1, 2. Mundo enteropi superintendentecunaca ¿imatata nishca?

SUPERINTENDENTE DE CIRCUITOCA pai visitajushca congregacionbi tucuilla ancianocunahuan tandanajushcami tiajun. Chai tucuilla huauquicunatami juyan. Ancianocunaca alipachami congregacionbica sirvinajushca. Huaquingunaca paipa taitapa edadshnallami can. Shinapash superintendenteca ashata preocuparishcami can. Punda visitapica tucuilla ancianocunatami animarca, shuj huauquicunapash ashtahuan responsabilidadcunata charichun ayudapanguichi nishpa. Chaimandami ancianocunataca tapun: “Huauquicuna, shuj huauquicunapash ashtahuan responsabilidadcunata charichunga ¿imatata rurapashcanguichi?” nishpa. Shina tapujpimi shuj ancianoca nin: “Ayudashcanchimi, shinapash ashagutallami ayudai ushashcanchi” nishpa. Chai anciano shina nijpimi shuj ancianocunapash chaitallata nin.

² Quiquinbash anciano cashpaca ¿shinallatachu nipanguiman? Mundo enteropi superintendentecunaca nishcami, ancianocunaca shuj huauquicunapash ashtahuan responsabilidadcunata charichun ayudangapaca na tiempota separanajushcachu nishpa. Shinaca ¿imamandata tiempota separanaca shinlli cashca?

3. a) ¿Maijan textocunata ricuchin, shuj huauquicunata ayudanaca minishtirishca cashcata? b) ¿Imamandata cai temapash shamuj temapash tucuicunapa ali can? (Notata ricupangui.) c) ¿Imamandata huaquin ancianocunapaca shuj huauquicunaman yachachishpa ayudanaca shinlli cashca?

³ Anciano caimandaca quiquinga alimi yachapangui, shuj huauquicunatapash yachachishpa ayudanaca minishtirishcapachami can.a Shinallata alimi yachapangui, congregaciongunata shinlliyachishpa ayudachun, mushuj congregaciongunata formachunga ali yachajushca huauquicunami minishtirin (Isaías 60:22, liingui). Bibliapipash ancianocunataca ninmi: ‘Shujcunamanbash yachachinami’ canguichi nishpa (2 Timoteo 2:2, liingui). Shinapash huaquin ancianocunapaca shuj huauquicunaman yachachishpa ayudanaca shinllimi can. Huaquinbica familiata cuidanamanda, trabajanamanda, congregacionbi responsabilidadcunata pactachinamanda o imapash importante ruraicunamandami shuj huauquicunata ayudanaca shinlli can. Shinapash shujcunata ayudanaca ¿imamandata minishtirishcapacha can? Chai tapuita cunanga ricupashun.

SHUJ HUAUQUICUNATA YACHACHINACA MINISHTIRISHCAPACHAMI CAN

4. ¿Imatata huaquin ancianocunaca tal vez pensanga?

⁴ Shujcunata yachachingapaca ¿imamandata huaquin ancianocunaca na ashtaca tiempota charishca? Huaquingunaca pensanbashchari: “Shujcunata ayudanaca minishtirishcami can. Shinapash congregacionba ruranacunata ladoman saquitaca na ushanichu. Huauquicuna ashtahuan responsabilidadcunata charichunga, jipamanra ayudashallami, na imapash pasangachu” nishpa. Ciertomi can, congregacionba huaquin ruranacunataca uchami rurana can. Shinapash huauquicunata na ucha ayudajpica congregación enteromi jipamanga ashtahuan llaqui apanga.

5, 6. a) Carropa aceiteta na uchalla cambiajpica ¿imata pasan? b) Congregacionbi huauquicunata ancianocuna na uchalla yachachijpica ¿imata pasanga?

⁵ Pensaripashun. Carro ali purichunga aceiteta cambiarianami can. Shinapash gasolinami ashtahuan minishtirishca can. Gasolinata na churajpica carroca na purinllu. Chaimandami carro dueñoca tal vez pensanga, aceiteta na ucha cambiajpica carroca na imapash pasangachu nishpa. Shinapash intindinami can, carropi aceiteta na ucha cambiajpica jipamanga carropa motorca huaglingami. Carropa motor huaglijpi arreglachingapaca ashtahuan tiempo, ashtahuan culquimi minishtiringa. Shinaca ¿imatata yachajupanchi?

