Unay yacu fisyuca: ¿Mayancunaćh Diosta uyaliculcala?

Unay Noé tiempućhu nunacunaca juyu lulayniyullañam capäcula (Génesis 6:5)

Adanwan Evam wawichuliculcala, chaynupam milälalila lluy allpaman. Chaypïmi, juc anjilcunapis Satanasnú lulalalin, ñatac rebeldiculcul Diosta cunträlalin

Paycuna cielüpi jialpalälimul nunaman muyulalin, wamlacunawan cuscanampa. Juyucamacta, callpa sapa camactam chulicälalin

Achca juyucama nunam milalun. Bibliami niyan: “Nunacunapa juyu caynin milala allpaman”. Juyucaycallañam cayala nunacunapa tantiayninćhu

Noé, Diosta uyaliculcul arcatam lulala (Génesis 6:13, 14, 18, 19, 22)

Noé allinunam cala. Jehovami nila: “Lluy juyu nunacunata chincachishämi yacu fisyuwan”

Nilatacmi: “Ilucunapïmi lulanqui jatun cajunta wampulänampa”. Chaytamá lisinchic Noepa arcan. Chaymanmá yaycapacunan familiantin, ñatac imaymana uywacunawampis

Noé nunacunata willaculatacmá yacu fisyum can’a nil, manatacmá uyaliculcälachu. Waquincuna asiculcan, juccuna ällicta piñacälalin

Noé arcata ishpichil, luliman ayculun uywacunata