Bibliamanda cabalta yachachipashunchi

1, 2. a) Jesusca ¿imatata rurarca? ¿Imamandata chaita rurarca? b) ‘Taita Diosta ali ayudajcuna’ cangapaca ¿imatata rurana capanchi?

JESUSCA alipacha carpinteromi carca. Shinallata Taita Diosmanda ali villaicunataca Jesusca alipachami villachirca (Mar. 6:3; Juan 13:13). Jesusca ali carpintero cangapaca herramientacunata alipacha utilizanatami yachajurca. Ashtahuanbash Jesusca Taita Diospa Shimita ali yachaimandami shuj gentecunamanbash Diospa Shimimanda cabalta yachachirca (Mat. 7:28; Luc. 24:32, 45). Jesusca 30 huatacunata charishpami carpintero canata saquishpa Diospa Reinomanda villachi callarirca. Chaita rurana importante cashcataca Jesusca alimi yacharca. Jesusca cashnami nirca: “Shina villachunmi, ñucataca cachamuhuarca” nishpa (Mat. 20:28; Luc. 3:23; 4:43). Jesusca cai alpapi cashpaca siempremi gentecunaman villachirca. Paipa catijcunapash shinallata rurachunmi munarca (Mat. 9:35-38).

² Na tucuicunachu carpintero capanchi. Shinapash ñucanchicunaca gentecunaman ali villaigucunata yachachinchi. Chaita rurana importante cajpimi Jehová Diospash yachachichun ayudan. Chaimi Bibliapica cashna nin: “Ñucanchica, Taita Diosta ayudajcunallami canchi” nishpa (1 Cor. 3:9; 2 Cor. 6:4). Shinallata salmista runaguca nircami: “Tucui cambaj Shimicunaca, napacha llullachu” can nishpa. Jehovata sirvijcunaca chaitaca alimi yachapanchi (Sal. 119:159, 160). Chaimandami gentecunamanga ‘na llullashpa villajuj shimita’ aliguta yachachingapaj esforzaripanchi (2 Timoteo 2:15, liingui). Shinaca Jehovamanda, Jesusmanda, Diospa Reinomanda cabalguta yachachingapaca Bibliata ali utilizanatami yachajuna capanchi. Chaimi Jehovapa organizacionga, gentecunaman aliguta yachachichun ashtaca publicaciongunata llujchishca. Chai publicaciongunataca Yachachingapaj publicacionguna nishca partepimi tari ushapanchi.

3. a) Cai tucurimui punllacunapica ¿imata rurangapata esforzarina capanchi? b) Hechos 13:48 nishcashnaca ¿picunatata ayudana capanchi?

³ Ñucanchicunaca Diospa Shimimanda gentecunaman villachishpaca uyachitallami uyachinajunchi. Cutin yachachishpaca Diospa Shimimanda intindichishpa, imata yachajushcata pactachichunmi gentecunata ayudanchi. Shinaca yachachingapaj publicaciongunaca villachingapallaca na canllu. Ashtahuangarin gentecunaman Diospa Shimimanda yachachingapami can. Shinapash cai nali mundotaca ñallami Jehová Diosca tucuchinga. Chaicamanga gentecunata Bibliamanda yachachingapaj gentecuna Jesuspa catijcuna tucuchun ayudangapami esforzarina capanchi. Chaipaca ‘causaita causagringapaj’ munajcuna para siempre causachun, Diosta sirvichunbash ayudanami capanchi (Hechos 13:44-47, 48a liingui).

4. ‘Causaita causagringapaj’ munajcunata taringapaca ¿imatata rurana capanchi?

