LECCIÓN 8
¿Imapïmi Dios cayächinla juyucaycäta ñacacuycäta?
1. ¿Imanuypaćh mana allin cawsayca licalila?
Dios uycuśhan tiempućhu’a, manamá nunacunapa gubiernun ni imactapis allichayta atipälachu
Satanás punta casquicuyninwanmi licalichila mana allin cawsaycäta cay allpäćhu. Puntacta allin perfectu anjilmi cala. Cay anjilca manamá rasuncaćhu cayta munalachu (Juan 8:44). Pay’a adoräśha cayta munala, manam Jehovata adorananchicta munanchu. Chaymi Adan Eväcta creićhila Jehova’a manam tuqui Diosćhu nil. Satanas’a, manam Jehovata casucunanchicta munanchu, Adan Eva mana Diosta casuculmi ñacacuyta allaycalälila, wañuycätapis talicalälin. Ashicuy Génesis 3:1-6, 19.
Satanasmi Evacta nila: ama Diosta casucuychu. Chaywanmi Diosta contradecíta allayculun. Satanas manam munanchu Jehová gubernananta. Nunacunäpis Diablüpa nishantam lulayalcan. Chaymi cay enterun llaqui llaqui allpaca Satanaspa maquinćhu cayan. Ashicuy Juan 14:30 ñatac 1 Juan 5:19.
2. ¿Perfectuchućh cala Diospa obrancuna?
Jehovapa obrancuna’a, perfectumä. Punta nunacunäpis, anjilcunäpis Diosninchicta casucücamam cala ima lulaycunaćhupis (Deuteronomio 32:4, 5). Pay’a, umälanchicmi llapanćhicta libertata, quiquinchic aclananchicpa allinta ü mana allintapis. Chaymi allinta lulaśhun Diosta cuyal’a. Ashicuy Santiago 1:13-15 ñatac 1 Juan 5:3, 4.
3. ¿Imapićha Dios cayächinla sasa cawsacuycäta?
Jehová alcaycuyanlami Satanaspa contradecicuyninta. ¿Imactaćh alcayan? Yaćhayanchicñam nunacunäpa gubiernun’a manam allinchu mana Jehovaman chalapaculcaptin (Eclesiastés 7:29; 8:9). Adan licalimuśhan tiempupïta canancäma manam allin gubiernu canchu nï jucllapis, manam ishyaycunäta, delitucunäta, guerracunäta chincachita atipanchu nunacunapa gubiernuncuna. Ashicuy Éxodo 9:16 ñatac Jeremías 10:23.
Diosninchicta cäsucuptinchic’a vidanchic tuquim can’a (Isaías 48:17, 18). Pay’a prontuñamá camacan’a cay allpäpita llapa nunacunap gubiernunta. Chaymá cay allpäćhu Jehovapa gubiernunta cäsucuśhun wiñay wiñay cawsananchicpa (Isaías 11:9). Ashicuy Daniel 2:44.
Licay cay videuta: ¿Por qué permite Dios el sufrimiento?
4. ¿Imactaćh lulachwan Diospa paciencian caśhancama?
Satanás niyanmi nunacunäta Diosta servipäcun interesllanwanmi. Diospa paciencian caśhancama’a, llapanchic yaćhachishunmi nunacunäta Diabluca alli casqui caśhanta. Canan’a apuyäśhun Diospa gubiernuntam manam nunacunäpa gubiernuntachu. Ashicuy Job 1:8-12 ñatac Proverbios 27:11.
5. ¿Ya’anchic imanuypaćh Diospa gubiernunta aclaśhun?
Lulayninchicwan licachicunchic munanchicchun ütac manachun Diosta casucuyta
Puntacta’a yaćhaśhunlämi imanuypa Diosta adoränanchicta, Bibliaćhu nishantam lulaśhun (Juan 4:23). Jesuspa ejempluntam lulaśhun, amam políticuman’a, nï guerracunaman miticuśhunchu, chaycunacta mana lulal’a Satanaspa gubiernunta rechasäśhunmi. Ashicuy Juan 17:14.
Satanas’a, pantayächinmi nunacunäta, juchapacuycunacta lulapäcunampa. Chaycunacta mana lulaptinchic’a, amigupis, familiapis burlaculcan’am ya’anchicpita. Manam jawca cawsananchicta munanchu (1 Pedro 4:3, 4). Chay pasamaptinchic’a Diospa siervuncunap limayninman chalapacuśhun chaycunacta cäsuculmi Satanas casqui caśhanta yaćhaśhun. Ashicuy 1 Corintios 6:9, 10 ñatac 15:33.
Alli cuyacuyninwanmi Dios munayan chincachïta ñacacuycunäta, juyu caycäta. Jehovaman chalapacucä cawsapäcun’a wiñay wiñaypäñam cay allpäćhu. Ashicuy Juan 3:16.