Bibliäpa yaćhachicuynincuna ¿imanuypam yanapämanchic?

1. ¿Imapïmi necesitanchic caminaycamänanchicta?

Taytanchic Jehovami licalichimälanchic. Diosninchic’a janapämanchicmi yaćhayninwan. Allictam cuyamanchic ya’anchiccunapïpis preocupacuyanmi. Manam munaśhanchicćhu pulicunanchicpachu lulamälanchic (Jeremías 10:23). Urucunapis taytampa cuydaduntam necesitapäcun, chaynumi nunacunäpis Jehovapa cuydaduntam necesitanchic (Isaías 48:17, 18). Bibliapi yaćhachicuynincuna Jehovapa allin regalunmi. Ashicuy 2 Timoteo 3:16.

Jehovapa mandatuncuna yaćhachimanchic allin cawsayniyü cananchicpa śhamü tiempućhupis wiñay wiñaypa bendicionninta ćhasquinanchicpa. Paymá licalichimälanchic, chaymi cushisha payta servïcuśhun. Ashicuy Salmo 19:7, 11 ñatac Apocalipsis 4:11.

2. ¿Imam cayan Bibliapa yaćhachicuynincuna?

Bibliapa principiuncunap yaćhachicuynin servimanchic ñacacuy llaquicuyninchiccunacta allichananchicpa. Ñatac Bibliapa mandätuncunam valimanchic mana allin cawsayninchicta allichänanchicpa (Deuteronomio 22:8). Bibliapa yaćhachishanta entendinanchicpa allictam tantiacuśhun (Proverbios 2:10-12). Bibliaca yaćhachimanchicmi vidanchic Diospa regalun caśhanta. Diospa yaćhachicuynincuna, alli puydïmi cayan, servimäśhunmi trabajunchicćhu, wasinchicćhu, viajenchiccunaćhupis cuydaduwan cananchicpa. Ashicuy Hechos 17:28.

3. Bibliäćhu, ¿ima iśhcay yaćhachicuymi mas puydïnin cayan?

Jesús ishcay yaćhachicuytam nila. Puntaca’a, Diospa munaśhanta lulananchicpa, ñatac servïcuśhun cuyaywanmi. Siempre chaytam lulapacun’a (Proverbios 3:6). Diosta cäsucul amigunñam capäcun’a, cawsapäcun’a cushiśha wiñay wiñaypämi. Ashicuy Mateo 22:36-38.

Cay ishcay yaćhachicuyca yanapämanchic nunacunäwan allinpa cawsananchicpa (1 Corintios 13:4-7). Cayta lulalmi cawsay vidanchicćhu Dioswannuy nunamasinchicwan cuyanacuśhun. Ashicuy Mateo 7:12 ñatac 22:39, 40.

4. ¿Imanuypam yanapämanchic Bibliäpa yaćhachicuynincuna?

Bibliäpa yaćhachicuynincuna yanapämaśhun familianchicwan cuyanacul jucllapi cawsananchicpa (Colosenses 3:12-14). Yaćhachicuyninpis yanapayanmi casadocunäta wiñaypa cuscan cawsapäcunampa. Ashicuy Génesis 2:24.

Bibliäpa yaćhachicuynin yanapämanchicmi imacunaćhüpis. Trabajupapis aśhipäcun allin lulacütam, manam illacunacta nï suwacunacta munanchu (Proverbios 10:4, 26; Hebreos 13:18). Bibliapa yaćhachicuyninćhumi niyamanchic capamäśhallanchicwan jawca cawsananchicpa, Jehovapa amigun cananchicmi masta puydiyan ima cäninchiccunapïpis. Ashicuy Mateo 6:24, 25, 33 ñatac 1 Timoteo 6:8-10.

Bibliapa yaćhachicuynincuna ayudamanchicmi aychanchicta allinta cuydacunanchicpa, mana shincacul’a, cuydacuyanchicmi. Diosninchic’a manam munanchu shincananchicta, chayta mana casucul’a ishyaytapis, wañuytapis taliculuchwanmi. (Proverbios 14:30; 22:24, 25; 23:20). Jampillapa upiachwanmi, Jehová manam munanchu shincananchiccama ütac walan walan upiananchicta (Salmo 104:15; 1 Corintios 6:10). Bibliäpa yaćhachicuynin yanapämanchicmi cuydacunanchicta pensayninchicćhupis, lulayninchicćhupis (Salmo 119:97-100). Allin cristianucunaca’a respetaśhunmi Bibliäpa yaćhachicuynincunacta, chayta lulalmi Jehovapa śhutinta altüman juluycuśhun. Manamá quiquillanchicpächu munächwan. Ashicuy Mateo 5:14-16.