⁴ ‘Causaita causagringapaj’ munajcunata taringapaca ¿imatata rurana capanchi? Chaipaca punda tiempopi Jesuspa catijcunashnami villachina capanchi. Shinallata Jesuspa cai mandashcata cazunami capanchi. Paica cashnami nirca: “Maijan puebloman, maijan uchilla llactaman yaicushpapash” Diospa Shimimanda yachajungapaj munaj gentecunata mascana canguichi nishpa (Mat. 10:11). Huaquin gentecunaca jariyashca caimandami Diospa Shimimanda yachajungapaca na munan. Shinapash ñucanchica ali shungu gentecunata, Diosmanda yachajungapaj munajcunatami mascapanchi. Cunanga caipi pensaripashunchi. Jesusca carpintero shina trabajashpaca alipacha caspita mascashpami pungucunata, yugocunata o shuj cosascunatapash rurashcanga. Chaicunata rurangapaca Jesusca alipachami herramientacunataca utilizan carca. ¿Imatata caimandaca yachajupanchi? Villachijushpaca pundapica ali shungu gentecunatami mascana capanchi. Chai Jipaca paicuna Jesusta ali catijcuna tucuchunmi Bibliata yachachingapaj publicaciongunata ali utilizana capanchi (Mat. 28:19, 20).

5. Bibliata yachachingapaj publicaciongunataca ¿imashinata utilizana capanchi? Shuj ejemplomanda parlapai (Callari fotocunata ricupangui).

⁵ Pensaripashunchi Jesús carpintero cashpaca shuj shuj herramientacunatami utilizarca.b Por ejemplo caspita cuchungapaj, utujungapaj, señalangapaj, medingapaj, caspita rectoguta rurangapaj, piezacunata clavangapaca shuj shuj herramientacunatami utilizan carca. Shinallatami Bibliata yachachingapaj publicaciongunaca villachingapaj, yachachingapami can. Shinaca cada publicacionda imashina utilizanata ricupashun.

TESTIGOCUNA CASHCATA RIJSICHUN PUBLICACIONGUNA

6, 7. a) Jw.org tarjetataca ¿imashinata utilizapashcangui? b) Tandanajuicunapa invitacionga ¿imapata can?

⁶ Tarjeta de presentación jw.org. Cai tarjetaca ñucanchicuna Testigo de Jehovacuna cashcata yachachun, internetpi jw.org paginaman yaicuchunmi ayudan. Chaipimi Testigocunata ashtahuan rijsi ushan. Shinallata Bibliata yachachichunbashmi mañaita ushan. Cunangamanga 400 mil yali gentecunami Internetpi jw.org paginapi Bibliamanda yachachichun mañashca. Cada punllami ashta gentecuna Bibliata yachachichun mañanajun. Shinaca chai tarjetata apashpami purina capanchi. Shinami maipi cashpapash, imata rurajushpapash Bibliamanda villachi ushashun.

⁷ Tandanajuicunapa invitación. Tandanajuicunapa invitacionga ishcai cosascunapimi ayudan. Pundapica gentecunataca cashnami nin: “Testigo de Jehovacunahuan Bibliata yachajuchunmi invitapanchi” nishpa. Shinallata tandanajuicunapi o shuj huauquihuan, shuj panihuan Bibliamanda ashtahuan yachajui ushashcatami ricuchin. Cai publicacionga ‘Diosmanda yachajungapaj munaj’ gentecunata Bibliamanda yachajuchun invitangapami can (Mat. 5:3). Shinapash ñucanchicunahuan Bibliata na yachajujushpapash tandanajuicunamanga tucuicuna shamunallami capan. Chaipimi Bibliamanda ashtahuan yachajunga.

