Bautizarishca jipapash ‘Taita Dios carashca mushuj causaiguta churajunshna’ causashpa catipaichi

1. ¿Imapita ñucanchicunaca imashina personacuna cashcata ricuchipanchi?

MASHNA tiempota bautizarishca cashpapash tucuicunallatami Jehová Dios munashcashna comportaringapaj munapanchi. Caita pactachi ushangapaca ñucanchicunaca ali pensarishpami causana capanchi. ¿Imamandata shina nipanchi? Ñucanchi parlashcacunami ñucanchicuna imashina personacuna cashcata ricuchin. Shinaca si ñucanchicuna nalicunata pensashpaca, nalicunata parlashpami nalicunatapash rurashun (Efes. 4:17-19). Cutin, si ñucanchi pensamientocunapi ali cosascunata charishpaca Jehová munashcashnami alicunata rurashpa ali cosascunatapash parlashun (Gál. 5:16).

2. Caipica ¿imatata yachajugripanchi?

² Ñucanchicunaca caishuj temapica, ñucanchipa nali pensamientocunamanda na tucuipi jarcarita ushashcatami yachajuparcanchi. Shinapash chai nali pensamientocuna shamujpi chaicunata ama rurangapaj esforzarita ushashcatapashmi ricuparcanchi. Shuj personaca nara bautizarishpallatami Jehová na gushtashca parlocunata, na gushtashca comportamientocunataca saquina can. Caita ruranami Jehová munashcashna causachun ayudanga. Shinapash Jehová Diosta tucuipi cushichingapaca pai carashca “mushuj causaitami ropata churajunshna churajuna capanguichi” (Col. 3:10, TNM). Cai yachajuipica Taita Dios carashca mushuj causaigu ima cashcata, shinallata chai causaiguta imashina ropata churajunshna churajushpa causanatami yachajugripanchi.

‘TAITA DIOSPA CARASHCA MUSHUJ CAUSAIGUCA’ ¿IMATA CAN?

3. ‘Taita Dios carashca mushuj causaigu’ nishpaca ¿imatata nijun? Chai causaigutaca ¿imashinata ropata churajunshna churajuna capanchi? (Gálatas 5:22, 23).

³ ‘Taita Dios carashca mushuj causaigu’ nishpaca, Jehová munashcashna imatapash rurashpa comportarina cashcatami nisha nin. ¿Imashinata cai causaigutaca mushuj ropata churajunshna churajushpa causana capanchi? Chaipaca Diospa espíritu santopa cualidadcuna ñucanchi parlocunapi, ñucanchi comportamientocunapi tucui ñucanchi causaipi ayudachunmi saquina capanchi (Gálatas 5:22, 23ta liipangui). Por ejemplo, ‘Taita Dios carashca mushuj causaigutaca ropata churajunshna’ causaj personaca Jehová Diosta, huauquipanicunatapash juyashcatami ricuchin (Mat. 22:36-39). Llaquicunata charishpapashmi cushilla cashpa catingapaj esforzarin (Sant. 1:2-4). Tucuicunahuan shuj tranquilo causaiguta charingapapashmi esforzarin (Mat. 5:9). Shujcunataca pacienciahuan, juyaihuanmi tratan (Col. 3:12, 13). Shinallata paipa causaipica alitalla ruranatami alicachin (Luc. 6:35). Paipa causaipica ruraicunahuanmi Jehová Diospi tucui shungu crishcatapash ricuchin (Sant. 2:18). Pipash culirachijpica na ñapash imatapash nalitaca ruranllu (Tito 3:2). Imapash nali ruraicunamandapashmi jarcarin (1 Cor. 9:25, 27).

4. Gálatas 5:22, 23​pi nishca cualidadcunataca ¿imashpata na shugutaimanllaca minishtipanchi?

⁴ Shinaca, Taita Dios carashca mushuj causaiguta ropata churajunshna churajungapaca Gálatas 5:22, 23​pi textocunata, shuj textocunapi nishca cualidadcunatapash ñucanchi causaipi ricuchingapami esforzarina capanchi.b Shinallata cai cualidadcunataca na ropata churajunshna asha asha churajuita ushapanchichu. Ashtahuangarin cai cualidadcunataca tucuitami igual minishtipanchi. Por ejemplo, pitapash ciertopacha juyashpaca pacienciahuan, juyaihuanmi tratapashun. Shinallata pihuanbash ali cangapaca, paicunata intindishpa na ñucanchipa yuyaitalla imapipash rurangapami jarcarina capanchi.

TAITA DIOS CARASHCA MUSHUJ CAUSAIGUTACA ¿IMASHINATA ROPATA CHURAJUNSHNA CHURAJUITA USHAPANCHI?

