuriajushpapash ancianocunaca na paicunapa yuyaicunata catishpa mandanajunachu can.

12, 13. a) Diversiongunata agllagrijushpaca ¿imatata testigo de Jehovacunaca ruran? b) Diversiongunata agllagrijushpaca ¿Bibliapa maijan consejocunatata catina capanchi? c) Párrafo 12pi consejocunaca ¿imacunapipashta ayudai ushan?

¹² Bibliapica cada unotami nin: ‘Ali yuyaicunata charishpa aliguta yachajushca cashpami alita, nalitapash yachai ushanguichi’ nishpa (Heb. 5:14). Chaimandami Jehovapa organizacionga, cai peliculataca na ricunachu cangui, cai musicataca na uyanachu cangui o cai librotaca na liinachu cangui nishpaca na nin. Ima diversionda agllagrijushpapash Bibliapi imata consejajujta ricushpami cada uno diversiongunataca agllana canchi. Imata ruragrijushpapash ‘Taita Diospa ñaupajpi ali ricurinatami mascana’ canchi (Efes. 5:10, NM). Bibliapica ninbashmi, taitacunami paipa familiataca aliguta ricushpa mandana can nishpa. Shinaca paimi paipa familiamanga ninga, ima diversiongunata na agllana cashcata (1 Cor. 11:3; Efes. 6:1-4).

¹³ Ñaupa parrafopi Bibliapa consejocunaca na diversiongunapillachu ayudai ushan. Huaquingunaca ropamanda parlashpa, imashina mudarinamanda parlashpa, maijan jambita ufianamanda parlashpa o imata micunamanda parlashpaca shuj shuj yuyaicunatami charin. Shinapash, Bibliapa mandashcacunata na huashaman saquijujpica na chaicunamanda fiñanajunachu canchi. Taita Diosta sirvijcunaca ‘pihuanbash na fiñanajushpa, aliguta causanatami’ munanchi (2 Tim. 2:24).

NALI CUMBACUNAMANDA CARUYASHUNCHI

14. Nali cumbacunamanda parlangapaca ¿ima chimbapuraitata apóstol Pabloca churarca?

¹⁴ ‘Jehová Diospa shutita charijcunaca nalita ruranamanda caruyangapaj’ munashpami nalita ruraj cumbacunamandapash caruyana canchi. Apóstol Pabloca ‘huasichi callaringapaj Taita Dios churashca rumimanda’ parlashca jipaca, shuj jatun huasimandapash parlashpami nirca: ‘Jatun huasipica orotalla, culquitalla rurashca [cosascunaca] na tianllu. Alpata, caspita rurashca [cosascunapashmi] tian. Huaquinga alicachingapallami tian. Cutin shujcunaca nalipallami tian’ nishpa (2 Tim. 2:20, 21). Imashinami ricunchi, Jesusta catijcunataca apóstol Pabloca consejajurcami, ‘nalipa rurashcacunamandaca’ caruyanami canguichi nishpa.

15, 16. Apóstol Pablo parlashca ‘jatun huasimandaca’ ¿imatata yachajupanchi?

¹⁵ Apóstol Pabloca Jesusta catij congregaciondami shuj jatun huasihuan chimbapurarca. Cutin huauquicunataca huasipi charingapaj rurashca cosascunahuanmi chimbapurarca. Huasipi huaquin cosascunaca imapash mapacuna urmajpimi mapayashpa huaglin. Chaimandami chai cosascunataca cocinapi cosascunahuanga na chapun.

¹⁶ Jehová Diosta sirvijcunapash imahuanbash na mapayashpa limpio causaitami charingapaj munanchi. Chaimandami, maijanbash huauqui Jehovapa mandashcata na cazungapaj munajpica, chai huauquihuan cumba tucunataca cuidarina canchi (1 Corintios 15:33, liinguib). Congregacionbi huauquicunamandapash cuidarina cashpaca, canllamanda gentecunamandacarin ashtahuanmi cuidarina canchi. Canllamanda gentecunaca ‘charijyangapalla munajcuna, taitamamata na cazujcuna, Diosta na manllajcuna, yangata juchachijcuna, ima munashcata rurajcuna, na llaquijcuna, alitapash na ricunayachijcuna, Taita Diostapash na juyashpa, yanga cushijushpa causanatalla juyajcunami’ can (2 Tim. 3:1-5).

