Bibliaca allictam liman Diospa Gobiernunpi. Chay Gobiernümi cay allpaman tuqui cawsayta apamun’a. ¿Imam Diospa Gobiernun? ¿Imanuypam yaćhanchic Jesús ña gobernayäśhanta? ¿Imactam lulala canancama? Ñatac, ¿imactam lulan’a śhamü tiempućhu? Caycunacta yaćhaycuśhun cay yaćhachicuycäćhu ñatac ishcay atïnincunaćhu.

1. ¿Imam Diospa Gobiernun ñatac mayanmi gobernayan?

Diospa Gobiernunta quiquin Jehovami ćhulala cielućhu. Jehovami nombrala Jesusta gobiernänanpä. (Mateo 4:17; Juan 18:36). Bibliaca Jesuspi niyan: ‘mandacuynin manam imaypis camacan’achu’ (Lucas 1:32, 33). Jesús cielupimi cay allpaman gobiernamun’a.

2. ¿Mayancunam gobiernapäcun’a Jesuswan?

Jesús manam japallanchu gobiernamun’a. “Llapa malcacunäpi, llapa limäcunäpi, imaymana ayllucunäpi, llapa nasyuncunäpi […] mandapäcun’a” (Apocalipsis 5:9, 10). Jesuspa atinincuna achca nunacunam cayalcan. Pero 144,000 nunacunallam cieluta lipäcun’a, paycunam Jesuswan cusca gobernapämun’a (liguicuy Apocalipsis 14:1-4). Juccuna Jehovata cäsucücunaca cawsapäcun’a cay allpaćhumi (Salmo 37:29).

3. ¿Imapïmi Diospa Gobiernun mas allin nunacunapa gobiernunpi?

Masqui waquin gobiernucunaca imactapis allintam malcanpä lulayta munalpis, manam atipanchu, ashllay tiempullam gobiernanpis jucwanñam cambian. Pero Diospa Gobiernunćhu Jesusta manam cambian’achu. ‘Diospa Gobiernun wiñaypä tacyaycun’a’ (Daniel 2:44). Jesús cay allpata gobiernamuptin manam pictapis śhalcun’achu. Pay alli cuyacümi, llaquipayniyümi chaynü cananchicpämi ya’anchictapis yanapamäśhun (liguicuy Isaías 11:9).

4. Diospa Gobiernullanmi gobiernamun’a enterun allpata

Manam mayan gobernantipis Jesusnü’a canchu nï can’apishchu. Liguiśhun Mateo 28:18 ñatac limaśhun caypi:

• ¿Imapïmi Jesús mas poderniyü gobernante juc gobernanticunapi?

Cay allpaćhu gobiernocunaca gobiernan malcallanćhumi, manam unaychu gobiernan ñatac jucwanmi cambian. ¿Chaynüchun Diospa Gobiernunwan pasan’a? Liguiśhun Daniel 7:14 ñatac limaśhun caypi:

• Diospa Gobiernun manam chincan’achu, ¿imapïmi chay allin can’a?

• Jesusmi enterun allpata gobiernan’a, ¿imapïmi chay allin can’a?

5. Cay allpaćhu gobiernucunaca chincachiśham can’a

¿Imapïmi Diospa Gobiernun chincachin’a cay allpaćhu gobiernucunata? Licaśhun VIDEUCTA ñatac limaśhun caypi:

VIDEO: ¿Imaćh Diospa Gubiernun? (videupi partillan) (1:41)

• ¿Imanuymi cawsayca cayan nunacunapa gobiernuncunawan?

Liguiśhun Eclesiastés 8:9 ñatac limaśhun caypi:

• ¿Munanquichun Diospa Gobiernun chincachinanta cay allpaćhu gobiernucunata?

6. Diospa Gobiernunćhu gobernamücunaca cuyacümi cayalcan

Jesús cay allpaman śhamul ya’anchicnümi cawsala, chaymi yaćhan ‘pishi callpayü caśhanchicta’ (Hebreos 4:15). Jehovami aclala 144,000 nunacunacta Jesuswan gobernamünanpä. Paycuna cayalcan “llapa malcacunäpi, llapa limäcunäpi, imaymana ayllucunäpi, llapa nasyuncunäpi” (Apocalipsis 5:9).

