YAĆHACHICUY 54
¿Mayancunam ñatac imactam lulapäcun ‘yaćhayniyü tantiayniyü sirvintica’?
Jesusmi Diospa malcanpa “uman” (Efesios 5:23). Dirigiyan cielupi cay allpaman atinincunacta ‘yaćhayniyü tantiayniyü sirvintïwan’ (liguicuy Mateo 24:45). Chay ‘sirvintïta’ quiquin Jesusmi aclala, chaymi cay ‘sirvintica’ autoridäniyü. Chaynü calpis, jinallam Jesuspa sirvintin cayan ñatac sirviyan paypä hermanuncunacta. Pero, ¿mayanmi chay ‘sirvintica’? ¿Imanuypam cuidamanchic?
1. ¿Mayanmi ‘yaćhayniyü tantiayniyü sirvintica’?
Jehová unaypiña nunacunacta aclala malcanta yanapananpä (Malaquías 2:7; Hebreos 1:1). Jesús wañucuśhampi, Jerusalenpi apostolcunaca ñatac punta-lï-yaśhacunaca dirigipäcula Diospa malcanta (Hechos 15:2). Chaynümi canan tiempupis Diospa Malcanta Dirigïcunaca o Cuerpo Gobernantica yanapamanchic feninchic masïsu cananpä ñatac predicacionninchicćhu. Paycunam ‘yaćhayniyü tantiayniyü sirvintica’ (Mateo 24:45a). Diospa Malcanta Dirigïcunaca chuya espirituwan aclaśhan Jesuswan cielupi gobernamananchicpä.
2. ¿Imanuypam yanapamanchic ‘yaćhayniyü tantiayniyü sirvintica’?
Jesús nila ‘yaćhayniyü tantiayniyü sirvintïta’ lluy cristianucunata “ürallanćhu micachinanpä” (Mateo 24:45b). Imanuymi micuycäpis callpacta umanchic, chaynümi Diospi yaćhachimäśhanchicwan callpanchamanchic, Jehovata jinalla sirvinanchicpä lluy śhun’unninchicwan ñatac predicananchicpä (1 Timoteo 4:6). Caycunacta ćhasquinchic micuytanümi utunacuycunaćhu, jatun utunaycunaćhu, publicaciuncunaćhu ñatac videucunaćhu. Chaycunam yanapamanchic Jehovapa munaśhanta yaćhananchicpä ñatac paywan amistäninchic mas masïsu cananpä.
MASTA YAĆHAYCUŚHUN
¿Imapïmi necitanchic yanapamananchicta ‘yaćhayniyü tantiayniyü sirvintica’? Chaypimi yaćhaśhun.
Diospa Malcanta Dirigïcunami umanchic micuy espiritualta, yanapamanchictacmi predicanapä ñatac sasacunacta pasaptinchic.
3. Jehovapa malcan allin organizaśham capäcunan
Jesusmi yanapayan Diospa Malcanta Dirigïcunata allin decisionta lulananpä, chaynümi apostolcunapa tiempunćhupis cala. Licaśhun VIDEUCTA.
Liguiśhun 1 Corintios 14:33, 40 ñatac limaśhun caypi:
Cay textuta liguiśhanchicnü, ¿Jehová munanchun testiguncuna organizaśha cananta? Ampä, ¿allinchun canman?
4. ‘Yaćhayniyü tantiayniyü sirvintica’ yanapamanchic predicananchicpä
Apostolcunapa tiempunćhu predicacioncämi mas puydi cala. Liguiśhun Hechos 8:14, 25 ñatac limaśhun caypi:
Apostolcunapa tiempunćhu predicacioncäta, ¿mayanmi dirigila?
¿Imactam Pedruwan Juan lulapäcula apostolcunapa mandaśhanwan?
Diospa Malcanta Dirigïcunapä predicacioncämi masta puydin. Licaśhun VIDEUCTA.
Jesús nila predicacionca allictam puydin. Liguiśhun Marcos 13:10 ñatac limaśhun caypi:
¿Imapïmi Diospa Malcanta Dirigïcunapä alli puydin predicacionca?
¿Imapïmi necitanchic yanapamananchicta ‘yaćhayniyü tantiayniyü sirvintica’ predicanapä?
5. Decidipäcun allinninchicpämi
Diospa Malcanta Dirigïcunami yanapayalcan enterun allpaćhu hermanucunata. ¿Imanuypam decidipäcun mandatucunacta umananchicpä? Chaypämi yaćhaśhun apostolcunapa tiempunćhu lulaśhanta. Liguiśhun Hechos 15:1, 2 ñatac limaśhun caypi:
¿Imapimi mana acuerduchu capäcula apostolcunapa tiempunćhu hermanucunaca?
¿Mayancunamanmi lipäcula chaypi limapäcunanpä?
Liguiśhun Hechos 15:12-18 ñatac 23-29, ñatac limaśhun caypi:
Manalapis decisionta lulal, ¿imactam lulala Diospa Malcanta Dirigïcunaca unay tiempućhu Dios yanapananpä? (Liguiśhun 12, 15 ñatac 28 versiculucunata).
Liguiśhun Hechos 15:30, 31 ñatac 16:4, 5, ñatac limáśhun caypi:
¿Ima nipäculam cristianucunaca mandatuncunacta ćhasquilul?
¿Imanuypam yaćhanchic Jehová bendiciśhanta Diospa Malcanta Dirigïcunata cäsucuśhampï?
Liguiśhun 2 Timoteo 3:16 ñatac Santiago 1:5, ñatac limaśhun caypi:
Canan tiempućhu Diospa Malcanta Dirigïcunaca decidipäcunanpä, ¿imactam lulapäcun Dios yanapananpä?
WAQUINCUNA NIŚHUNQUIMANMI: “Amcuna cäsuculcanqui dirigïcunallactam”.
¿Imapïmi seguro cayanqui Jesús yanapayäśhanta Diospa Malcanta Dirigïcunata?
IMACTAM YAĆHALUNCHIC
Diospa Malcanta Dirigïcämi ‘yaćhayniyü tantiayniyü sirvintica’ Jesusmi aclala paycunacta. Paycuna umanchic micuy espiritualtam enterun allpaćhu.
Yalpaśhun
¿Mayanmi aclala ‘yaćhayniyü tantiayniyü sirvintïta’?
¿Imanuypam yanapamanchic paycuna?
¿Diospa Malcanta Dirigïcunachun, ‘yaćhayniyü tantiayniyü sirvintica’?
MASTA YAĆHANAYQUIPÄ
Yaćhaycuy imanuypam Diospa Malcanta Dirigïcunaca decisiunnincunacta lulapäcun.
“¿Qué es el Cuerpo Gobernante de los Testigos de Jehová?” (Artículo de jw.org)
¿Imanuypam lulapäcun Diospa Malcanta Dirigïcunaca yaćhachimananchicpä? Licay videucta.
¿Imanuypam ćhasquipäcun Diospa Malcanta Dirigïcunaca Jesuspa mandaśhanta? Licay videucta.
¿Imanuypam yaćhanchic utunacuyninchicćhu ñatac jatun-utunacuyninchicćhu Jehová yanapaśhanta Diospa Malcanta Dirigïcunata? Licay videucta.