5. Jesushna pensana nishpaca ¿imatata nijun? ¿Imamandata Jesuspa causaimandaca yachajuna capanchi? (1 Corintios 2:16).

⁵ (1 Corintios 2:16​ta liipangui). Taita Dios carashca mushuj causaiguta ropata churajunshna churajungapaca ‘Jesushna pensanatami’ minishtipanchi. Jesushna pensangapaca, Jesuspa ejemplotami catina capanchi. Jesusca, Diospa espíritu santopa cualidadcunataca tucuitami ali ali ricuchirca (Heb. 1:3). Jesushna imatapash pensangapaj, rurangapaj o comportaringapaj esforzarishpaca paipa ejemplotaca alimi cati ushapashun (Filip. 2:5).

6. Taita Dios carashca causaiguta ropata churajunshna churajungapaj esforzarijushpaca ¿imatata yarina capanchi?

⁶ Jesuspa ejemplotaca ¿ciertopachachu catita ushapanchi? Talvez, Jesusca perfectomi “maitashi paishnapacha caita usharinga ninguipashchari”. Shina pensajushpaca cai quimsa yuyaicunapi pensaripashunchi. Taita Dios gentecunata rurashpaca paiman rijchajtami rurarca. Chaimandami Jehová Diospa, Jesuspa cualidadcunata ricuchita ushapanchi (Gén. 1:26). Shinallata Diospa espíritu santopa ayudatami charipanchi. Paipa ayudahuanga ñucanchicunalla na rurai ushashca cosascunatami rurai ushapashun. Cutin Jehová Diosca paipa espiritupa cualidadcunata cunanllata tucuita pactachichunga na mandajunllu. Ashtahuangarin Jehová Diosca paraíso alpagupimi chai cualidadcunata pactachichunga mil huatacunata cunga (Apoc. 20:1-3). Cunanbica tucui usharishcaguta rurangapaj esforzarishpa, Jehová Dios chai cualidadcunata charichun ayudanapi confiachunmi munan.

7. ¿Imatata yachajugripanchi?

⁷ Jesuspa ejemplotaca ¿imapipachata catina capanchi? Diospa espíritu santopa cualidadcunataca chuscuta ricupashunchi. Cada cualidadta Jesús imashina ricuchishcata, ñucanchicuna chaimanda imata yachajushcatami ricugripanchi. Shinallata Taita Dios carashca mushuj causaiguta ropata churajunshna churajushca cashpapash, imapi mejorana cashcata yachangapami chuscu tapuicunatapash ricupashun.

8. Jesusca ¿imashinata juyashcataca ricuchirca?

⁸ Jesusca, Jehová Diosta juyaimandami gentecunamanda preocuparishpa paicunataca ayudarca (Juan 14:31; 15:13). Jesusca cai Alpapi cashpaca gentecunataca llaquishpa, juyaihuanmi tratarca. Paipa contracunatapashmi shina tratarca. Shinami paica tucui gentecunata ninanda juyashcata ricuchirca. Shinallata gentecunata juyashcataca Diospa Reinomanda villachishpami ricuchirca (Luc. 4:43, 44). Ashtahuanbash gentecunata juyashcataca cai alpapi sufrishpa, huañungapaj shamushpami ricuchirca. Shinaca Jesús cai alpaman ñucanchimanda huañungapaj shamushcamandami shuj punllaca para siempre causana oportunidadta charipanchi.

9. Jesuspa ejemplota catishpaca ¿imashinata shujcunaman juyaita ricuchita ushapanchi?

⁹ Jehová Diosta juyaimandami paita sirvingapaj bautizarircanchi. Shinaca Jehová Diosta juyashcataca shuj gentecunata juyaihuan tratashpami ricuchita ushapanchi. Apóstol Juanga: “‘Taita Diosta juyanimi’ nijushpapash, shuj crijta millanayachishpaca, llullajunmi. Chai crijta ñavihuan ricujushpapash, na juyashpaca, ñavipi na ricurij Taita Diostacarin, ¿imashnata juyai ushangayari?” nircami (1 Juan 4:20). Shinaca cashna tapuripashunchi: “Shujcunataca ¿tucui shunguhuanllu juyani? Shinallata, ñucata nali tratajpipash ¿paicunataca llaquishpa, juyaihuanllu tratani? Ñucapa tiempotaca ¿Jehová Diosmanda villachingapaj llujchinichu? ¿Jehová Diosmanda na uyanayachijpi o jarcaicuna ricurijpipashchu villachishpa catini? Jehová Diosmanda villachingapaca ¿ashtahuan tiempota llujchi ushaimanllu?” nishpa (Efes. 5:15, 16).