8. Gentecunaca ¿imamandata shuj viajellapash tandanajuiman shamuna can? Shuj experienciamanda parlapai.

⁸ Gentecuna shuj viajellapash ñucanchi tandanajuicunaman shamuchunmi invitana capanchi. ¿Imamandata chaita rurana capanchi? Tandanajuicunaman shamushpaca Taita Diosta rijsichun ayudajta, Bibliamanda cabalguta yachachijtami gentecunaca cuenta japinga. Shinami paicunaca panda religiongunahuan na igual cashcata ricunga (Is. 65:13). Chaitami Estados Unidos llactamanda Ray, Linda cusahuarmica cuenta japirca. Paicunaca Taita Diospi crishpami ashtahuan yachajungapaj munarca. Chaimi paicunaca tucuilla iglesiacunaman rishun nishpa quedarca. Paicunaca nircami, chai iglesiapi Bibliamanda imagutapash yachachijpi, chai iglesiaman rij gentecuna Taita Dios munashcashna churajujta ricushpaca chaipimi quedashun nishpa. Ashtaca huatacunatami paicunaca shuj shuj iglesiacunaman rirca. Shinapash chai tucui iglesiacunaman rishpapash paicunaca Bibliamandaca nimata na yachajurcachu. Shinallata chai religiongunamanda gentecunaca pinganai ropatami churajun carca. Chaita ricushpami chai cusahuarmica llaquilla sintirirca. Ña último iglesiata visitashca jipami Linda huarmiguca trabajoman rirca. Cutin cusaca huasimanmi tigrarca. Shina tigrajushpami testigo de Jehovacunapa Tandanajui huasita yalirca. Imata ruranajujta ricungapami paica yaicurca. Chaipi gentecuna ali churajushca, ali alicuna cajta ricushpami ninanda cushijurca. Chaimi chai tandanajuipi quedarca. Chai tandanajuipi imata yachajushcataca ninandami alicachirca. Chaita ricushpami Ray jarica apóstol Pabloshna nirca: “Taita Diosca, cangunahuambachami cashca” nishpa (1 Cor. 14:23-25). Chai punllamanda vichaimanga Ray jarica tucui domingocunatami tandanajuicunaman rirca. Chaupi semana tandanajuicunamanbashmi ri callarirca. Paipa huarmigupashmi tandanajuicunaman ri callarirca. Paicunaca 70 yali huatacunata charishpapashmi Bibliata yachajushpa jipamanga bautizarirca.

PARLAI CALLARINGAPAJ PUBLICACIONGUNA

9, 10. a) ¿Imamandata tratadocunahuan villachinaca fácil can? b) Diospa Reinoca ¿imata can? nishca tratadota imashina utilizanata intindichipai.

⁹ Tratadocuna. Chai 8 tratadocunaca gentecunahuan parlai callarichunmi ayudan. Chai tratadocunaca 2013 huatapimi llujshi callarirca. Chai huatamanda cunangamanga casi 5 mil millón tratadocunatami imprimishca. Chai tucui tratadocunaca shuj tapuita, Bibliamanda shuj textotami charin. Chaimi shuj tratadota imashina saquinata yachashpaca chaishuj tratadocunata saquinaca ashtahuan facil can. Shinaca gentecunahuan parlai callaringapaca ¿imashinata chai tratadocunataca utilizai ushapanchi?

¹⁰ Diospa Reinoca ¿imata can? nishca tratadohuan villachingapaca callari paginapi tapuita ricuchipangui. Chai jipaca cashna tapupangui: “Diospa Reinoca ¿imata can? nishpa, tapuripashcanguichu. Cai tratadopa quimsa yuyaicunamandaca ¿maijandata agllapanguiman?” nishpa. Alimi o nalimi ninapa randica ““Bibliaca ninmi” nishca partepi Daniel 2:44, Isaías 9:6​ta liipangui. Gentecuna uyajpica parlashpa catipangui. Shinallata cutin gentecunata visitangapaca último paginamanda “Diospa Reino mandajujpica ¿imashinashi causashun?” nishca tapuita saquipangui. Chai tapuita contestangapaj cutin tigrashpaca Taita Diosmanda ali villaigucuna nishca folletopi lección 7​ta ricuchinallami capangui. Chai folletoca Bibliata yachachingapaj publicacionmi can.

BIBLIATA YACHAJUNA MUNAITA CHARICHUN PUBLICACIONGUNA

11. a) Ñucanchi revistacunaca ¿imapata can? b) Chai revistacunamandaca ¿imatata yachajuna capanchi?

¹¹ Revistacuna. Mundo enteropica Villajun, Rijcharipaichi nishca revistacunami ashtahuan llujshishca. Chai revistacunatami ashtaca ashtaca idiomacunapi traducishca. Ashtaca llactamanda gentecuna chai revistacunata liijpimi shuj shuj temacunata llujchishca. Shinami gentecunaca Bibliata ashtahuan yachajungapaj munanga. Bibliata ashtahuan yachajuna munaita charichunmi cai publicaciongunata utilizana capanchi. Shinaca gentecunapa minishtishcacunata ricushpami cai revistacunataca saquina capanchi.