⁶ Congregación ali ñaupaman catichunga huaquin cosascunataca uchallami rurana can. Bibliapi nishca shinaca, ima ashtahuan importante cashcataca ancianocunaca yariami cana can (Filip. 1:10). Pensapaichi, congregacionbi huaquin responsabilidadcunata pactachinamanda huauquicunata yachachinata cutin cutin huashaman saquishpaca ¿alicha canman? Ancianocuna na uchalla yachachijpica jipamanga congregacionda ñaupaman pushaj ali yachajushca huauquicunaca na tiangachu.

7. Shujcunata ayudaj ancianocunaca ¿imashinata can?

⁷ Shinaca, huauquicuna ashtahuan responsabilidadcunata charichun ayudanaca minishtirishcapachami cashca. Jipacunapi preocuparij ancianocunaca shuj huauquicunata ayudangapami tiempota llujchin. Chashna ayudaj ancianocunami ali ancianocuna can, ninandami alicachinchi, shuj jatun bendicionmi can (1 Pedro 4:10, liingui). Ancianocuna shuj huauquicunata ayudashcamandaca ¿imashinata congregacionbica tucuicunallata beneficiarin?

YACHACHINGAPAJ TIEMPOTA LLUJCHINACA ALIPACHAMI CAN

8. a) Shuj huauquicunata yachachingapaj esforzarij ancianocunaca ¿imatata yaipi charina can? b) Caru llactacunapi sirvingapaj rishca ancianocunaca ¿imatata yaipi charina can? (“Uchallami ayudan can” nishca recuadrotapash ricupangui.)

⁸ Ashtaca experienciata charij ancianocunapash humilde cashcata ricuchishpami ima pasanataca yaipi charina can. Tiempohuanga ña mayorllagu tucuimandami congregacionda cunanbi ayudajushcashnallaca ñana ayudai ushanga (Miq. 6:8). Ashtahuangarin, cungashcapi imapash llaquicuna japijpi, congregacionbi responsabilidadcunata ñana pactachi ushanatapash yaipimi charina can (Ecl. 9:11, 12; Sant. 4:13, 14). Ancianocunaca congregacionbi tucuilla huauquipanicunata juyaimandami paicuna imata yachajushcata shuj huauquicunaman yachachingapaj tucuilla oportunidadcunata aprovechan (Salmo 71:17, 18, liingui).

9. ¿Imamandata ancianocunaca shuj huauquicunata uchalla ayudana can?

⁹ Ali ancianocunaca ashtahuan huauquicuna responsabilidadcunata charichun yachachishpami congregaciongunataca shinlli cachun ayudanajun. Ali yachajushca huauquicuna tiashpami congregacionbi huauquipanicunataca cunan punllacunapillata, ashtahuangarin shamuj punllacunapi tucuilla tandanajushca, shinlli cachun ayudai ushanga. Yaripashunchi, ñallami Jatun Manllanai Llaqui Punllacunaca shamunga (Ezeq. 38:10-12; Miq. 5:5, 6). Chaimandami ancianocunaca cunanmandallata asha tiempoguta separashpa shuj huauquicunapash ashtahuan responsabilidadcunata charichun uchalla ayudana can.

10. Shuj huauquicunata yachachingapaj na tiempota charishpaca ¿maimandata ancianocunaca tiempota llujchina can?

¹⁰ Ancianocuna, congregacionbi responsabilidadcunata pactachinamanda shujcunaman yachachingapaj tiempo na pactajujtaca alimi yachanchi. Shinapash, congregacionba ruranacunapi na ashtaca tiempota ocuparishpaca shuj huauquicunata ayudangapaj tiempota charipanguichimi (Ecl. 3:1). Shuj huauquicunata ayudashpaca na tiempota chingachinajunguichichu. Ashtahuangarin, jipacunaman congregacionda ayudachunmi huauquicunataca yachachinajupanguichi.

SHUNGUMAN CHAYAPAICHI

11. a) Shuj shuj llactacunamanda cashpapash ¿imatata huaquin ancianocunaca nirca? b) Proverbios 15:22​pi nishca shinaca ¿imamandata shuj ancianocunapa sugerenciacunata uyanaca ali can?

¹¹ Tauca llactacunamanda ashtaca ancianocunaca nishcami, shuj huauquicunata yachachingapaj tiempota separanaca alipachami cashca nishpa. Paicunataca chairallami tapurca ¿imashinata shuj huauquicunata yachachipanguichi? nishpa.b Shina tapujpimi paicunaca shuj shuj llactacunamanda cashpapash chai sugerenciacunatallata nirca. Shinaca, maijan llactapi cashpapash huauquicunata aliguta yachachingapaj munashpaca Bibliapi consejocunatami ancianocunaca catita ushan (1 Cor. 4:17). Proverbios 15:22​pica yachachinmi, shujcuna ima nijtapash uyashpaca alimi can nishpa. Chaimandami cai temapipash shamuj temapipash ancianocuna cushca huaquin sugerenciacunata ricushun.

