• ¿Imanuypam Jehová dirigiyan malcanta?
    ¿Munanquimanchun wiñay-wiñaypä cushisha cawsacuyta? Bibliapi yaćhanapä

    • ¿Imanuypam Jehová dirigiyan malcanta?

      Jehová manam munanchu llawalächita (1 Corintios 14:33). Chaymi Jehová malcanta dirigiyan. ¿Imanuypam dirigichin Jehová Jesuswan? ¿Imanuypam ya’anchic yanapachwan imapis allin cananpä?

      1. ¿Mayanmi dirigiyan Diospa malcanta?

      “Cristum umanü llapan hermanucunapa” (Efesios 5:23, TNM). Jesusmi cielupi dirigiyan Diospa malcanćhu lulaśhancunacta. Nombrala juc ‘yaćhayniyü tantiayniyü sirvintica’, paycunacta lisinchictacmi Diospa-malcanta-dirigïcuna śhutiwan, punta-lï-yaśhacunaca allin experienciayümi capäcun (liguicuy Mateo 24:45-47). Jerusalenpi apostolcunanü ñatac punta-lï-yaśhacunanü, Diospa-malcanta-dirigïcunaca yanapapäcun hermanunchiccunacta enterun allpaćhu (Hechos 15:2). Imactapis tantiananpä Diostam mañaculcan, Bibliatam liguipäcun ñatac Jesuspa nishantam cäsuculcan.

      2. ¿Imactam lulapäcun hermanuncunapï punta-lï-yaśhacunaca?

      Punta-lï-yaśhacunaca allin tantiayniyümi capäcun, paycuna Bibliawanmi yaćhachipäcun ñatac hermanunchiccunacta callpanchaycun. Paycuna manam illaypachu yanapapäcun, aśhwanpa Diosta cushichita munalmi (1 Pedro 5:1, 2). Cantacmi punta-lï-yaśhacunapa-yanapanincuna, paycuna callpanchaculcan punta-lï-yaśhacuna capäcunanpä.

      Diospa-malcanta-dirigïcunaca aclan waquin punta-lï-yaśhacunacta malcan-malcan-hermanucunacta-watuculcananpä. Paycuna watuculcan hermanucunacta callpanchaycunanpä. Chaypi’a, nombran punta-lï-yaśhacuna cananpä ñatac punta-lï-yaśhacunapa-yanapanincuna cananpä Bibliaca nishannü (1 Timoteo 3:1-10, 12; Tito 1:5-9).

      3. ¿Imactam lulan cada Testigo?

      LLapanchicmi ‘alawanchic Jehovapa śhuntinta’ utunacuycunaćhu. Cayta lulan comental, taquil ñatac willacul (liguicuy Salmo 148:12, 13).

      MASTA YAĆHAYCUŚHUN

      Yaćhaśhun Jesús imanuy dirigente caśhanta, punta-lï-yaśhacunaca Jesusta imanuypam atichipäcun ñatac imanuypam ya’anchic cäsucuchwan Jesusta ñatac punta-lï-yaśhacunata.

      4. Jesús cuyaywanmi dirigimanchic

      Jesús cuyaywanmi nimanchic atinin cananchicpä. Liguiśhun Mateo 11:28-30 ñatac limaśhun caypi:

      • ¿Imanuy dirigentim Jesús? ¿Imanuy cananchictam munan?

      Punta-lï-yaśhacunaca, ¿imanuypam atichipäcun Jesústa? Licaśhun VIDEUCTA.

      VIDEO: La ayuda de los ancianos tras el terremoto de Nepal (4:56)

      Bibliaca ninmi punta-lï-yaśhacunaca imanuypam yanapanan hermanucunacta.

      Liguiśhun Isaías 32:2 ñatac 1 Pedro 5:1-3, ñatac limaśhun caypi:

      • Punta-lï-yaśhacunaca Jesusnümi jawca cäcunanchicpä callpanchaculcan, ¿cushicunquichun chayta yaćhal?

      • Punta-lï-yaśhacunaca, ¿imacunacta lulaltacmi Jesusta atichipäcun?