12. a) Rijcharipaichi nishca revistaca ¿picunapallata can? Cai revistaca ¿imapata can? b) Cai revistahuan villachishpa ima experienciacunata charishcata parlapai.

¹² Rijcharipaichi nishca revistaca Bibliamanda ashagutallapash yachaj o nimata na yachaj gentecunapami llujchishca. Tal vez paicunaca Bibliapa yachachishcacunata na rijsingachu. Bibliapi ali consejocuna tiajtapash na yachangachu. Shinallata religiongunapipash na confiangachu. Chaimi cai revistaca Taita Dios tiajta, Biblia Diospa shimi cajta gentecuna crichun ayudan (Rom. 1:20; Heb. 11:6; 1 Tes. 2:13). Huata 2018​pica “Cushilla cangapaca ¿imata minishtirin?”, “Familiacuna cushilla causachun 12 yuyaicuna”, “Huañui tiajpi alillata sintiringapaca ¿imatata rurai ushapangui?” nishca temacunami cai revistapica llujshishca.

13. a) Tucui gentecunapa Villajun revistaca ¿picunapallata can? b) Chai revistacunahuan villachishpa ima experienciacunata charishcata parlapai.

¹³ Tucui gentecunapa Villajun revistaca ¿picunapallata can? Taita Diosta, Bibliata respetota charij gentecunapami can. Paicunaca Bibliamanda yachashpapash na cabalguta intindinllu (Rom. 10:2; 1 Tim. 2:3, 4). Huata 2018​pica “Bibliaca ¿cunanbipashchu ayudan?”, “Shamuj punllacunapica ¿imashi pasanga?”, “¿Taita Diosca quiquinda yarinllu?” nishca temacunami chai revistacunapica llujshishca.

BIBLIAMANDA YACHAJUCHUN, TANDANAJUICUNAMAN SHAMUCHUN AYUDAJ PUBLICACIONGUNA

14. a) Yachachingapaj publicaciongunapi tiaj chuscu videocunaca ¿imapata can? b) Chai videocunahuan villachishpa ima experienciacunata charishcata parlapai.

¹⁴ Videocuna. Jesuspa tiempopica carpinterocunaca herramientacunata utilizangapaca na corrienteta minishtinllu carca. Cunanbica sierra mecánica, taladro, lijadora, clavadora nishca herramientacunami tian. Por ejemplo publicaciongunata imprimishpapash, cunanga alipacha videocunatami charipanchi. Chai videocunaca ¿Imamandata Bibliata yachajuna capanchi?, Bibliamandaca ¿imashinata yachachinchi?, Ñucanchi tandanajuicunaca ¿imashinata can?, ¿Testigo de Jehovacunaca picunata capanchi? nishcami can. Chai videocunaca Yachachingapaj publicacionguna nishca partepimi tian. Huaquin videocunaca casi 2 minutocunalla caimandami gentecunahuan parlai callaringapaj ali can. Cutin shuj videocuna gentecunata cutin visitajushpa o gentecuna tiempota charijpi utilizanallami can. Cai videocunaca gentecuna Bibliamanda yachajuchun, tandanajuicunaman shamuna munaita charichunmi ayudan.

15. Videocunaca ¿imashinata gentecunata ayudashca? Shuj experienciamanda parlapai

¹⁵ Videocuna gentecunata imashina ayudajta ricupashun. Shuj paniguca Micronesia llactamanda shuj huarmigumanmi ¿Imamandata Bibliata yachajuna capanchi? nishca videota yapés shimipi ricuchirca. Chai huarmigu chai videota ricushcandimi cashna nirca: “Cai video ñuca propio shimipi cashcataca na crinichu. Cai videopi parlaj jarica ñuca llactamanda gentecunashnami parlajun. Paica ñuca shimitami parlajun” nishpa. Chai videota ricushca jipaca chai huarmiguca Internetpi jw.org paginapi paipa propio shimipi llujshishca publicaciongunata, videocunata ricusha nishcami (Hechos 2:8, 11​huan chimbapurashpa ricupangui). Estados Unidos llactamanda shuj paniguhuan ima tucushcata ricupashunchi. Paica shuj llactapi causaj sobrinotami charirca. Chaimi chai paniguca shuj videota paipa propio shimipi ricuchun shuj correota cacharca. Chai videota ricushca jipami paipa sobrinoca cashna nirca: “Cai videopi ushaita charij shuj nali ángel cai mundota mandajushcata yachashpaca manllarircanimi. Chaimi Bibliata yachachihuachun mañarcani” nishpa. Chai panigupa sobrinoca villachichun na saquij llactapimi causan.

