Job
2 Chihuasha, Sirtu Diospa churiguna, Jehovahua ñaupacpi yaicuna punzha pactarira, Satanaspas paigunapuraibi aura, Jehovahua ñaupacpi paihua pistuta apingahua. 2 Chasnami, Jehova Satanasta tapura: “Maimandata shamungui”. Satanas, Jehovata casna rimara: “Allpata muyurisha puriumi shamuni”. 3 Jehova randi Supaita rimara: “Ñucata sirvic Jobta ricushcanguichu. Pai shina runa allpaibi mana pihuas tiyanzhu. Paiga mana culpaibac, tucuita alita rac, Diosta manzasha mana ali ranamanda caruyac man. Ñuca paita yangalla huanchichun nisha can imatas racpihuas, paiga chara ñuca ñaupacpi culpa illac catiun”. 4 Pero Satanas Jehovata cutichira: “Runaga amuraiculla yuyarin. Runaga paiba causaita quishpichingahua, tucui pai charishcata cunga. 5 Cunanllata, camba maquita chutasha, paiba aichata tullutas unguchi. Can casna racpi, camba quiquin ñahuibi maldiciaitucungui”. 6 Chiraicu, Jehova Satanasta nira: “Ricui, pai camba maquibi maun. Pero pai causaillata ama quichuichu”. 7 Chita uyasha, Satanas Jehovahua ñahuimanda risha, Jobta shuc nanachic caracha ungüihuan, chaqui pundamanda uma curunagama unguchira. 8 Jobca shuc manga paquirishca pitihuan carachata aspirisha, ushpaibi tiyarira. 9 Chita ricusha, paiba huarmi paita rimara: “Diosta chara casuunguichu. Diosta maldiciasha huañui”. 10 Pai randi cutichira: “Nuspa huarmiguna shina rimaungui. Sirtu Dios cushca aligunata apishaga, imahuata pai cushca mana aligunatahuas mana apishunya”. Job tucui rimashcaibi, pai shimihuan ima uchatas mana rimarachu.