• Jesuswan 144,000 aclaśhacunaca gobernamaptinchic, ¿entindimäśhunchun imanuy caśhanchictapis?

7. Diospa mandatuncuna nunacunapa mandatuncunapi mas allinmi

Autoridäcunaca ćhulan mandatucunacta malcancunapä. Chaynümi Diospa Gobiernunpis mandatuncunacta umanchic. Llapanchicmi cäsucunanchic mandatuncunacta. Liguiśhun 1 Corintios 6:9-11 ñatac limaśhun caypi:

• ¿Imanuymi cawsacuśhun llapanchic Diospa mandatuncunacta cäsucuptinchic?a

• ¿Imapïmi Jehová munan mandatuncunacta cäsucunanchicta?

• Diospa mandatuncunacta mana cäsucü nunacunaca, ¿cambiapäcunmanchućh? (Liguiśhun 11 versiculuta).

IMACTAM YAĆHALUNCHIC

Diospa Gobiernunta quiquin Jehovami ćhulala cielućhu ñatac enterun allpamanmi gobernamun’a.

Yalpaśhun

• ¿Mayancunam gobernapämun’a Diospa Gobiernunćhu?

• ¿Imapïmi mas allin Diospa Gobiernun nunacunapa gobiernunpi?

• ¿Imactam lulapäcunan Diospa Gobiernunta apoyacunaca?

MASTA YAĆHANAYQUIPÄ

¿Mayćhumi Diospa Gobiernun cayan? ¿Ima nilam Jesús chaypi? Liguiy.

“¿Es el Reino de Dios algo que se lleva en el corazón?” (Artículo de jw.org)

¿Imapïmi Jehovapa testiguncuna Diospa Gobiernullanta apoyapäcun? Licay videucta.

Completamente a favor del Reino de Dios (1:44)

¿Ima ninmi Bibliaca cieluman lï 144,000 aclaśhacunapi? Chayta yaćhanayquipä liguiy.

“¿Quiénes van al cielo?” (Artículo de jw.org)

Juc walmi carcelcäćhu cayal, yaćhala Diospa Gobiernullan jawca cawsacuyta apamunanta, liguiy.

“Aprendí cómo se solucionarán las injusticias” (¡Despertad!, noviembre de 2011)

Diospa Gobiernun allaycula gobernayta cielućhu 1914 wataćhumi. Chay watapimi allaycula camacay tiempucunaca. ¿Imanuypam chayta yaćhanchic? Chaypimi yaćhaśhun Bibliawan cayćhu. Yaćhaśhuntacmi 1914 watapi imanuymi cawsayca ñatac nunacunaca cayalcan.

1. ¿Ima nilam Bibliaca Diospa Gobiernunpi?

Biblia nishannü Diospa Gobiernun allaycunan cala gobernayta ‘anćhish tiempucuna’ pasaluptinmi (Daniel 4:16, 17). Chay anćhish tiempucunatam, Jesús śhutichala “naciuncunapa señalaśhan tiempucuna”, Jesuspa tiempunćhu manalämi chay anćhish tiempucunaca cumplilachu (Lucas 21:24, TNM). Chay anćhish tiempucunaca 1914 wataćhumi cumplila, chaypimi canan yaćhaśhun.

2. ¿Imanuymi cawsayca ñatac nunacunaca cayan 1914 watapi?

Jesuspa atinincuna tapuycula: ‘¿Ima siñalcunam śhamun’a, ćhamuśhayquita yaćhapäcunapä?’ (Mateo 24:3). Ñatac yaćhanapä cay tiempupa camacayninta. Jesús nila, cielućhu gobiernayta allaycuptin guerracuna, micuy-wanaycuna, terremotocuna canantam (liguicuy Mateo 24:7). Bibliaćhupis nilam “camacay timpucunäćhu” mana allincunallaña “sumä sasachacuycuna” canantam (2 Timoteo 3:1-5). Bibliaćhu nishanca cumpliyan 1914 watapimi.

3. ¿Imapïmi Jesús gobernayta allayculuptin ñacacuycunaca masta milala cay allpaćhu?