12. Ancianocunaca ¿imatata primeroca rurana can, imamanda?

¹² Cunanga alpata tarpuj runagupi pensarishun. Imapash muyuta tarpungapaj munashpaca primeroca alpatarami tarpuj runaguca tolana can. Ancianocunapash shuj huauquicunata yachachingapaj munashpaca, alpata tolanshnami huauquicunapa shunguman chayana can. Shunguman chayajpimi huauquicunaca anciano yachachishcata catingapaj munanga. Shinaca alpata tolanshna huauquicunapa shunguman chayangapaj munashpaca ¿imatata ancianocunaca rurana can? Chaipaca profeta Samuelpa ejemplota imashina catinata ricupashun.

13-15. a) ¿Imatata Jehová Diosca profeta Samueltaca mandarca? b) Jehová Diospa mandashcata pactachingapaca ¿imatata Samuelca rurarca? (Callari dibujota ricupangui.) c) ¿Imamandata ancianocunaca Samuel imata rurashcata yaipi charina can?

¹³ Casi 3 mil yali huatacuna huashamanmi Jehová Diosca profeta Samueltaca mandarca: ‘Caya punllami Benjamín aillupa llactamanda shuj runata canbaman cachamusha. Paitami israelcunata mandachun aceitehuan umapi talina’ cangui nishpa (1 Sam. 9:15, 16). Jehová Dios shina nijpimi Samuelca intindirca paipa cuendaca shuj mandagrijushcata. Samuelca tal vez pensarijushcangami, mushuj mandajtaca imashinashi yachachisha nishpa. Shinaca Samuel imashina yachachishcata ricupashun.

¹⁴ Jehovahuan parlashca cayandi punllallatami Samuelca Saulta ricurca. Chaipimi Jehová Diosca Samueltaca nirca: ‘Ricui, cai runamandami ñucaca villajurcani’ nishpa. Chaimi Samuelca micungapaj invitashpa Saulmanbash paipa sirvijmanbash ali tiarina pushtucunata curca. Saulmangarin ashtahuan ali aichacunata agllashpami nirca: “Ricui, caimi canman shicanyachishpa alichishca aicha. Japishpa micuilla” nishpa. Micushca jipami Samuelca ñuca huasiman jacu nishpa Saultaca aparca. Parlashpandimi ñandaca rirca. Huasiman chayashpapash huasi jahua patioman apashpami Samuelca puñuna horascaman Saulhuanga parlajurca. Shinami cayandi punllaca, Saúl mandana cashcata ricuchingapaj paipa umapi aceiteta talishpa, ñavipi muchashpa, shuj instrucciongunatapash Samuelca curca. Profeta Samuel tucui oportunidadcunata aprovechashpa aliguta yachachijpimi Saulca Jehová Diospa mandashcata pactachingapaj listo carca (1 Sam. 9:17-27; 10:1).

¹⁵ Llactata mandaj runaguta agllanaca shuj huauquita anciano cachun o siervo ministerial cachun yachachinahuanga na igualchu can. Shinapash Samuel imata rurashcata yaipi charishpami ancianocunaca shuj huauquicunata ayudangapaj ashtacata ali yuyaicunata yachajui ushan. Ishcai yuyaicunata ricupashun.

YACHACHIPAICHI, AMIGO TUCUPAICHI

16. a) Israelitacuna shuj reytami munanchi nijpica ¿imashinata Samuelca sintirirca? b) Rey tucuchun Saulpa umapi aceiteta taligri nijpica ¿imatata Samuelca rurarca?

¹⁶ Yachachina munaihuan ayudapanguichi. Shuj punllaca israelitacunaca Samueltaca nircami, ñucanchicunapashmi shuj reyta charingapaj munanchi nishpa. Shina nijpimi Samuelca, ñucatami nalicachinajun yashpa ninanda llaquirirca (1 Sam. 8:4-8). Israelitacunapa nishcata ninanda nalicachijujpimi Jehová Diosca quimsa viajecaman Samueltaca nirca, israelitacuna nishcata rurailla nishpa (1 Sam. 8:7, 9, 22). Jehová Dios shina nijpica Samuelca ñana imatapash nijurcachu, Saulhuanbash na risintirircachu. Chaimandami Saúl rey tucuchun aceiteta umapi churagri nijpica Samuelca Jehová Diosta juyaimanda, cushijushpa cazurca.

