YAĆHACHICUY 1
¿Imanuypam yanapaśhunqui Bibliaca?
Llapanchicmi yaćhayta munanchic ñacacuycäpi, wañuycäpi ñatac śhamü tiempupi. Ñatacmi preocupacunchic illaycapï, ñacaywanmi talinchic familianchiccuna micuśha cananpä, cushisha cananpä. Achcam chaycunapita Bibliawan yaćhalalin ñatac yanapamäśhunmi cushisha cananchicpä, ¿Bibliaca yanapanmanchun mayanta lisiśhayquita?
1. ¿Ima tapuycunactam cutichimanchic Bibliaca?
Bibliaca cutichimanchic cay tapuycunatam: ¿imanuypam allaycula cawsayca?, ¿imapïmi cayćhu cayanchic?, ¿imapïmi allin nunacuna ñacaculcan?, ¿imam pasamanchic wañucuptinchic?, ¿imapïmi achca guerracuna cayan?, ñatac ¿imaćh pasan’a cay allpata? Bibliaćhumi talinchic cay tapuycunapa cutichininta, achca nunacunañam talilalin chaymi cushisha cayalcan.
2. ¿Imanuypam Bibliaca yanapamanchic cushisha cawsananchicpä?
Bibliaca allin consejucunactam umanchic. Yaćhachin familiacunaca cushisha cananpä. Ñatac imapipis manaña llaquicunanchicpä, nunamäsinchicwanpis jawca cawsananchicpä. Cusca estudiaptinchicmi yaćhanqui masta imacunactapis Bibliapi. Tantianquim Bibliaćhu “lluy isquirbishacunaca allin ninchicpämi” (2 Timoteo 3:16).
Cay folletuca yanapaśhunqui Bibliapi yaćhanayquipä. Chaymi callpanchacunqui Bibliapi lluy textucuna cäcunäta ashilcul, liguinayquipä.
MASTA YAĆHAYCUŚHUN
Canan yaćhaśhun imanuypa Bibliaca yanapaśhanta achca nunacunacta, imactam lulachwan Bibliata ligui gustamananchicpä, chaypämi juccunawan yanapachicuśhun entindinapä.
3. Biblia yaćhachiśhancuna allinninchicpämi
Bibliaca acchinümi, yanapamanchicmi imactapis allinta tantiananchicpä. Willamanchictacmi śhamü tiempućhu imacuna pasanancunacta.
Liguiśhun Salmo 119:105 ñatac limaśhun caypi:
¿Imactam nila salmo escribïca Bibliapi?
Am, ¿ima ninquim Bibliapi?
4. Bibliaćhumi ima tapuyninchiccunactapis yaćhaśhun
Juc walmim imaymanacta unayña tapucula, pay Bibliata estudialmi cay tapuynincunacta yaćhala. Licaśhun VIDEUCTA ñatac limaśhun caypi:
¿Imacunactam tapucula videućhu walmica?
¿Imanuypam Bibliapi yaćhaśhan yanapala?
Biblia nishannü ya’anchic tapuycuśhunmi. Liguiśhun Mateo 7:7 ñatac limaśhun caypi:
Am, ¿ima ninquim Bibliaca cutichinmanchun tapuyniquicunacta? ¿Mayannintam yaćhayta munanqui?
5. Imactam lulachwan Biblia liguita gustamananchicpä
Achca nunacunactam Bibliata ligui gustan allinninpämi. Licaśhun VIDEUCTA ñatac limaśhun caypi:
¿Imactam nipäcun videućhu wamla-walaśhcuna liguiśhampi?
¿Imapïmi paycunapä Bibliata liguishan mas allin?
Bibliapi yaćhaśhanchiccuna consuelamanchic, willamanchicmi śhamü tiempućhu tuqui cawsacunanchicpä. Liguiśhun Romanos 15:4 ñatac limaśhun caypi:
¿Bibliapi masta yaćhayta munanquimanchun?
6. Bibliapi entindichwan juc yanapamaptinchicmi
Liguichwanmi Bibliata japallanchic pero, juc yanapamaptinchicmi mas allin canman. Liguiśhun Hechos 8:26-31 ñatac limaśhun caypi:
¿Imactam nesitanchic Bibliata entindinapä? (Licaśhun Hechos 8:30, 31 textuta).
Etiopía lädu hombrim nesitala jucwan yaćhaycächicuyta Bibliata allinta entindinanpä. Chaynümi cananpis, nesitapäcun jucwan yaćhaycächicuyta Bibliata allinta entindinanpä.
WAQUINCUNA NIPÄCUN: “Bibliata estudial tiempunchictam usuchinchic”.
Am, ¿ima ninquim?
IMACTAM YAĆHALUNCHIC
Bibliaca consejamanchic allin cawsananchicpä, cutichimanchictacmi puydi tapuycunacta, ñatac consuelamanchic, willamanchic śhamü tiempućhu ima pasananta.
Yalpaśhun
¿Ima consejucunactam talinchic Bibliaćhu?
¿Ima tapuycunactam Bibliaca cutichimanchic?
Am, ¿imactam yaćhayta munanqui Bibliapi?
MASTA YAĆHANAYQUIPÄ
Yaćhanquim Bibliapa consejuncunacta, imapïmi allin ya’anchicpä.
“La eterna sabiduría de la Biblia” (La Atalaya, núm. 1 2018)
Uchucllanpi ñacacu hombricta Bibliami yanapala. Licay videuta.
Yaćhanquim Bibliapa consejuncunacta familiayquiwan cushisha cawsanayquipä.
“12 claves para una familia feliz” (¡Despertad!, núm. 2 2018)
Bibliami yaćhachin mayan gobernaśhanta cay enterun allpata. Licay videuta.