Jesús gobernayta allayculuptin cielućhu guerram cala, Jesusmi Satanaspa demoniuncunawan peliapäcula. Satanastam vencila, Bibliaca nishannü, “Satanaśhcätapis llapa anjilnintintawan cay pachäman jitalpälälimuñä” (Apocalipsis 12:9, 10, 12). Satanás alli-alli piñacuśham cayan yaćhacuyanñam prontuña chincacunanta. Chaymi nunacunata ñacayächin enterun allpaćhu, chaywanmi milalun llaquicuycuna ñatac nanaycuna. Pero Diospa Gobiernunmi chincachin’a chaycunacta.

MASTA YAĆHAYCUŚHUN

4. Bibliaćhu nishanmi cumplila 1914 wataćhu

VIDEO: El Reino de Dios empezó a gobernar en 1914 (5:02)

Diosmi willala Nabucodonosorta sueñuyninćhu, Babiloniaćhu gobiernayaptin imacuna pasanancunacta. Nabucodonosorpa sueñuśhanca puntacta cumplila quiquinćhumi, cumplilatacmi Diospa Gobiernunćhupis (liguiśhun Daniel 4:17).a

Liguiśhun Daniel 4:20-26. Chaypi’a atïnin dibujucunata licaśhun cutichinanchicpä tapucuycunata:

• A) ¿Imactam Nabucodonosor licala sueñuyninćhu? (Liguiśhun 20 ñatac 21 versiculuta).

• B) ¿Imam pasanan cala arbolcawan? (Liguiśhun 23 versiculuta).

• C) ¿Imaćh pasanan cala ‘anćhish tiempucunaca’ pasaluptin? (Liguiśhun 26 versiculuta).

Jatun arbolcäta tincuchin Diospa Gobiernunwanmi

BIBLIACA NISHAN (Daniel 4:20-36)

Gobernaśhan tiempuca

A) Juc jatun árbol

Gobiernaśhan śhayculun

B) ‘Arbolcäta cuchüluy anćhish tiempucunaca pasanancama’

Yapam gobiernan

C) ‘Gobiernuyquiman caśhan cuticachiśhunqui’

Nabucodonosorćhu cumpliśhan:

• D) ¿Mayan nisham cala arbolca? (Liguiśhun 22 versiculuta).

• E) ¿Imaymi caćhaycüla gobernayta? (Liguiśhun Daniel 4:29-33).

• F) ¿Imam pasala ‘anćhish tiempucunaca’ pasaluptin? (Liguiśhun Daniel 4:34-36).

NABUCODONOSORĆHU CUMPLIŚHAN

Gobernaśhan tiempuca

D) Nabucodonosormi, Babiloniaćhu gobernantica

Gobiernaśhan śhayculun

E) Nabucodonosor lucuman muyula 606 wataca m.J.c.b ñatac anćhish wata pasanancama manam atipalachu gobernayta

Yapam gobiernan

F) Nabucodonosorpa tantiaynin caśhan cutimuptinmi yapa gobernayta allaycula

Diospa Gobiernunćhu cumpliśhan:

• G) ¿Mayancuna nisham cala arbolca? (Liguiśhun 1 Crónicas 29:23).

• H) ¿Imaymi caćhaycälalila gobernayta? Jesús cay allpaćhu cayaptin, ¿imanuypam yaćhanchic paycuna manaña gobernapäcuśhanta? (Liguiśhun Lucas 21:24).

• I) ¿Mayćhumi ñatac imaymi yapa gobernayta allaycula?

DIOSPA GOBIERNUNĆHU CUMPLIŚHAN

Gobernaśhan tiempuca

G) Israel malcaćhu Diospa ćhulaśhan reycunaca gobernananpä

Gobiernaśhan śhayculun

H) Jerusalén 607 wataćhumi m.J.c chincacula; Diospa ćhulaśhan reycunapa gobernaśhan 2,520 watacuna cumplinancamam śhaycula

Yapam gobiernan

I) Jesús allaycula gobernayta cielućhu 1914 wataćhumi

5. Lluy imapis cambialañam 1914 watapi

Licaśhun VIDEUCTA.