17. a) Cunan punllacunapi ancianocunaca ¿imashinata Samuelpa ejemplota catinajushcata ricuchin? b) Ancianocunaca ¿ima cushijuitata charin?

¹⁷ Ashtaca experienciata charij ancianocunapash Samuelpa ejemplota catishpami huauquicunataca juyashpa aliguta yachachin (1 Ped. 5:2). Ñuca responsabilidadcunata quichuhuangami nishpaca ancianocunaca na pensarinajunllu. Ashtahuangarin, congregacionbi ‘ayudangami’ yashpami huauquicunamanga aliguta yachachin (2 Cor. 1:24; Heb. 13:16). Paicuna yachachishca huauquicuna congregaciongunapi ayudajujta ricushpaca ancianocunaca tucui shunguhuanmi cushijun (Hech. 20:35).

18, 19. a) Ancianocunaca ¿imashinata huauquicunata nara yachachishpallata paicunapa shunguman chayaita ushan? b) ¿Imamandata huauquicunapa shunguman chayanaca minishtirishcapacha can?

¹⁸ Yachachipanguichi, paicunapa amigopash tucupanguichi. Saulta ricushpaca Samuelca aceiteta umapi talishpa saquinallami carca. Shinapash Samuelca, Saulpa shunguman chayangapaj munashpami micungapaj invitarca, paihuan purishpa rirca, unaillata parlarca, samarcapash. Aliguta yachachishca jipami Samuelca Saúl mushuj rey tucuchun nishpa paipa umapi aceiteta talirca.

¹⁹ Quiquinbash shuj huauquita ayudangapaj munajushpaca pundapica paipa amigo tucungapami tiempota llujchina capangui. Paipa amigo tucungapaca quiquinba llactapi ima costumbre tiajta ricushpami paipa amigo tucuna capangui. Ocupado cashpapash chai huauquihuan ashtahuan ali llevaringapaj tiempota llujchipangui. Shinami chai huauquipash ciertopacha paimanda preocuparijushcata sintishpa agradicinga (Romanos 12:10, liingui).

20, 21. a) Ali yachachij ancianocunaca ¿imatata ruran? b) Shamuj temapica ¿imatata yachajupashun?

²⁰ Ama cungapanguichichu, ali yachachij ancianocunaca shuj huauquicunapash responsabilidadcunata charichun yachachinatami gushtan. Ashtahuangarin, tucui shunguhuanmi paicunataca juyan (Juan 5:20huan chimbapurashpa ricupangui). Ancianocuna juyajta sintishpami huauquicunapash yachajuna munaita charin. Anciano huauquicuna, quiquingunaca huauquicunata yachachinami capanguichi, shinallata paicunapa amigomi tucuna capanguichi (Prov. 17:17; Juan 15:15).

²¹ Huauquicunapa shunguman chayashca jipami ancianocunaca chai huauquicunapash ashtahuan responsabilidadcunata charichun ayudaita ushan. Shinaca ¿imashinata chai huauquicunataca ayudai ushan? Chaipaca huaquin yuyaicunatami shamuj temapi yachajupashun.

1. a) Jehová Diosta sirvijcunaca ¿imatata siempre yachashca? b) ¿Imamandata cunan punllacunapipash ali yachajushca cana capanchi? c) ¿Imatata cai temapica ricupashun?

JEHOVÁ DIOSTA sirvijcunaca siempremi yachashcanchi, imatapash ali rurai ushangapaca primeroca alimi yachajuna canchi. Huaquin ejemplocunata ricupashun. Abranga paipa sobrino Lotta nali gentecuna apashpa rijpimi ali macanajunata yachaj jaricunata agllashpa Lotta salvangapaj rirca (Gén. 14:14-16, NM ). Rey Davidpa punllacunapipash ‘candanata ali yachajushcacunami’ Taita Diospa huasipi candan carian (1 Crón. 25:7). Cunanbipash ñucanchicunaca Diablohuan, paita catij gentecunahuanmi shuj macanajuipishna causanajunchi. Ashtahuangarin Jehovata alabangapami esforzarinajunchi (Efes. 6:11-13; Heb. 13:15, 16). Shinaca, ali ñaupaman catingapaj munashpaca ñaupa huatacunapi Jehovata sirvijcunashnami ali yachajushcacuna cana canchi. Jehová Diosca ali yachajushca huauquicuna tiachunmi shuj huauquicunata yachachichun ancianocunataca mandashca (2 Tim. 2:2). Chaimandami cai temapica, experienciata charij ancianocuna imashina shuj huauquicunata yachachinajujta ricushun.

