YAĆHACHICUY 26
¿Imapïmi cayan juyucayca ñatac ñacacuyca?
Un’aypï ima llaquipis pasaptin, ayvesćhua nipäcun: “¿Imapïmi caynüña ñacanchic?”. Cananmi yaćhaśhun ima ninmi Bibliaca caypi.
1. ¿Imanuypam Satanás juyucaycäta licalichila?
Satanasmi Diospa contran ćhulacäcula, gobernante cayta munalmi Adantawan Evacta juchaman palpachila. Puntacta Evactam engañala. (Génesis 3:1-5). Casquilculmi creichila Jehová manam munanchu cushisha cawsaculcanayquita nil. Chaywanmi Satanás nila: Mana Diosta cäsuculpis mas allinmi cawsapäcunqui ñatac manam wañupäcunquichu. Chaymi Bibliaćhu Satanaspi nin: “Casquim ñatac casquicunap taytanmi” (Juan 8:44, TNM).
2. ¿Imactam Adanwan Eva lulapäcula?
Jehová Adantawan Evacta cuyalmi Edén jardincaman ćhulaycula, chaymi llapan plantacunap frutuntapis micunan cala jucllactam mana (Génesis 2:15-17). Evam frutata “chalalcul micülun jinaman’a” Adantapis “uycuptin micülun” (Génesis 3:6). Chaynüpam pulan Diosta mana cäsuculcälachu. Paycuna perfectum capäcula masqui chaynü calpis quiquincunam Diospi aśhucälalila. Manam munapäculachu Dios paycunacta gobernananta, chaywanmi allaycula llapan ñacacuycunaca (Génesis 3:16-19).
3. ¿Imanuymi cayanchic Adanwan Eva mana cäsucuśhampï?
Adanwan Eva Diosta mana cäsucuśhampïmi juchasapa nunaman muyulalila, chaymi llapan milaynincunapis juchayüllaña nacinchic. Bibliaca Adanpi nin: “Wamä nuna Adan juchacta lulälulmi cay pachäman wañuyta ćhächimula. Cay juchanpïmi jinantin pachäman wañuyca miläla” (Romanos 5:12).
Chayurá, ¿imapïmi ñacacunchic? Ayveces, ñacacunchic quiquinchic mana allinta lulaśhanchicpï o mayanpis mana allinta lulaluptin. Ñatac un’aypï imapis pasaluptin (liguicuy Eclesiastés 9:11).
MASTA YAĆHAYCUŚHUN
Yaćhaśhun Dios mana juchayü caśhanta juyucaycäpi ñatac ñacacuycäpi, yaćhaśhuntacmi Jehová imanuy sintiśhanta ñacacuptinchic.
4. ¿Mayanmi juchayü nunacunaca ñacacuśhampï?
Achca nunacunam nipäcun Diosmi gobernayan munduta. ¿Rasunpachun chay? Licaśhun VIDEUCTA.
Liguiśhun Santiago 1:13 ñatac 1 Juan 5:19, ñatac limaśhun caypi:
¿Dioschun juchayü juyucaycäpi ñatac ñacacuycäpi?
5. Satanás gobiernayaptinmi ñacacuycuna cayan
Liguiśhun Génesis 3:1-6 ñatac limaśhun caypi:
¿Imactam nila Satanás Evacta? (Liguiśhun 4 ñatac 5 versiculuta).
¿Imactam Satanás Diospi nila?
Satanás nishannü, ¿necitanchun nunacunaca Dios gobernananta cushisha cananpä?
Liguiśhun Eclesiastés 8:9 ñatac limaśhun caypi:
Nunacunaca gobiernamaptinchic, ¿imanuymi cayanchic?
Adanwan Eva perfectum capäcula paraisućhumi cawsapäcula, Satanasta cäsuculmi Jehovapa contran muyulalila.
Chaymi juchapis, ñacacuypis, wañuypis licalimula.
Jehovami chincachin’a juchäta, ñacacuycäta ñatac wañuycäta. Cay allpaćhumi Paraíso can’a, chayćhumi nunacunaca wiñay-wiñaypä cawsaculcan’a.
6. Jehová llaquicunmi ñacacuśhanchicta licamul
Chayta yaćhanchic mandacü David ñatac apóstol Pedro escribiśhampïmi. Liguiśhun Salmo 31:7 ñatac 1 Pedro 5:7, ñatac limaśhun caypi:
Cay textucunaca nishannü Jehová Dios llaquicunmi ya’anchicpï, ¿ima ninquim chaypi?
7. Jehová chincachin’am ñacacuycunäta
Liguiśhun Isaías 65:17 ñatac Apocalipsis 21:3, 4, ñatac limaśhun caypi:
Liguiśhanchicnü Jehová chincachin’am lluy nanaycunäta ñatac ñacacuycunäta. ¿Cushicunquichun chayta yaćhalcul?
Yaćhaycunayquipä
Casquilculmi Satanás nila, Dios manam allin gobernantichu. Chay nishanwanmi Jehovata pin’ayman julula, ñatac śhutinta anlachila. Prontuñam quiquin Diosmi allin gobernante caśhanta lisichicun’a. Chaymi Dios manañam pin’aychu can’a śhutinpis chuyañam can’a, chaypi lluymi yaćhapäcun’a cielućhupis, allpaćhupis (Mateo 6:9, 10).
WAQUINCUNA NIPÄCUN: “Ñacacunchic Diospa castigunpïmi”.
Am, ¿ima ninquimanmi?
IMACTAM YAĆHALUNCHIC
Satanaswan Adán ñatac Evam juchayü cayalcan nunacunaca ñacaculcaśhampi. Jehová llaquicunmi ñacacuśhanchicta licamul ñatac prontuñam chincachin’a ñacacuycunäta.
Yalpaśhun
¿Imactam casquipala Diabluca Evacta?
¿Imanuymi cayanchic Adanwan Eva mana cäsucuśhampï?
¿Imapïmi ninchic Jehová llaquicunmi ñacacuptinchic?
MASTA YAĆHANAYQUIPÄ
¿Ima ninmi Bibliaca juchäpi? Chayta yaćhanayquipä liguiy.
Cayta liguilmi yaćhanqui, Satanás imacunapi Diosta juchachaśhampi.
“¿Por qué permite Dios el sufrimiento?” (La Atalaya, 1 de enero de 2014)
Judío nunacunata ñacachiptin, ¿imanuypam Jehová chayta licala? Liguiy.
“¿Por qué sucedió el Holocausto judío? ¿Por qué Dios no lo impidió?” (Artículo de jw.org)
Licay, imanuypam juc hombre ñacacuycunaćhu cayal talila cushicuyta.