VIDEO: En 1914 el mundo cambió de rumbo (1:10)

Jesús gobernayta allayculuptin imaymanam pasanan cala. Liguiśhun Lucas 21:9-11 ñatac limaśhun caypi:

• Liguiśhanchicnü, ¿imacunactam licalanqui o uyalilanqui?

Apóstol Pablo nilañam camacay tiempucunaćhu imanuy nunacunaca cananta. Liguiśhun 2 Timoteo 3:1-5 ñatac limaśhun caypi:

• Liguiśhanchicnü, ¿mayannintam licayanqui canan?

6. Jesús gobernayanñam chayurá, ¿imactam lulananchic?

Liguiśhun Mateo 24:3, 14 ñatac limaśhun caypi:

• Jesús ña gobernayaptin, ¿ima puydi trabajuctam enterun allpaman apayalcan?

• ¿Imactam lulanquiman cay trabajućhu yanapanayquipä?

Jesús gobernayanñam cielućhu ashllay tiempullañam faltan cay enterun allpaman gobernamunanpä. Liguiśhun Hebreos 10:24, 25 ñatac limaśhun caypi:

• Yaćhayanchicñam Diospa muyunnin ćhamun’añam, chayurá, ¿imactam lulananchic?

IMACTAM YAĆHALUNCHIC

Bibliaca nishan cumpliśhancuna ñatac sasacunacta licaśhanchiccunam yaćhachimanchic Jesús ña gobernayaśhanta. Chay gobiernupitam nunacunata willaycunanchic utunacuycunaman linanpä.

Yalpaśhun

• Danielpa librunćhu nishan anćhish tiempucunaca pasaluptin, ¿imam pasala?

• ¿Imanuypam yaćhanqui Jesús 1914 wataćhu gobernayta allaycuśhanta?

• ¿Imacta lulalmi apoyanquiman Diospa Gobiernunta?

MASTA YAĆHANAYQUIPÄ

¿Imanuymi nunacunaca cayalcan 1914 watapi? Chayta yaćhanayquipä liguiy.

“La era en que los valores decayeron radicalmente” (¡Despertad!, abril de 2007)

Yaćhay juc hombricta yanapaśhanta Mateo 24:14 nishan.

“El béisbol era mi pasión” (La Atalaya, núm. 3 2017)

Danielpa librunćhu 4 capitulućhu nishan, ¿Diospa Gobiernunpichun limayan? Liguiy.

“¿Cuándo comenzó a gobernar el Reino de Dios? (Primera parte)” (La Atalaya, 1 de octubre de 2014)

Bibliaca nishan ‘anćhish tiempucunapi’, ¿cumplilachun 1914 wataćhu? Chayta yaćhanayquipä liguiy.

“¿Cuándo comenzó a gobernar el Reino de Dios? (Segunda parte)” (La Atalaya, 1 de noviembre de 2014)

Diospa Gobiernun gobernayanñam. Ashllay tiempullañam faltan cay allpaćhu imacunactapis cambiananpä. Yaćhaśhun Jesús gobiernamuptin, ¿imanuyćha cawsayca can’a?

1. ¿Imactam lulan’a Diospa Gobiernun jawcaña cawsacunanchicpä?

Jesús Armagedón guerraćhu, chincachin’am juyu nunacunata ñatac gobiernucunata (Apocalipsis 16:14, 16). Chay tiempućhumi cumplin’a Bibliaca nishan: ‘Ashllay tiempullañam faltan, mana allin nunacunaca chincälälin’añamá’ (Salmo 37:10). Jesús gobiernamuptin manañam can’añachu ćhininacuy jawcallañam cawsacuśhun (liguicuy Isaías 11:4).

2. ¿Imanuymi cawsacuśhun Jesús gobiernamuptin?

Jesús gobiernamuptin ‘allin nunacunaca cay allpaćhu wiñay-wiñaypämi cawsaculcan’a’ (Salmo 37:29). Maynu tuquillaćh can’a llapan nunacunaca allinta lulapäcuptin, Jehovata cuyapäcuptin ñatac nunamasintapis. Chaypi’a manam mayanpis ishyan’achu nï wañun’achu.

