¿Ima ninmi Bibliaca angelcunapi?

Jehová munanmi angelcunapi yaćhananchicta. Bibliaca ninmi paycuna “Diospa chulincuna” (Genesis 6:2; Job 38:7). ¿Imactam yaćhachin Bibliaca angelcunapi? ¿Imanuypam yanapamanchic angelcunaca? ¿Llapan angelcunachun Diosta sirvipäcun?

1. ¿Mayancunam angelcunaca?

Manalapis allpata lulalmi, Jehová licalichila angelcunata. Paycuna espiritum cielućhumi yaćhapäcun (Hebreos 1:14). Walanga-walanganpim angelcuna cayalcan, cada angel manam igualllachu (Apocalipsis 5:11). Paycuna “Jehová nishantam lulapäcun ñatac cäsuculcan” (Salmo 103:20, TNM). Unay tiempućhu angelcunaca nunacunaman willapäcula Jehová nishantam, ñatac yanapapäcula Diospa malcanta enemiguncunapi. Canan tiempućhupis, angelcunami cristianucunata yanapayan talinanpä nunacunacta Diospi yaćhayta munacunacta.

2. ¿Mayancunam Satanás ñatac demoniuncuna?

Waquin angelcuna Jehovata manañam cäsuculcälachu. Jehovapa punta enemigunpa śhutin ‘Diablum ñatac Satanás cay allpaćhu llapan nunacunacta engañayan’ (Apocalipsis 12:9). Satanás angelcunactapis, nunacunactapis gobernaytam munala, chaymi Adantawan Evacta engañala. Waquin angelcunactapis Diospimi calupächila. Chay mana cäsucü angelcunami demoniucunaca. Jehovami paycunacta cay allpaman jitalpamula, prontuñam chincachin’a (liguicuy Apocalipsis 12:9, 12).

3. ¿Imacunawanmi engañamanchic Satanás ñatac demoniuncuna?

Satanás demoniuncunawan engañan nunacunata licacücunawan, brujucunawan, espiritistacunawan ñatac caynü nila mana allincunawan chaymi waquincuna lipäcun jampichicunanpä curanderocunaman, brujucunaman. Waquincunañatacmi suertinta licachicun cocawan ñatac vidanta yaćhananpa horoscopucta liguipäcun, espiritistacunaca nipäcun wañucunawanpis limämanmi. Chaymi Jehová nimanchic: ‘Amatac licacücunäman brujacunäman liyalcaychu’ (Levítico 19:31). Chayta nimanchic Satanás demoniuncunawan mana ñacachimananchicpämi.

MASTA YAĆHAYCUŚHUN

4. Angelcunaca nunacunata yanapan Jehovata lisinanpämi

Angelcunaca manam nunacunaman quiquinchu Diospi yaćhachipäcun. Aśhwanpa yanapapäcun Diospa siervuncunacta talinanpä Diosta lisi munäcunacta. Liguiśhun Apocalipsis 14:6, 7 ñatac limaśhun caypi:

• ¿Imapïmi necitanchic angelcunata yanapamananchicpä willacuycäćhu?

• Amtapis angelcunaca yanapaśhunquimanmi Diospi yaćhay munäcunacta talinayquipä, ¿cushicunquichun chayta yaćhalcul?

5. Amam linquichu licacücunaman nï chaynü niläcunaman

Satanás demoniuncunawan Jehovapa enemiguncunam, ñatac ya’anchicpapis. Liguiśhun Lucas 9:38-42 ñatac limaśhun caypi:

• ¿Imanuypam demoniucunaca nunacunata ñacachin?

Ya’anchic manam demoniucunawan engañachicuyta munanchicchu, chaymi ama liśhunchu licacücunaman. Liguiśhun Deuteronomio 18:10-12 ñatac limaśhun caypi:

• ¿Imacunawanmi demoniucunaca nunacunata engañan? Am, ¿yaćhaśhayquićhu nunacunaca chaycunacta lulapäcunchun?

• ¿Allinchun Dios chaycunacta amam lulanquichu nimaśhanchic?

Licaśhun VIDEUCTA ñatac limaśhun caypi:

VIDEO: “Opónganse al Diablo” (5:02)

• Palesa śhutiyü walmi wawinpa maquinman wataśhan mana imapis pasananpä, ¿allinchun cala?

• Palesa śhutiyü walmica, ¿imactam lulanan cala mana dañucta lulananpä?

Unaypiñam rasunpa cristianucunaca demoniucunapa contran cayalcan. Liguiśhun Hechos 19:19 ñatac 1 Corintios 10:21, ñatac limaśhun caypi:

• Satanás demoniuncunawan llapan imacunawanpis nunacunata engañaśhanta, ¿imapïmi puydin caycunacta cañanayqui?

6. Libracuchwanmi Satanaspi ñatac demoniuncunapi

Satanasmi gobernayan demoniuncunacta. Pero cäsucü angelcunata dirigiyan arcángel Miguelmi, pay’a Jesusmi. ¿Ayca poderniyümi Jesús? Liguiśhun Apocalipsis 12:7-9 ñatac limaśhun caypi:

• ¿Mayancunam mas poderniyü: Miguelwan angelnincunachun o Satanaswan demoniuncunachun?

• Jesuspa atinincuna, ¿manchacunmanchun Satanasta demoniuncunactawan?

Am librancunquimanmi Satanaspi ñatac demoniuncunapi. Liguiśhun Santiago 4:7 ñatac limaśhun caypi:

• ¿Imactam lulanayqui mana dañucta lulaśhunayquipä Satanás demoniuncunawan?

IMACTAM YAĆHALUNCHIC

Cäsucü angelcunaca yanapamanchicmi. Satanás demoniuncunawan Jehovapa enemigunmi, paycuna engañayan nunacunata espiritistacunawanmi.

Yalpaśhun

• ¿Imactam lulayalcan cäsucü angelcunaca nunacunaca Diosta lisinanpä?

• ¿Mayancunam Satanás ñatac demoniuncuna?

• ¿Imapïmi mana linayquichu curanderucunaman ñatac licacücunaman?

MASTA YAĆHANAYQUIPÄ

¿Imapïmi ninchic Jesusta arcángel Miguelmi? Liguiy.

“¿Quién es el arcángel Miguel?” (Artículo de jw.org)

Diabluca manam nunacunapa śhun’unćhu mana allin cäcunachu, cayta yaćhanayquipä liguiy.

“¿Existe el Diablo?” (Artículo de jw.org)

¿Imanuypam juc walmi libracula demoniucunapi? Cayta yaćhanayquipä liguiy.

“Halló propósito en la vida” (La Atalaya, 1 de julio de 1993)

¿Imanuypam Satanás engañan licacücunawan? Cayta yaćhanayquipä liguiy.

“La verdad acerca de la magia, la hechicería y la brujería” (¿Ha encontrado usted el camino a la vida eterna?, parte 5)