Miqueas
4 Tucurina punzhagunaibi, Jehovahua huasimanda urcuga sinzhita shayachishca tucunga, huin urcugunamandas mas ahuayachishca manga. Chi urcuma ashca runaguna ringauna. 2 Ashca llactaguna chima risha ningauna: “Acuichi, Jehovahua urcuma sicashunchi, Jacobpa Diospa huasima. Diosca paiba ñambigunata ricsichinga, chiraicu ñucanchi paiba ñambigunaibi purishun”. Mandashca leyga Sionmanda llucshinga, Jehovahua shimiga Jerusalenmandas llucshinga. 3 Diosca ashca llactagunaraicu juez manga, carumanda ushayuc llactaguna rashcagunata alichinga. Paiguna espadagunata tarbana saulita rangauna, paiguna lanzagunata tulagunata rangauna. Mana maican llactagunapurahuas piñacungaunachu, guerrata ranatahuas mana yachangaunachu. 4 Cara runa paiba uva chagra ucuibi, higo chagra ucuibi tiaringauna, mana pihuas manzhachitucungaunachu, Manzhanaita Ushayuc Jehovahua shimi rimashcamanda. 5 Caran llactaguna paiguna quiquin diospa shutibi puringauna, ñucanchi randi huiñairaicu ñucanchi Dios Jehovahua shutibi purishun.