3. ¿Imactam lulan’a Diospa Gobiernun juyu nunacunaca chincacuptin?

Juyu nunacunaca chincacuptin, Jesús gobiernan’a 1,000 watacunam. Chay walanga watacunaćhu Jesuswan 144,000 aclaśhacunaca nunacunata yanapapäcun’am mana juchayü perfectuña capäcunanpä. 1,000 watacunaca camacaluptin allpaca muyulun’a juc tuqui paraisumanmi llapan nunacunapis Jehovata cäsucuśhanpimi cushishañam cawsapäcun’a. Chaypi’a Jesús cuticachin’añam Taytan Jehovaman gobiernunta. Diospa śhutinta manañam pin’ayman julun’achu (Mateo 6:9, 10, TNM). Llapanmi yaćhapäcun’a Jehová allin gobernante caśhanta ñatac malcanta allicta cuidaśhanta. Chaypi’a Jehová chincachin’a Satanasta demoniuncunactawan pasaypipäñam, ñatac llapan mana cäsucü nunacunata (Apocalipsis 20:7-10). Chaycuna pasaluptin Diosta cäsucü nunacunaca cushisham wiñay-wiñaypä cawsacuśhun.

MASTA YAĆHAYCUŚHUN

4. Diospa Gobiernunmi chincachin’a cay allpaćhu gobiernucunata

“Nunacunaca quiquinpula mana allinta lulanaculcäshanćhümá” (Eclesiastés 8:9). Diospa Gobiernunmi llapan chaycunacta allichalun’a.

Liguiśhun Daniel 2:44 ñatac 2 Tesalonicenses 1:6-8, ñatac limaśhun caypi:

• ¿Imactam lulapäcun’a Jehová Jesuswan nunacunapa gobiernunwan ñatac apoyacunawan?

• Jehovapi ñatac Jesuspi yaćhaśhayquinü, ¿allintachućh paycuna juzgapäcun’a nunacunata?

5. Jesusmi allin gobernantica

Jesús gobernamaptinchic, achca allincunactam lulan’a nunacunapä. Licaśhun VIDEUCTA yaćhanayquipä Jesús nunacunata cuyaypï imacunacta lulaśhanta.

VIDEO: ¿Imactam Jesús lulan’a gobiernamuptin? (1:13)

Jesús cay allpaćhu cayal lluy lulaśhacunawanmi yaćhachimanchic śhamü tiempućhu lulanancunacta. Juc waquinnin Diospa promesancunapi, ¿mayannintam masta munanqui cumplinanta? Liguiśhun llapan textucunata.

6. Jesús gobiernamuptin allinñam cawsacuśhun

VIDEO: Una ventana a un futuro maravilloso (4:38)

Liguiśhun Salmo 145:16 ñatac limaśhun caypi:

• Jehová umäśhun llapanchicta munaśhanchictam, ¿imanuymi cayanqui chayta yaćhalcul?

IMACTAM YAĆHALUNCHIC

Jesús gobiernamuptin cay allpaca paraisumanmi muyun’a. Chayćhu allin nunacunami Jehovallactam adorapäcun’a wiñay-wiñaypä.

Yalpaśhun

• ¿Imactam lulan’a Diospa Gobiernun Jehovapa śhutin chuyanchaśha cananpä?

• ¿Imapïmi seguro cayanchic Diospa nishancuna cumplinanta?

• Diospa Gobiernun imacunactam lulan’a, ¿mayannintam cumplinanta munanqui?

MASTA YAĆHANAYQUIPÄ

Yaćhay, ¿imam Armagedonca?

“¿Qué es el Armagedón?” (Artículo de jw.org)

Yaćhay, ¿imam pasan’a “sumä jatun ñacacuycunaćhu” Jesús nishannü? (Mateo 24:21).

“¿Qué es la gran tribulación?” (Artículo de jw.org)

Jesús gobiernamuptin, ¿imanuyćha cawsaśhun? Licay videucta.

Imagínate en el Paraíso (1:50)

Juc politicucta, ¿imam yanapala? Chayta yaćhanayquipä liguiy.

“La Biblia les cambió la vida” (La Atalaya, 1 de enero de 2012)