JEHOVÁ DIOSTA ASHTAHUAN JUYACHUN YACHACHIPANGUI

2. Huauquicuna ashtahuan responsabilidadcunata charichun munashpaca ¿imatata ancianocunaca rurana can, imamanda?

² Ancianocunaca tarpuj runagucuna cuendami can. Tarpuj runaguca ali fucuchun nishpami alpapi abonota churashpara tarpun. Ancianocunapash, huauquicuna ashtahuan responsabilidadcunata charichun munashpaca Bibliapi textocunata ricuchishpami chai huauquicunapa shungumanra chayana can (1 Tim. 4:6). Shina rurajpimi huauquicunaca ancianopa yachachishcacunata ali chasquinga.

3. a) ¿Imashinata ancianocunaca Marcos 12:29, 30 textocunata liishpa huauquicunahuanga parlana can? b) Huauquicunaca ¿imashinashi sintiringa ancianocuna paimandapash mañajpica?

³ Quiquin anciano cashpaca, Bibliapi yachachishcacunamanda huauquicuna imata pensajtami yachana capangui. Chaipaca Marcos 12:29, 30​ta paihuan liipangui (chai textota liingui). Jipaca tapupangui: “Jehovaman mingarishca punllamandaca ¿imashinata quiquinba causaica cambiapashca?” nishpa. Shinami Jehovata imashina tucui shunguhuan sirvinata parlai ushapangui. Ña parlai tucuchijushpaca oracionda rurapashun nishpa Jehová Diostaca cai huauquigupash ashtahuan ñaupaman catichun canba espíritu santota cupangui nishpa mañapangui. Paimandapash mañajpimi huauquica congregacionbi ashtahuan responsabilidadcunata charingapaj animaringa.

4. a) Shuj huauquita yachachi callarijushpaca Bibliapi ¿maijan textocunatata ancianocunaca ricuchi ushan? b) Ancianocuna huauquicunata yachachijushpaca ¿imata rurachunda munana can?

⁴ Shuj huauquita yachachi callarijushpaca ¿imatata ancianocunaca rurana can? Bibliapi textocunata ricuchishpami shujcunata sirvina, tucuita ali pactachina, humilde canaca minishtirishcapacha cashcata yachachina can (1 Rey. 19:19-21; Neh. 7:2; 13:13; Hech. 18:24-26). Shina yachachijpimi huauquicunaca alpapi abonota churajpishna espiritualmente ashtahuan ñaupaman catinga. Francia llactamanda ancianoca ninmi: “Ñucaca, huauquicunallata Bibliapi ima nijta ricushpa ali decisiongunata ruranata yachajuchunmi pundapica yachachini. Bibliapi ima nijta yachachingapaca tucui oportunidadcunatami aprovechani” nin (Sal. 119:18). Huauquicuna Jehová Diosta ashtahuan juyachunga shuj yuyaicunapash tianmi. Chai yuyaicunata ricupashun.

JEHOVATA ASHTAHUAN SIRVINA MUNAITA CHARICHUN, CHAI MUNAITA IMASHINA PACTACHINATA YACHACHIPANGUI

5. a) Ancianocunaca ¿imacunatata huauquicunahuanga parlaita ushan? b) ¿Imamandata huauquicunataca chaira joven tucujujpillata yachachina can? (Notata ricupangui.)

⁵ Huauquitaca tapuchipangui: Jehovata ashtahuan sirvingapaca ¿imatata rurangapaj munapashcangui? nishpa. Imata munajushcata nali yachajpica, pai imata rurai ushanata ricushpa chaita rurachun animapangui. Shinallata, quiquin imata rurangapaj munashcata, chai munaita pactachishpa imashina cushijushcata parlapangui. Shina ayudanaca alipachami can. África llactamanda ancianopa ejemplota ricupashun. Paica precursormi can. Paica ninmi: “Ñuca joven cajpica, shuj ancianomi ñucataca aliguta pensachishpa tapuchihuarca, Jehovata ashtahuan sirvingapaca ¿imata rurangapata munangui? nishpa. Aliguta pensachishpa tapuchijpimi Jehovata ashtahuan sirvinaca minishtirishca cashcata cuenta japircani” nin. Ashtaca experienciata charij ancianocunaca nishcami, huauquicunata yachachingapaj munashpaca chaira joven tucujujpillatami aprovecha can nishpa. Shinaca ¿imatata ancianocunaca paicunaman yachachita ushan? Paicuna mashna huatacunata charijta ricushpami paicuna imata rurai ushanata mandana can. Ancianocuna shina ayudajpimi ashtahuan viñarishpaca jovengunapa cosascunapica na yapata preocuparinga. Chaipa randica Jehovata imashina sirvingapaj munajushcatami yaipi charinga (Salmo 71:5, 17, liingui).a