10. Ama fiñanajuicuna tiachunga Jesusca ¿imatata rurarca?

¹⁰ Jesusca shujcunahuan imacunamandapash fiñanajunataca na gushtarcachu. Paita nali tratajpipash paica na shinallata tratarcachu. Ashtahuangarin Jesusca shujcunahuan ali llevaringapaj esforzarishcatami ricuchirca. Shina ricuchishpami ima problemata charijpipash chai problemacunataca uchalla arreglachun yachachirca. Por ejemplo Jesusca, Taita Dios paicunapa adoracionda chasquichunga maijanbash huauquihuan imamandapash culirashca cashpaca chai problematara huauquihuan arreglachunmi yachachirca (Mat. 5:9, 23, 24). Apostolcunamanbash “¿maijanshi ashtahuan importante canchi?” nishpa fiñanajunajujpica ama shina fiñarinajuchunga cutin cutinmi yachachirca (Luc. 9:46-48; 22:24-27).

11. ¿Imashinata tucuicunahuan casilla ali causaiguta charita ushapanchi?

¹¹ Tucuicunahuan casilla ali causaiguta charingapaca fiñanajuicunamanda, macanajuicunamanda jarcarinallaca na suficiente canllu. Ashtahuangarin pihuanbash fiñanajushca cashpaca ñucanchicunami paicunahuan ali tucunata mascana capanchi. Shinami ñucanchi huauquipanicunatapash chaitallata rurachun animaita ushapashun (Filip. 4:2, 3; Sant. 3:17, 18). Cashna tapuripashunchi: “Pihuanbash fiñanajushca cashpa ali tucungapaca ¿imacunatallata rurangapaj dispuesto cani? Shuj huauqui o shuj pani ñucata nali sintichishcamandaca ¿resintirishpachu quidani? ¿Ñucata nali sintichishcacuna disculparichunllu shuyani? O na cashpaca pai culpata charijpipash ¿ñuca paihuan disculparingapaj dispuestochu cani? nishpa. Shinallata ¿shujcunatapash, fiñarishcacuna cajpi ama fiñarishcacuna cachun ayudai ushanalla cajpica problemacunata arreglachun animanichu?” nishpa.

12. Jesusca shujcunata llaquishcataca ¿imashinata ricuchirca?

¹² Jesusca shujcunata llaquishcatami ricuchirca (Mat. 11:28-30). Paica shujcunataca juyaihuan intindishpami tratarca. Por ejemplo, Canaán llactamanda shuj huarmiguca paipa ushiguta jambichunmi Jesustaca mañajurca. Jesusca chai huarmigutaca llaquishpami tratarca. Callaripi pai mañashcata na ucha rurashpapash chai huarmigu Jesuspi shinlli feta charishcata ricuchijpimi, Jesusca paipa ushigutaca jambirca (Mat. 15:22-28). Shinapash Jesusca imapash llaquita uyashpa, llaquilla sintirishcamandallaca na imatapash ruranllu carca. Shinapash Jesús shujcunata llaquishpa tratashpapash paipa catijcuna imapipash pandarijpica na manllashpami paicunapa alipallata consejanlla carca. Por ejemplo, apóstol Pedroca Jesustaca Jehová Diospa munaita ama pactachichunmi jarcangapaj munarca. Chaimandami Jesusca, pai pandarijujta ricushpaca ama shinacunata nichun chaishuj apostolcunapa ñaupapi consejarca (Mar. 8:32, 33). Jesús apóstol Pedrota chaishuj apostolcunapa ñaupapi consejashpaca, paita nalipi quidachingapaca na shina rurarcachu. Ashtahuangarin paita yachachingapaj chaishujcunapash yachajuchunmi shina rurarca. Apóstol Pedrota apostolcunapa ñaupapi consejashcamandaca seguromi pingai tucushcanga. Shinapash Jesusca paita ayudangapami shina consejarca.

13. ¿Shujcunata ciertopacha llaquishcata ricuchingapaca huaquinbica imatata rurana tucun?

¹³ Ciertopacha shujcunata juyashcata ricuchingapaj munashpaca huaquinbica, imapipash pandarijpica paicunata ayudangapa consejanami tucun. Shinapash consejashpaca Jesuspa ejemplota catipashunchi. Bibliapi nishcashna consejashpa juyaita ricuchipashunchi. Huauquipanicuna Jehová Diosta juyaimanda ñucanchi juyaihuan cushca consejocunata aliguman chasquinapi confiapashunchi. Cashna tapuripashunchi: “Ñucanchi juyashca persona imatapash nalita rurajujta ricushpaca ¿paicunata consejangapaj esforzarinichu? Consejashpapash ¿imashinata consejani? ¿Juyaihuanllu consejani o yangatachu consejani? ¿Culirashca caimandachu consejani? O ¿paita ayudangapaj munaimandachu consejani?” nishpa tapuripashunchi.

