YAĆHACHICUY 41
¿Ima ninmi Bibliaca juc hombre walmiwan puñuśhampi?
Achca nunacunam hombrica walmiwan puñuśhampi limayta pin’aculcan. Pero Jehová escribichila Bibliaćhu hombrica walmiwan puñuśhampi yaćhananchicpä. Dios licalichimaninchic calmi imactapis allinninchicpä yaćhachimanchic. Chaymi Bibliaćhu nimanchic imanuypa cawsacunanchicpä Jehovata cäsucul payta cushichiśhunmi ñatac ya’anchicpis cushisham cawsacuśhun wiñay-wiñaypä.
1. ¿Ima ninmi Jehová hombrica walmiwan puñuśhampi?
Jehová munan walmiwan hombrica puñunanta cuscan casado cäcunallactam. Casaraculcan manam chulincuna cananta munallalchu, aśhwanpa cuyanacul cushisha cawsaculcananpämi. Chaymi Bibliaćhu nin: ‘Müsu caśhayqui masanllayquiwan casaracul puñuculcay cushisha’ (Proverbios 5:18, 19). Jehová manam munanchu casaducunaca mansebaculcananta. Pay munan walmillanwan o esposullanwan cuyanaculcanantam (liguicuy Hebreos 13:4).
2. ¿Ima ninmi Jehová anla-juchacunapi?
Bibliaca yaćhachin ‘anla-juchacuycunaćhu cä nunacunaca […] Diospa gobiernunman manam yaycun’achu’ (1 Corintios 6:9, 10; Gálatas 5:19-21). Griego limayćhu anla-jucha limayca pornéia ninanmi. Jehovapä imacunam anla-juchapäcuyca 1) walmiwan hombre mana casaracullal puñuptin,a 2) hombrepula o walmipula casadunü puñuptin ñatac 3) uywacunawan anla-juchacunacta lulaptin. Lluy caycunaman mana palpuptinchic’a Jehovata cushichiśhun ñatac allinmi cawsacuśhun (1 Tesalonicenses 4:3).
MASTA YACHAYCUŚHUN
Imam yanapamäśhun anla-juchacunaman mana palpunanchicpä, caycunaman mana palpuptinchic ima bendiciuncunactam ćhasquiśhun, chaycunapimi yaćhaśhun.
3. Ayiculcay anla-juchacunapi
Bibliaćhumi willamanchic Diospa juc siervun José, anla-juchacunaman mana palpuśhampi. Liguiśhun Genesis 39:1-12 ñatac limaśhun caypi:
¿Imapïmi José ayicula? (Liguicuy 9 versiculuta).
¿Allinchun chay lulaśhan?
¿Imanuypam wamla-walaśhcuna atichinman Joseta anla-juchacunapi ayicunanpä? Licaśhun VIDEUCTA.
Jehová manam munanchu anla-juchacunacta lulananchicta. Liguiśhun 1 Corintios 6:18 ñatac limaśhun caypi:
¿Imacunam palpachimachwan anla-juchacunacta lulananchicpä?
¿Imanuypam am ayicunquiman anla-juchacunapi?
4. Anla-juchacunaman mana palpunayquipä callpanchacuy
¿Imacunam anla-juchacunaman palpuchiśhunquiman? Licaśhun VIDEUCTA ñatac limaśhun caypi:
Cay videućhu licaśhanchic hermanuca anla-juchacta lulayta munayalmi cuentacta ucüla, ¿imactam lulala?
Diosta adoracunaca callpanchacuśhunmi anla-juchacunaman mana piensananchicpä. ¿Imam yanapaśhunquiman anla-juchacunacta mana piensanayquipä? Liguiśhun Filipenses 4:8 ñatac limaśhun caypi:
Anla-juchacunaman piensaśhanchicnu’a, ¿imacunamanmi piensananchic?
Bibliata liguiptiqui ñatac Diosta serviptiqui, ¿yanapaśhunquimanchun anla-juchacunaman mana palpunayquipä?
5. Jehovapa mandamäśhanchiccuna allinninchicpämi
Jehová munan allin cawsacunanchictam. Chaymi nimanchic anla-juchacunapi aśhucunanchicpä, chayta cäsucuptinchic ¿imanuypam yanapamanchic? Liguiśhun Proverbios 7:7-27 ñatac licaśhun VIDEUCTA. Chaypi’a limaśhun caypi:
¿Imactam lulala chay walaśhca anla-juchacunaman palpunanpä? (Liguicuy 8, 9 versiculucunapi).
Proverbios 7:23, 26 nishannü, anla-juchacunacta lulacunaca achca sasacunactam uywapäcun. ¿Ima sasacunapïmi libramanchic mana anla-juchacunaman palpuptinchic?
Anla-juchacunaman mana palpul, ¿imanuymi cawsaśhun cananpis śhamü tiempucunaćhupis?
Bibliaca niyan anla-jucham, walmipula cäcunaca o hombrepula cäcunaca. Jehová llapanchictam cuyamanchic, chaymi mandatuncunacta umanchic cäsucul cushisha wiñay-wiñaypä cawsacunanchicpä. Liguiśhun 1 Corintios 6:9-11 ñatac limaśhun caypi:
Hombrepula cäcunaca walmipula cäcunaca, ¿chayllachun mana allin Jehovapä?
Jehová cuyamänanchicpä mana allin lulaycunactam caćhaycunanchic, cay allinninchicpämi. Liguiśhun Salmo 19:8, 11 ñatac limaśhun caypi:
Jehovapa mandatuncuna, ¿allinninchicpächun?
Jehová yanapala achca nunacunactam mandatuncunacta cäsucunanpä, amtapis yanapaśhunquimanmi.
WAQUINCUNA NIPÄCUN: “Ishcay nuna munanacul casadunü puñuśhanca manam juchachu”.
¿Ima ninquimanmi?
IMACTAM YAĆHALUNCHIC
Jehová munan walmiwan hombrica puñunanta cuscan casado cäcunallactam.
Yalpaśhun
Jehovapä, ¿imacunam anla-juchacunaca?
¿Imam yanapamäśhun mana palpunanchicpä anla-juchacunaman?
¿Imanuypam yanapamanchic cäsucuptinchic Jehovapa mandatuncunacta?
MASTA YAĆHANAYQUIPÄ
Diospa nishannümi walmicari puñunanpä casaraculcananmi, chayta yaćhanayquipä liguiy.
“¿Qué dice la Biblia sobre vivir juntos sin estar casados?” (Artículo de jw.org)
Bibliaca yaćhachimanchic hombrepula cäcunata walmipula cäcunata amam ćhïnicuśhunchu, liguiy.
Bibliapa mandatuncuna yaćhachimanchic mana palpunanchicpä anla-juchacunaman, liguiy.
¿Imam yanapala hombre masinllanwan cäcú nunacta Jehovata cäsucunanpä? Liguiy.
“La Biblia les cambió la vida” (La Atalaya, 1 de abril de 2011)
a Caycunapis anla-juchapäcuymi hombre cayninta o walmi cayninta jucpa shiminman ćhulaptin o siquinpa lulaptin, ñatacmi masturbaciuncäpis.