BIBLIAMANDA CABALTA YACHACHINGAPAJ PUBLICACIONGUNA

16. Cada folletocuna imapa cashcata intindichipai: a) Na huañushpa causangapaca Diosta uyashunchi. b) Taita Diosmanda ali villaigucuna. c) ¿Picunata Jehová Diospa munaita ruranajun?

¹⁶ Folletocuna. Gentecuna na lii ushajpi o paipa propio shimipi publicacionguna na tiajpica ¿imashinata Bibliamanda paicunata yachachi ushapanchi? Chaipaca shuj alipacha publicaciondami charipanchi. Na huañushpa causangapaca Diosta uyashunchi nishca folletomi can.c Shinallata gentecunaman Bibliata yachachingapaca Taita Diosmanda ali villaigucuna nishca folletotami charipanchi. Parlai callarishpaca último paginapi 14 temacunata ricuchishpa, shuj temata agllachun mañai ushapanchi. Chai jipaca chai temamanda yachachina capanchi. Gentecunata cutin visitajushpaca ¿shina rurapashcanguichu? Yachachingapaj publicacionguna nishca partepica ¿Picunata Jehová Diospa munaita ruranajun? nishca folletopashmi tian. Cai folletoca Bibliata yachajujcuna Jehovapa organizacionda ashtahuan rijsichunmi ayudan. Cai folletota imashina utilizanata yachangapaca, marzo de 2017 Jesuspa Chaquita Catishpa Causashunchi Yachachishunchi Tandanajuipi Yachajungapaj hojapi ricupangui.

17. a) Bibliata yachachingapaj librocunaca ¿imapata can? b) Tucui bautizarishca huauquipanicunaca ¿imatata rurana capanchi? ¿Imamandata chaita rurana capanchi?

¹⁷ Librocuna. Folletohuan Bibliata yachachijushpapash ¿Imatata Bibliaca yachachin? nishca libromanmi cambiai ushapanchi. Bibliamanda yachajujca, libropimi Bibliapa minishtirishca yuyaicunata ashtahuan intindi ushanga. Chai librota yachajushca jipa, espiritualmente pai ñaupaman catijujpica Taita Diosta juyashpa catipashunchi nishca librohuanbash yachachinallami can. Cai libropica Bibliapa consejocuna paipa causaipi imashina pactachinata yachajunga. Bibliata yachajujcunaca bautizarishca cashpapash chai ishcai librocunatami yachajuna can. Shina rurajpimi paicunaca Bibliapa yachachishcata alipacha yachajunga (Colosenses 2:6, 7, liingui).

18. a) 1 Timoteo 4:16​pi nishcashnaca ¿imatata rurana capanchi? Chaita ruranaca ¿imashinata ayudan? b) Yachachingapaj publicaciongunataca ¿ima munaihuanda utilizana capanchi?

¹⁸ Tucui Testigocunami ali villaigucunataca villachina capanchi. Shinami paraíso alpagupi para siempre causaita charichun gentecunataca ayudashun (Col. 1:5; 1 Timoteo 4:16, liingui). Villachingapaca Yachachingapaj publicacionguna nishca partepica ashtaca publicaciongunatami charipanchi (“Yachachingapaj publicacionguna” nishca recuadrotapash ricupangui). Chai publicaciongunata utilizangapaj esforzaripashunchi. Cada publicadormi ima publicacionda utilizanata, imashina utilizanata ricuna can. Shinapash publicaciongunataca na yangata saquinachu capanchi. Gentecuna Bibliamanda na yachangapaj munajpica chai publicaciongunataca ama saquipashunchichu. Ñucanchica ‘Causaita causagringapaj’ munaj gentecuna, humilde gentecuna, Bibliata yachangapaj munajcuna Jesusta catij tucuchumi munapanchi (Hech. 13:48; Mat. 28:19, 20).