TUCUI SHUNGUHUAN SIRVIJPICA JEHOVÁ DIOSCA BENDICIANMI

17. Ali israelitacunaca ¿imashinata nalita ruranamanda caruyashcata ricuchirca?

¹⁷ Bibliapica ninmi, Corepa, Datanba, Abiramba carpa muyundimanda anchurichi nishpa mandajpica, israelitacunaca na ishcai shungu tucushpami ‘carpa muyundimandaca anchurirca’ nishpa (Núm. 16:24, 27). Paicunaca imapipash Corehuan, Datanhuan, Abiramhuan chapuringapaca na munarcachu. Shinami ali israelitacunaca Jehová Diospa lado tucushpa nalita ruranamanda caruyarca. Shinaca ¿imatata paicunamandaca yachajunchi?

18. ¿Imamandata apóstol Pabloca Timoteotaca nirca: ‘Chairalla viñaicunapa nalita ruranamandaca anchurinami cangui’ nishpa?

¹⁸ Ñucanchicunapaca Jehová Diospa ñaupajpi ali ricurinami minishtirishcapacha can. Chaimandami imacunamandapash paipa ñaupajpi nali ricurigrijushpaca uchalla imatapash rurana canchi. Apóstol Pabloca Timoteotaca nircami: ‘Chairalla viñaicunapa nalita ruranamandaca anchurinami cangui’ nishpa (2 Tim. 2:22). ¿Imamandata apóstol Pabloca shina nirca? Timoteoca ñami 30 huatacuna yali carca. Shinapash chairalla viñaicunapa nali munaicunataca mayorllacunapashmi charin. Chaimandami Timoteopash nalita ruranacunamanda caruyashpaca chairalla viñaicunapa nali munaicunamandapash anchurina carca. Jesusca nircami: ‘Canba ñavi imatapash nalita ricushpa rurachingapaj munajpica, surcushpa shitangui’ nishpa (Mat. 18:9). Cunan punllacunapi Jesusta catijcunapash chai consejota cazushpami nalita rurana munaicuna shamujpica ucha chaicunamandaca caruyan.

19. Jehová Diospa ñaupajpi ali ricurishpa catingapaca ¿imatata huaquin huauquicunaca rurashca?

¹⁹ Huaquin huauquicunaca nara Testigo tucushpaca machashpallami purin carian. Shinapash Testigo tucushpaca asha vinotallapash ufiangapaca na munanllu. Cutin shuj huauquicunaca nali munaicunata ama charingapami huaquin diversiongunapica na chapurin (Sal. 101:3). Shuj huauquipa ejemplota ricushun. Paica nara Testigo tucushpami jaricuna, huarmicuna millanaita bailanajuj bailecunaman rinata gushtan carca. Shinapash Testigo tucushpaca huauquipanicunalla fiestata ruranajujpipash nali munaicunapi ama cutin pensajungapaj, punda imashina purishcata ama yaringapami bailanataca na gushtan. Bibliapica na nijunllu, nimata na ufianachu canguichi, na bailanachu cangui nishpa. Shinapash nali munaicuna shamujpi Jehová Diospa ñaupajpi nali ricurishami yajushpaca, imacunamandapash uchami caruyana canchi.

20. ¿Imamandata shinlli cajpipash ‘nalita ruranamanda caruyana capanchi’?

²⁰ Jehová Diospa shutita charinaca shuj jatun bendicionmi can. Shinapash shuj jatun responsabilidadmi can. Chaimandami shinlli cajpipash ‘nalita ruranamandaca caruyana’ canchi (Sal. 34:14). ‘Nalita ruranamanda caruyajpica’ paipalla cashcata ricushpa, paita cazujta ricushpami Jehová Diosca ñucanchita juyanga (2 Tim. 2:19; 2 Crónicas 16:9a, liingui).