6. Jesusca ¿imashinata paipa catijcunataca yachachin carca?

⁶ Imata rurachun mandashpapash imamanda rurana ali cashcata nipangui. Shina intindichijpimi huauquicunaca Jehovata ashtahuan sirvingapaj munanga. Jesuspa ejemplota ricupashun. Jesusca paipa catijcunataca tucui llactacunapi gentecunaman yachachinguichi nishpami mandarca. Shinapash imamanda cazuna cashcata intindichunmi Jesusca nirca: ‘Jahua pachapipash, cai pachapipash mandachunmi’ Taita Diosca tucui ushaita ñucaman carahuarca nishpa (Mat. 28:18, 19). Shinaca ¿imashinata ancianocunaca Jesuspa ejemplota cati ushapanguichi?

7, 8. a) Ancianocunaca ¿imashinata Jesuspa ejemplota catishpa huauquicunataca yachachi ushan? b) ¿Imamandata ancianocunaca huauquicunata felicitanata yaria cana can? c) Huauquicunata ashtahuan aliguta yachachingapaca ¿imatata ancianocunaca rurai ushan? (“¿Imashinata shuj huauquicunataca yachachina can?” nishca recuadrotapash ricupangui.)

⁷ Huauquicunamanga imata rurachun churashpapash imamandata chaita rurana ali cashcataca Bibliapi ricuchipanguichi. Shinami paicunapash Bibliapi nishcata catishpa imatapash ruranata yachajunga. Shuj ejemplota ricupashun. Shuj huauquita nipashcanguiman, Tandanajui Huasiman yaicunataca limpio cachun, imacunapash yaicunapi ama estorbajuchun ricupangui nishpa. Chai jipaca Tito 2:10​ta liishpa nipangui, Tandanajui Huasi yaicuna limpio cachun quiquin ricuriajujpimi gentecuna ali villaicunata ashtahuan alicachinga. Ruculla huauquigucunapash yaicunapi imapash na estorbajujpica jahuallami yaicui ushanga. Shina yachachijpimi huauquicunaca intindinga, paicunaman mingashca responsabilidadcunataca na obligacionmandalla pactachina cashcata. Ashtahuangarin shujcunata ayudanamanda pactachina cashcata. Paipa rurashcacunahuan congregacionbi ayudashpami tucui shunguhuan cushijunga.

⁸ Paiman mingashca responsabilidadta pactachijpi felicitanataca yaria capangui. Felicitajpimi huauquiguca shuj plantagupi yacuta churajpishna gushtuta ñaupaman catinga (Mateo 3:17​huan chimbapurashpa ricupangui).

¿IMA JATUN LLAQUITA TIASHCA?

9. a) Charijlla llactacunapi ancianocunaca ¿ima jatun llaquitata charishca? b) ¿Imamandata entre 20 y 30 huatacunata charij huauquicunaca Jehovata ashtahuan sirvinata huashaman saquishca?

⁹ Charijlla llactacunapi causaj ancianocunaca jatun llaquitami charishca. Paicunapaca entre 20 y 30 huatacunata charij huauquicunata animanaca shinllimi cashca. Casi 20 llactacunamanda ancianocunataca tapurcanchimi ¿imamandata huaquin huauquicunaca na ashtahuan responsabilidadcunata congregacionbi charingapaj munashca? nishpa. Shina tapujpimi paicunaca nirca, ashtaca huauquicunamanga taitamamacunami Jehovata ashtahuan sirvina munaitaca na shungupi churashca nishpa. Huaquin jovengunacarin Jehovata ashtahuan sirvingapaj munanajushcami. Shinapash taitamamacunami jovenguna ashtahuan estudiashpa imapash titulota charichun animashca. Chaimandami chai jovengunaca Jehovata ashtahuan sirvinataca huashaman saquishca (Mat. 10:24).

10, 11. a) Na ashtahuan responsabilidadta charingapaj munaj huauquitaca ¿imashinata ancianocunaca ayudaita ushan? b) Ancianocunaca ¿maijan textocunahuanda ayudai ushan? ¿Imamandata shina ayudanaca ali can? (Notatapash ricupangui.)

¹⁰ Shuj huauqui na ashtahuan responsabilidadcunata charingapaj munajujpica tiempota llujchishpa, na ñapash fiñarishpami ancianoca ayudai ushan. Tarpuj runagupi cutin pensaripashun. Shuj plantagu vishtu viñajujta ricushpaca tarpuj runaguca asha asha imagutapash churashpami chai plantagutaca recto viñachun ayudan. Ancianocunapash shinallatami huauquicunataca ashtahuan responsabilidadcunata charichun ayudana can. Shinapash ¿imashinata asha asha ayudai ushan?

