Genesis
2 Cielohuas, allpahuas, tucui chibi tiaccunahuas, casnami tarabashca saquirinaura. 2 Canzhis punzhaibi, Diosca pai tarabanata tucuchira. Diosca tucui pai tarabashcamanda canzhis punzhaibi samangahua callarira. 3 Diosca canzhis punzhata bendiciasha santo man nira, chi punzhaibi Dios pai tucui tarabashcamanda samaun, pai tucui rana munashcata tucuchisha samaun. 7 Jehova Dios, allpa pulbumanda runata rara. Paiba singaibi causangahua samaita pucura. Chasnami, runaga causac runa tucura. 15 Chasnami, Jehova Diosca runata Eden gustu sisayuc pistuibi churara, chibi tarpusha cuirachun. 16 Chimandas, Jehova Diosca runata caita mandara: “Cai pistuibi tiac tucui ruyagunamanda muyugunata sacsanagama micunata ushangui. 17 Pero, alita mana alita ricsina ruyamanda muyuta ama micuichu, chi muyuta micushca punzhallaita huañunguimi”. 18 Chasnami, Jehova Dios nira: “Cariga sapalla auna mana ali chan. Paita yanapachun shuc yanapacta rangarauni”. 19 Chasnami, Jehova Dios allpamanda huin sacha animalgunata, cieloibi pahuac animalgunatas raushca ara. Caran animalgunata shutichichun nisha runahuacma apara. Caran causaccuna, runa shutichishca shina tucunaura. 20 Chiraicu, runaga huiba animalgunata, cieloibi pahuac animalgunata, sacha animalgunatas shuc shutita churara. Pairaicu randiga shuc yanapacca mana tiarachu. 21 Chimanda, Jehova Dios carita mana sintinagama puñuchira. Pai puñushcaibi, shuc cushtillasta surcura, huasha paiba aichata tapara. 22 Chi surcushca cushtillasmanda, Jehova Dios shuc huarmita rara, chi huasha cai huarmita carihuacma apara. 23 23 Chasnami, cariga nira: “Paiga ñuca tullumanda tullu, ñuca aichamanda aicha mapan. Paiga Huarmi shutichishca manga, carimanda surcushca ashcamanda”. 24 Chiraicu, cariga paiba yayatas mamatas saquisha, paiba huarmillahuan causanga, ishcandi shuc aichalla tucunga.