YAĆHACHICUY 36
Lluy imaćhupis honradum cananchic
Lluymi munanchic nunamasinchiccuna honrado cananta. Jehová Diospis honrado cananchictam munan. Chaymi yaćhaśhun honrado cayca allinninchicpä caśhanta.
1. ¿Imapïmi lluy imaćhupis honrado cananchic?
Lluy imaćhupis honrado captinchic, licachiśhun Jehovata cuyaśhanchictam ñatac respetaśhanchictam. Pay yaćhanmi ima lulaśhanchictapis ima piensaśhanchictapis (Hebreos 4:13). Honrado captinchic, pay alli-allictam cushicun. Bibliaćhu nin: “Caynu juyu nunacunätá Tayta Dios millachicunmi, allin nunacunäwanñatacmi ichá cusca caycun” (Proverbios 3:32).
2. ¿Imacunaćhumi honrado cananchic?
Jehová munan “nunamasiquiwan rasuncällactam limaycälinayqui” (Zacarías 8:16, 17). Manam casquipananchicchu nï willaśhunchu imactapis milaycachil nï pacaycul familianchiccunacta, trabajawshimasinchiccunacta, hermanunchiccunacta, autoridäcunacta nï piccunactapis. Chaypi’a manam suwacunanchicchu nï engañacunanchicchu (liguicuy Proverbios 24:28 ñatac Efesios 4:28). Impuestocunactapis pagananchicmi (Romanos 13:5-7). Diospa siervuncuna lluywanpis, mayćhupis honradum cananchic (Hebreos 13:18).
3. ¿Imapïmi alli puydin honrado cananchic?
Honrado captinchic, juccunapis confian’am ya’anchicman. Congregacioncäćhupis jawcam cäcuśhun, juc familianüllam cawsacuśhun. Allin concienciayümi caśhunpis. Honrado caśhanchicwanmi, “Salbaycamäninchic Tayta Diospa yaćhachicuyninta sumä-sumä tuquicta” adornanchic, cayta licalmi juccunapis Jehová Diosta servita munapäcunman (Tito 2:10).
MASTA YAĆHAYCUŚHUN
Yaćhaśhun Jehová Dios imanuypam lican honrado caśhanchicta ñatac imanuypam honrado caśhun lluy lulaśhanchiccunaćhu.
4. Jehová Dios honrado nunacunactam munan
Liguiśhun Salmo 44:21 ñatac Malaquías 3:16, ñatac limaśhun caypi:
¿Imactapis pacachwanchućh Jehová Diospi?
Rasuncäta niptinchic masqui sasa captinpis, ¿imanuymi sientin’a Jehová?
Chulincuna rasuncäta niptin, taytancunacta cushichinmi. Ya’anchicpis rasuncäta niptinchic, Jehovata cushichinchicmi.
5. Imaypis honradum cananchic
Waquincuna nipäcun, honrado cay manam allinchu, pero Diosta sirvïcunaca alli honradum cananchic. ¿Imapïmi? Licaśhun VIDEUCTA.
Liguiśhun Hebreos 13:18 ñatac limaśhun caypi: ¿Imanuypam honrado canayqui...
... familiayquiwan?
... trabajuyquićhu o estudiaśhayquićhu?
... mayćhu cayalpis o imacta lulayalpis?
6. Honrado cayca allinninchicpämi
Ayveces honrado caśhanchicpï sasacunacta pasachwanmi, pero tiempo pasaluptin allinninchicpämi can’a. Liguiśhun Salmo 34:12-16 ñatac limaśhun caypi:
¿Imanuypam honrado caśhanchic cawsayninchicćhu yanapamachwan?
Esposucunapis walmicunapis honrado capäcuptin, tuquim cawsaculcan.
Trabajunćhu honrado capäcuptin, jefencunapis confian’am payman.
Malcayquichu honrado captiqui, autoridäcunapis respetaśhunquim.
WAQUINCUNA NIPÄCUN: “Yan’alla casquicuyca manam juyuchu”.
¿Munanchun Jehová casquicunanchicta masqui yan’allactapis?
IMACTAM YAĆHALUNCHIC
Jehová munanmi sirvïnincuna honrado cananta lulaśhancunaćhu ñatac niśhancunaćhu.
Yalpaśhun
¿Imacunaćhumi honrado cananchic?
¿Imactapis pacachwanchućh Jehovata?
¿Imapïmi imacunaćhupis honrado canayqui?
MASTA YAĆHANAYQUIPÄ
¿Imanuypam taytacuna yaćhachinman chulincunacta honrado cananpä? Licay videucta.
¿Ima bendiciuncunactam ćhasquipäcun’a limaśhancunacta cumplicunaca? Licay videucta.
Pagananchicchun impuestucta autoridäcunaca masqui chaywan mana allincunacta lulaptinpis, liguiy.
“¿Debe usted pagar impuestos?” (La Atalaya, 1 de septiembre de 2011)
¿Imanuypam juc suwa nuna honraduman muyula? Chayta yaćhanayquipä liguiy.
“Aprendí que Jehová es bueno y nos perdona” (La Atalaya, 1 de mayo de 2015)