      5. Punta-lï-yaśhacunaca lulaśhancunawanmi yaćhachimanchic

      Punta-lï-yaśhacunaca, ¿imanuy capäcunantam munan Jesús? Licaśhun VIDEUCTA.

      VIDEO: Ancianos, ¡vayan al frente! (7:39)

      Jesús yaćhachila imanuy capäcunantam punta-lï-yaśhacunaca. Liguiśhun Mateo 23:8-12 ñatac limaśhun caypi:

      • Bibliaca nishannü, ¿imanuymi capäcunan punta-lï-yaśhacunaca? ¿Curacunaca ñatac pastorcunaca chaynüchun capäcun?

      A. Dibujucuna juc punta-lï-yaśhap Bibliata estudiayan familiancunawan: 1. Mañacuyan manalapis Bibliata estudial. 2. Yaćhayachin walminwan Bibliapi chulinta. B. Quiquin punta-lï-yaśhaca walminwan hospitalcäćhu watucuyalcan juc hermanacta. C. Quiquin punta-lï-yaśhaca Diospi willacuyan juc hombricta wasinćhu. D. Dibujucuna: 1. Quiquin punta-lï-yaśhaca discursayan juc utunacuyćhu. 2. Saloncäćhu pichayan.

      1. Punta-lï-yaśhacunaca allictam estudiapäcun Bibliata ñatac yanapapäcun familianta Diosman aśhuycunanpä.

      2. Punta-lï-yaśhacunaca callpanchaculcan yanapaycalinanpä llapan hermanucunacta.

      3. Punta-lï-yaśhacunaca callpanchaculcan Diospi willaculcananpä.

      4. Punta-lï-yaśhacunaca allin yaćhachicümi. Yanapapäcuntacmi pichayćhu ñatac juc lulaycunaćhupis.

      6. Punta-lï-yaśhacunata cäsucunanchicmi

      Bibliami nimanchic punta-lï-yaśhacunata cäsucunanchicmi. Liguiśhun Hebreos 13:17 ñatac limaśhun caypi:

      • Liguiśhanchicnü, ¿imapïmi punta-lï-yaśhacunata cäsucunanchic ñatac sujetacunanchic? ¿Yanapaśhunquichun paycunacta cäsucuptiqui?

      Liguiśhun Lucas 16:10 ñatac limaśhun caypi:

      • ¿Imapïmi puydin punta-lï-yaśhacunata cäsucunanchic llapan imacunaćhupis?

      WAQUINCUNA NIPÄCUN: “Diosta adorananchicpä manam religiunćhulächu caśhun”.

      • Jehovapa testiguncunawan cusca Diosta adoraptiqui, ¿yanapaśhunquimanchun?

      IMACTAM YAĆHALUNCHIC

      Jesusmi dirigiyan Diospa malcanta. Paymi nombrala punta-lï-yaśhacunata yanapamänanchicpä, paycuna yaćhachimanchictacmi lulaśhancunawan chaymi paycunacta cäsucunanchic.

      Yalpaśhun

      • ¿Mayanmi dirigiyan Diospa malcanta?

      • ¿Imanuypam yanapaycalin punta-lï-yaśhacunaca hermanucunacta?

      • ¿Imactam lulan cada testigo?

      Caypä callpanchacuy

      MASTA YAĆHANAYQUIPÄ

      Diospa-malcanta-dirigïcunaca ñatac punta-lï-yaśhacunaca, ¿imactam lulapäcun hermanuncunacta cuyaypï? Licay videucta.

      Fortalecen a los hermanos durante la persecución (4:22)

      Malcan-malcan-hermanucunacta-watucücunaca, ¿imacunactam lulapäcun? Licay videucta.

      La vida de un superintendente de circuito en una zona rural (4:51)

      Yaćhay walmicunaca ima lulaśhancunacta Diospa malcanćhu, liguiy.

      “¿Tienen ministras religiosas los testigos de Jehová?” (La Atalaya, 1 de septiembre de 2012)

      Imanuypam callpanchacun punta-lï-yaśhacunaca yanapaycalinanpä hermanuncunacta, liguiy.

      “Los ancianos cristianos, colaboradores para nuestro gozo” (La Atalaya, 15 de enero de 2013)