¹¹ Pundapica huauquicunapa amigo tucungapami ancianocunaca tiempota llujchina can. Paicunataca nita ushapanguichimi, congregacionbica quiquinda minishtinajunchimi nishpa. Chai jipaca Bibliapi textocunata ricuchishpa aliguta pensarichun ayudapangui. Shinallata, Jehovaman mingarishca punllamanda cunangaman imata rurajushcata pensarichun ayudapangui (Ecl. 5:4; Is. 6:8; Mat. 6:24, 33; Luc. 9:57-62; 1 Cor. 15:58; 2 Cor. 5:15; 13:5). Shunguman chayangapaca tapui ushapanguimi: “Jehovaman mingarishpaca ¿imatata rurasha niparcangui? Quiquin bautizarijujta ricushpaca ¿imashinashi Jehová Diosca sintirirca?” (Prov. 27:11). “Diablopash ¿imashinashi sintirirca?” nishpa (1 Ped. 5:8.) Aliguta mascashpa textocunata liijpica chai yuyaicunaca shunguman chayashpami huauquicunataca Jehovata ashtahuan sirvina munaita charichun ayudanga (Hebreos 4:12, liingui).b

JOVENGUNA CANGUNAMAN MINGASHCATACA ALI PACTACHIPANGUICHI

12, 13. a) Profeta Elías agllajpica ¿imatata Eliseoca rurarca? b) Eliasta ninanda juyashcamandaca ¿imashinata Jehová Diosca Eliseota bendiciarca?

¹² Jovenguna, quiquingunataca congregacionbi minishtinajunchimi. Shinaca, congregacionbi ashtahuan responsabilidadcunata charishpa Jehová Diosta ali sirvishpa cushilla causangapaj munashpaca ¿imatata rurana capanguichi? Chaita yachangapaca, punda tiempocunapi Jehová Diosta ali sirvishca Eliseopa ejemplota ricupashun.

¹³ Casi 3 mil huatacuna huashamanmi profeta Eliasca Eliseota agllarca paita ayudachun. Chai punllacunapica Eliseoca jovenmi carca. Joven cashpapash na ishcai shungu tucushpami Eliseoca profeta Eliastaca ayudashallami nishpa imaguta rurachun mandajpipash cushijushpa ruran carca (2 Rey. 3:11). Eliseoca 6 huatacunata profeta Eliasta ayudashpami ali yachajushca tucurca. Ashtahuangarin, chai punllacunapimi Eliseoca profeta Elías ñana profeta cashpa catinata yacharca. Profeta Eliasca quimsa viajecamanmi Eliseotaca ama catihuaichu nirca. Shina nijpipash Eliseoca Eliasta nimamanda na saquingapaj munashpami “candaca na saquishachu” nirca. Eliasta ninanda juyashpa na saquingapaj munashcamandaca ¿imashinata Jehová Diosca Eliseota bendiciarca? Jehová Diosca profeta Elías shuj jatun acapanapi chingarijta ricuchun ayudashpami Eliseotaca bendiciarca (2 Rey. 2:1-12).

14. a) ¿Imashinata jovengunaca Eliseopa ejemplota cati ushan? b) ¿Imamandata jovengunaca paicunaman mingashca responsabilidadcunataca maimanda pactachina can?

¹⁴ Joven cashpaca ¿imashinata Eliseopa ejemplota cati ushapangui? Eliseopa ejemplota catingapaca ancianocuna imaguta rurachun churajpipash cushijushpami rurana capangui. Quiquinda ayudajuj ancianotaca quiquinba amigota cuenda ricupangui. Pai ayudajushcamandapash agradicipangui. Agradicishpami, Eliseo cuenda na saquishachu, yachajushpa catingapaj munanimi nijuj cuenda cangui. Ashtahuangarin, canman mingashcataca maimanda pactachingui. Shinami quiquinga responsable cashcata, quiquinbi confianalla cashcata ricuchingui. Ancianocunapash Jehová Dios quiquinman ashtahuan responsabilidadcunata mingangapaj munashcatami cuenta japinga (Sal. 101:6; 2 Timoteo 2:2, liingui).

HUAUQUICUNA ANCIANOCUNAPA EXPERIENCIATA RESPETAPANGUICHI

15, 16. a) ¿Imashinata Eliseoca profeta Eliasta respetashcata ricuchirca? (Callari dibujota ricupangui.) b) ¿Imamandata shuj profetacunapash Eliseopi confiarca?