14. Jesusca shujcunahuan ali cashcataca ¿imashinata ricuchirca?

¹⁴ Jesusca imacunalla ali cashcataca parlaitallaca na parlarcachu. Paipa ruraicunahuanmi ricuchirca. Jesusca paipa Taitata juyaimandami siempre alitalla ruran carca. Shujcunata ciertopacha juyajcunaca, siempremi shujcunata imagupipash ayudanata mascan. Ima ali cashcataca yachanallaca na suficientechu can. Ashtahuangarin ima ali cashcata yachashpapash juyaimanda imatapash ruranami ali can. Shinapash huaquinbica shuj gentecunapa ñaupajpi ali ricuringapaj munaimandallami ali cosascunata ruraita ushan. Por ejemplo, Jesusca limosnata carajcunamandami parlarca. Chai gentecunaca pobre gentecunaman limosnata carashcataca tucui gentecuna yachachunmi munan carca. Shina gentecunapa ñaupapi ali quidangapaj munaimanda rurashca caimandami, alishnalla ricurishpapash Jehová Diospa ñaupapica nali ricurirca (Mat. 6:1-4).

15. Shujcunahuan ciertopacha ali cashcataca ¿imashinata ricuchita ushapanchi?

¹⁵ Shujcunata juyaimanda imagutapash rurashpami ciertopacha ali gentecuna cashcataca ricuchinchi. Na ñucanchi alipi quidanamandallaca imatapash ruranachu capanchi. Shinaca “¿Ima ali cashcata yachashpapash chai ali cosascunataca ruranichu? Chai ali cosascunatapash ¿imamandata rurani?” nishpa tapuripashunchi.

TAITA DIOS CARASHCA CAUSAIGUTACA ¿IMASHINATA CUIDASHPA CATITA USHAPANCHI?

16. ¿Imatata cada punlla rurana capanchi? ¿Imamandata chaita rurana capanchi?

¹⁶ Bautizarishpami Taita Dios mushuj causaiguta carashcataca ña chasquircanchi. Ashtahuan imatapash ruranataca na minishtirinllu nishpaca na pensanachu capanchi. Mushuj causaigutaca imashina shuj ropagu ama huaglichun cuidarin, shinallatami cuidashpa catina capanchi. Cada punllami Taita Diospa espiritu santopa cualidadcunata ricuchingapaj esforzarina capanchi. Jehová Diosca ñucanchita paipa espíritu santohuan ima minishtirishcapi ayudangapaca tucuitami ricujun (Gén. 1:2). Shinaca Diospa espíritu santopa cualidadcunami alicunata rurachun ayudaita ushan. Por ejemplo, discípulo Santiagoca: ‘Crishcapash alita ruranacunata na pactachishpaca, huañushcashna yangami tucun’ nircami (Sant. 2:26). Shinaca imapash alicunata na ruranata yachashpaca yangallatami tucunga. Jehová Diospa espíritu santopa cualidadcunata ricuchingapaj esforzarishpami Diospa espiritu santo ayudachun saquinajushcata ricuchipashun.

17. Huaquinbi Diospa espiritupa cualidadcunata na ricuchi ushashpaca ¿imatata rurana capanchi?

¹⁷ Ashtaca huatacunata ña bautizarishca huauquipanicunapashmi Diospa espiritupa cualidadcunataca na tucuipi ali ricuchita ushashca. Shinapash chaicunamandaca na desanimarinachu capanchi. Por ejemplo, shuj gushtashca ropagu ashaguta liquirijpica na basuraman shitanchimanllu. Arreglaitami arreglanchiman. Arreglashcamanda ama ashtahuan huaglichunga cuidashpami charipanchiman. Diospa espiritupa cualidadcunata ricuchinapipash shinallatami can. Huaquinbi pitapash llaquishpa, juyaihuan, pacienciahuan na tratai ushashcamandaca na desanimarinachu capanchi. Disculpata mañashpami cutin ali llevaringapaj esforzarishpa catina capanchi. Cutinbaca ali tratangapaj esforzaripashunchi.

18. ¿Imatata seguro caita ushapanchi?

¹⁸ Jesús ñucanchipa shuj ali ejemplo cashcamandaca cushijushcami capanchi. Jesús cuenda pensangapaj esforzarishpaca paipa ejemplotaca ashtahuan facilmi cati ushapashun. Shinami Taita Dios carashca mushuj causaigutaca ropata churajunshna churajuita ushapashun. Shinapash Diospa espiritupa shuj cualidadcunamanda yachajunaca alimi capanman. Diospa espiritupa shuj cualidadcunamanda yachajungapaca Guía de estudio para los testigos de Jehová, “El vivir cristiano” nishca partepi, jipamanga “Fruto del espíritu” nishca partepimi ashtahuan mascai ushapangui. Shinaca Taita Dios carashca mushuj causaiguta ropata churajunshna churajungapaj esforzarijpi, cuidangapaj esforzarijpica Jehová Diosca ñucanchitaca ayudangami.