¹⁵ Eliseopa ejemploca ancianocuna experienciata charishcamanda jovenguna paicunata respetachunmi ayudan. Eliseo ima pasashcata cutin ricupashun. Profeta Eliasca Eliseondi Jericó llactapi profetacunata visitangapaj rishca jipami Jordán yacu manñaman chayarca. Chaipimi ‘Eliasca paipa jahualla churajunata llujchishpa patarishpa yacutaca astirca. Shina astijpimi, yacuca caiman chaiman anchurijpi, paicunaca chaquishca alpata ishcandi yalirca’. Yalishca jipaca ‘parlashpami rinajurca’. Imashinami ricupanchi, Eliseoca profeta Elías ima nijtaca alimi uyajurca. Paipa amo acapanapi chingaringacamanmi, pai ima nishcataca ali intindingapaj munashpa uyajurca. Ñami yachani nishpa paipa amopa nishcacunata ladoman saquingapaca na munarcachu. Elías acapanapi chingarishca jipaca Eliseoca Jordán yacu manñaman tigrashpami Eliaspa churajunahuanllata yacuta astishpa nirca: “¿Eliasta Mandaj Taita Diosca, maipita?” nishpa. Shina nijpimi yacucunaca cutin separarirca (2 Rey. 2:8-14).

¹⁶ Imashinami ricupanchi, profeta Eliasca Jordán yacuta separashpami paipa último milagrota rurarca. Cutin Eliseoca Jordán yacuta separashpami paipa primer milagrota rurarca. Chaita cuenta japinaca ¿imamandata ali can? Profeta Eliaspa cuenda Eliseo profeta tucushpaca Elías imata rurajushcatallatami catirca. Cunanga ñucami autoridadta charini nishpa profeta Elías imata rurajushcata huashaman saquishpa cambiangapaca na munarcachu. Eliseoca profeta Eliaspa rurashcacunata rurashpa catimandami Eliasta respetashcata ricuchirca. Chaita ricushpami shuj profetacunapash Eliseopi confiarca (2 Rey. 2:15). Jipamangarin, Eliastapash yali ashtaca milagrocunatami Eliseoca rurarca. Eliseoca 60 huatacunatami profeta carca. Shinaca ¿imatata joven huauquicunaca Eliseomanda yachajui ushan?

17. a) Yachajuj huauquicunaca ¿imatata Eliseomandaca yachajuita ushan? b) Jehová Diospa ayudahuanga ¿imatata rurai ushanguiman?

¹⁷ Congregacionbi ashtahuan responsabilidadcunata chasquishpaca ¿huaquin cosascunataca ñapashchu cambiana capangui? Cambiocunata rurangapaj munashpaca congregacionbi ima minishtirijujta ricushpa o Jehovapa organización cambiachi nijpillami cambiana capangui. Quiquinba munai, quiquinbi ali ricurijpilla cambianaca nalichu canman. Profeta Eliseota yaripai. Eliseoca Elías imata rurashcatallatami rurashpa catirca. Shina rurashpami paita yachachij Eliasta respetashcata ricuchirca. Shina respetajpimi shuj profetacunapash Eliseota respetarca. Chaimandami quiquinbash, experienciata charij ancianocuna Bibliapi nishcata catishpa congregacionbi imata rurajushcata catina capangui. Shina rurajpimi congregacionbi shuj huauquipanicunapash quiquinbi confianga (1 Corintios 4:17, liingui). Jipamanmi quiquinbash ashtahuan experienciata charishpa, congregacionbash Jehovapa organizacionhuan igual ñaupaman catichun cambiocunata rurai ushapangui. Jehová Diospash imashinami Eliseota ayudarca shinallatami quiquindapash ayudanga. Jehová Diospa ayudahuangarin, tal vez quiquinda yachachij ancianocunapa rurashcacunatapash “yalitami” rurai ushangui (Juan 14:12).

18. ¿Imamandata shuj huauquicunaman yachachinaca minishtirishcapacha can?

¹⁸ Cai ishcai temacunapi sugerenciacunata catishpa ancianocuna shuj huauquicunaman yachachishpaca alipachami canman. Yachajunajun huauquicunapash ancianocunapa yachachishcacunata aliguman chasquishpa, congregacionbi huauquipanicunata llaquishpa cuidanata yachajushpaca alipachami canman. Shinami mundo enteropi congregaciongunaca ashtahuan shinlliyanga, shamuj punllacunapi jatun llaquicunatapash aguantai ushanga.